Read Iban 1 Bansa Israel 20 Bible Online

1 Bansa Israel 20 - Iban bible

1 Bansa Israel 20

¹ Dalam musin bungai, iya nya maya bala raja selalu mansang ngayau, Joap nguluka bala soldadu nyerang menua Amon. Tang Raja David tinggal di Jerusalem. Sida ngelulung nengeri Rabah, nyerang, lalu ngerusak nengeri nya.

²Engkeramba Molek orang Amon [45] bisi siti makota emas ti berat kira tiga puluh empat kilogram. Dalam makota nya bisi sigi batu ti berega. Batu berega nya diambi David, lalu diengkahka iya ba makota iya empu. Iya mega ngambi mayuh amat perapasan ari nengeri nya.

³Iya nabanka orang ari nengeri nya lalu mejalka sida bekereja ngena penyayat, changkul besi, enggau kapak. Iya mega ngereja baka nya ngagai orang di semua nengeri bukai di Amon. Udah nya, iya enggau bala iya lalu pulai ngagai Jerusalem.

⁴Udah bekau nya, perang lalu nyadi baru enggau orang Pilistin di Geser. Tu meh maya Sibichai ari Husah munuh siku orang ke besai gamal ke benama Sipai, lalu orang Pilistin alah.

⁵ Siti agi perang nyadi enggau orang Pilistin. Nya meh maya Elhanan anak Jair munuh Lahmi, menyadi Goliat ke datai ari Gat, ke bempu sangkuh ti ngemesai tendai ti dikena orang betenun.

⁶Siti agi perang nyadi di Gat, alai siku orang ke besai gamal ke bisi enam iti tunjuk ba siti-siti jari, enggau kaki. Iya tu peturun bala orang besai gamal ke dulu kelia.

⁷Iya nyakap orang Israel, lalu Jonatan, anak lelaki menyadi David ke benama Samah, munuh iya.

⁸Sida tiga iku tu, ke dibunuh David enggau bala iya, endang peturun orang ke besai gamal di Gat.