Read Iban 1 Bansa Israel 21 Bible Online

1 Bansa Israel 21 - Iban bible

1 Bansa Israel 21

¹Nyadi Sitan deka ngasuh penusah ninggang orang Israel. Nya alai iya nyungkak David ngitung tubuh.

²David lalu bejaku enggau Joap enggau bala pemesai ti bukai, ku iya, “Bejalai kita ngagai semua menua Israel, berengkah ari ujung siti ngagai ujung siti menua tu, lalu itung semua orang. Aku keran deka nemu pemayuh sida.”

³Ku Joap nyaut, “Awakka TUHAN ngasuh orang Israel seratus kali mayuh agi ari sida ke diatu! Tuan Raja, semua sida tu nembiak nuan magang. Nama kebuah nuan deka ngereja nya, lalu ngasuh semua orang Israel salah magang?”

⁴Tang Raja mejalka Joap ngasika atur nya. Joap lalu mupuk, bejalai nengah serata menua Israel, lalu udah nya pulai baru ngagai Jerusalem.

⁵Iya lalu madahka ngagai Raja David pemayuh lelaki ti tau enggau beperang: 1,100,000 iku di menua Israel, enggau 470,000 di menua Judah.

⁶Tang laban Joap enda besetuju enggau atur raja, iya enda ngitung tubuh orang Lewi enggau orang ari raban bansa Benjamin.

⁷Allah Taala enda lantang ati ngagai pengawa nya, nya alai Iya ngukum orang Israel.

⁸Ku David bejaku enggau Allah Taala, “Aku udah bedosa besai, laban aku udah ngereja utai tu! Aku minta nuan ngampun aku. Aku udah beli ngereja utai tu.”

⁹Udah nya TUHAN lalu bejaku ngagai Gat, nabi ke bekereja ke David,

¹⁰“Padahka ngagai David, Aku deka ngasuh iya milih siti ari tiga iti utai. Aku deka ngereja sebarang utai ti dipilih iya.”

¹¹Gat lalu mansang ngagai David, madahka utai ti udah disebut TUHAN, lalu nanya, “Ni pilih nuan?

¹²Sekalika nuan milih tiga taun lapar pungkang? tauka tiga bulan ngerarika diri ari bala munsuh? tauka tiga hari alai TUHAN nyerang nuan ngena pedang Iya, lalu ngasuh penyakit berampit dalam menua nuan, lalu ngena melikat iya munuh orang di serata menua Israel? Nama saut ti patut diberi aku ngagai TUHAN?”

¹³Ku David nyaut Gat, “Tusah amat aku laban tu! Tang aku enggai diukum mensia. Awakka TUHAN Empu ngukum aku, laban Iya endang ngembuan pengasih.”

¹⁴Nya alai TUHAN ngasuh penyakit balat berampit ba bala orang Israel, lalu tujuh puluh ribu iku sida mati.

¹⁵Udah nya Iya ngasuh siku melikat ngerusak Jerusalem, tang TUHAN ngubah runding Diri, lalu bejaku ngagai melikat nya, “Badu agi! Umbas meh nya!” Nyadi melikat nya benung bediri ngimbai endur alai orang ngindik gandum ti diempu Araunah, orang Jebus.

¹⁶David bisi meda melikat nya bediri entara dunya enggau langit, megai pedang, sedia deka ngerusak Jerusalem. Udah nya David enggau bala tuai orang mayuh ke sama ngena kain guni, lalu nyungkurka diri ke tanah.

¹⁷David lalu besampi, “O Allah Taala, aku empu ti udah ngereja penyalah tu. Aku tu ti udah bedosa lalu ngasuh orang ngitung tubuh. Tang nama utai ti udah dikereja sida tu? O TUHAN Allah Taala aku, ukum meh aku enggau kami sebilik, tang anang ngukum orang mayuh tu.”

¹⁸Melikat TUHAN lalu ngasuh Gat bejaku enggau David ngasuh iya mupuk lalu ngaga siti alta ke TUHAN ba endur alai ngindik gandum ti diempu Araunah.

¹⁹David ngasika pesan TUHAN lalu mupuk, munyi ti dipadahka Gat ngagai iya.

²⁰Nyadi Araunah enggau empat iku anak lelaki iya benung ngindik gandum ba endur nya, lalu lebuh sida meda melikat nya, bala anak iya rari lalu belalai.

²¹Lebuh Araunah meda Raja David datai, iya ngambat raja, lalu nyungkurka diri ke tanah.

²²Ku David bejaku enggau iya, “Jual ngagai aku endur alai ngindik tu, ngambika aku ulih ngaga siti alta ke TUHAN, kena nagang penyakit tu berampit. Aku deka mayar semua rega utai nya.”

²³“Ambi aja, Tuan Raja,” ku Araunah bejaku, “lalu kereja aja utai ti deka dikereja nuan. Tu jelu sapi ti tau ditunu nyadika piring ba alta, lalu tu papan pelangka kena menyadika api, enggau gandum nyadika piring. Aku meri semua utai tu ngagai nuan.”

²⁴Tang ku raja nyaut, “Enda tau baka nya. Aku enda tau enda mayar semua rega utai nya ngagai nuan. Aku enggai meri utai nuan nyadika piring ngagai TUHAN, enti utai nya ukai utai ti dibeli aku empu.”

²⁵Iya lalu mayar Araunah enam ratus singkap duit emas kena meli endur ti alai ngindik gandum nya.

²⁶Iya lalu ngaga siti alta dia ke TUHAN, lalu ngenjuk piring tunu enggau piring pemaik. Iya besampi, lalu TUHAN nyaut iya, ngena api ti datai ari serega, ti nganguska piring ti ba alta nya.

²⁷TUHAN lalu ngasuh melikat nya nyelitka pedang iya.

²⁸Lebuh David meda TUHAN udah nyaut sampi iya, iya lalu ngenjuk piring ba alta ba endur ti ngindik gandum nya.

²⁹Langkau Kain TUHAN ti udah digaga Moses di menua puang, enggau alta ti alai nunu piring, agi bisi ba endur alai besembiang di Gibeon lebuh maya nya menya.

³⁰Tang David enda ulih bejalai kia nyembah Allah Taala, laban iya takutka pedang melikat TUHAN.