Read Iban 1 Bansa Israel 19 Bible Online

1 Bansa Israel 19 - Iban bible

1 Bansa Israel 19

¹Nyau kelama udah bekau nya, Nahas ti nyadi raja di Amon mati, lalu anak iya Hanun nganti iya nyadi raja.

²Ku Raja David bejaku, “Aku enda tau enda taluk ngagai Hanun, baka ke udah dikereja apai iya Nahas ngagai aku.” Nya alai David ngasuh bala seruan iya mansang mai pesan penyinu ati ngagai Hanun. Lebuh bala sida datai di Amon, lalu meri pesan penyinu ati ngagai Raja Hanun,

³bala tuai orang Amon lalu bejaku enggau raja, “Kati nuan ngumbai David ngasuh bala orang tu datai ditu mai pesan penyinu ati ngagai nuan, ketegal iya bebasaka apai nuan? Ukai! Iya ngasuh sida datai ditu ngambika sida matau lalu meresa lalu ngalahka menua tu!”

⁴Hanun lalu nangkap bala seruan David, ngukur ragum sida, netak gari sida naka punggung, lalu ngasuh sida pulai.

⁵Nyadi sida nya kelalu malu pulai. Lebuh David ninga berita pasal utai ti udah nyadi, iya lalu ngirumka pesan, ngasuh sida diau di Jeriko, lalu enda tau pulai sebedau ragum sida tumbuh baru.

⁶Nya baru Raja Hanun enggau orang Amon nemu diri udah ngaga David nyadi munsuh sida. Nya alai sida lalu ngirumka nyau deka bulih 40,000 kilogram pirak ngagai menua Mesopotamia enggau ngagai menua Maakah enggau menua Sobah di menua Siria, kena sida ngaji orang ke nepan kerita perang enggau nyua kerita perang sida.

⁷Tiga puluh dua ribu buah kerita perang ti disua sida, enggau bala soldadu raja Maakah datai lalu nirika kem semak Medeba. Orang Amon mega datai ari semua nengeri sida, lalu nyendiaka diri beperang.

⁸Lebuh David ninga nya, iya lalu mesanka Joap enggau semua bala soldadu.

⁹Orang Amon angkat, lalu belatur ba penama ngagai Rabah, iya nya indu nengeri sida, lalu bala raja ti udah datai deka nulung, belatur ba luar nengeri.

¹⁰Joap nemu bala munsuh deka nyerang iya ari mua enggau ari belakang. Nya alai iya lalu milih bala soldadu orang Israel ke pemadu kering, lalu ngasuh sida belatur nyatup orang Siria.

¹¹Iya ngasuh menyadi iya Abisai nguluka bala soldadu ti bukai. Abisai lalu ngatur sida nyatup orang Amon.

¹²Ku Joap bejaku enggau Abisai, “Enti nuan meda orang Siria nyau deka ulih ngalahka aku, tulung aku, lalu enti aku meda orang Amon nyau deka ulih ngalahka nuan, aku deka nulung nuan.

¹³Kering sereta berani! Awakka kitai bebendar belaban ngarika bansa kitai, enggau ke nengeri Allah Taala. Awakka peneka TUHAN nyadi.”

¹⁴Joap enggau bala iya lalu mansang nyerang. Orang Siria lalu rari.

¹⁵Lebuh orang Amon meda orang Siria rari, sida lalu rari ari Abisai, lalu nyurutka diri ngagai nengeri. Udah nya Joap pulai ngagai Jerusalem.

¹⁶Lebuh orang Siria nemu diri udah alah laban orang Israel, sida lalu mai bala soldadu ari menua Siria ti tunga ke timur Sungai Eupratis, lalu ngasuh sida diuluka Sobak, ti nyadi tuai soldadu Raja Hadadeser di Sobah.

¹⁷Lebuh David ninga nya, iya lalu ngempuruka bala soldadu orang Israel, lalu ngasuh sida belatur nyatup orang Siria. Sida lalu bamuk.

¹⁸Orang Siria lalu rari. David enggau bala iya munuh tujuh ribu iku orang ke nepan kerita perang enggau empat puluh ribu iku soldadu ke bejalai kaki. Sida mega munuh Sobak ti nyadi tuai soldadu orang Siria.

¹⁹Lebuh bala raja ke nitihka Hadadeser nemu diri udah alah laban orang Israel, sida lalu bebaik enggau David, lalu nyadi nembiak iya. Kenyau ari nya, orang Siria enggai agi nulung orang Amon.