Read Iban 1 Bansa Israel 22 Bible Online

1 Bansa Israel 22 - Iban bible

1 Bansa Israel 22

¹Nya alai ku David bejaku, “Tu meh endur alai Rumah Sembiang deka didirika. Tu alta alai orang Israel deka ngenjuk piring tunu.”

²Raja David lalu ngasuh semua orang kampar ti diau di menua Israel begempuru, lalu ngasuh sida gawa. Sekeda sida nyendiaka lampang batu kena ngaga Rumah Sembiang.

³Iya meri mayuh amat besi kena ngaga paku lawang, enggau pengepit ke pintu kuta ti digaga ari kayu, enggau mayuh amat temaga, datai ke orang nyau enda ulih nimbang utai nya agi.

⁴Iya ngasuh orang Tire enggau orang Sidon mai ngagai iya mayuh amat batang kayu sidar.

⁵Ku pikir David, “Rumah Sembiang ti deka digaga anak aku Solomon enda tau enda chukup manah sereta beberita dalam dunya. Tang iya agi biak, lalu nadai peneleba. Nya alai aku enda tau enda dulu nyendiaka utai nya.” Nya alai David nyendiaka mayuh amat ramu sebedau iya mati.

⁶Iya lalu mesanka anak iya Solomon, lalu ngasuh iya ngaga sebuah rumah ke TUHAN Allah Taala ke disembah orang Israel.

⁷ Ku David bejaku enggau iya, “Anak, aku amat bisi amat ati deka ngaga Rumah Sembiang kena ngemesaika TUHAN Allah Taala aku.

⁸Tang TUHAN udah madahka ngagai aku, aku udah munuh kelalu mayuh orang, lalu kelalu suah udah beperang. Nya alai ketegal nya, Iya enda nyagi aku ngaga Rumah Sembiang nya ke Iya.

⁹Tang Iya udah ngaga siti semaya enggau aku. Ku Iya, ‘Nuan deka bisi siku anak lelaki, ti deka merintah dalam pemaik, laban Aku deka meri iya pemaik, ngambika iya enda diserang munsuh. Nama anak nuan nya Solomon, [46] laban lebuh iya merintah ila, Aku deka meri pemaik enggau pengelikun ngagai menua Israel.

¹⁰Iya deka ngaga Rumah Sembiang nya ke Aku. Iya deka nyadi anak Aku, lalu Aku deka nyadi Apai iya. Peturun iya deka megai perintah di menua Israel belama iya.’ ”

¹¹Ku David nampung jaku iya, “Nya alai, anak, awakka TUHAN Allah Taala nuan meruan enggau nuan, lalu awakka Iya ngamatka semaya Iya ti deka ngasuh nuan mujur ngaga sebuah Rumah Sembiang nya ke Iya.

¹²Lalu awakka TUHAN Allah Taala nuan meri nuan runding ti dalam, enggau penemu-dalam, ngambika nuan ulih megai perintah di menua Israel nitihka Adat Iya.

¹³ Enti nuan ngasika semua adat ti udah diberi TUHAN ngagai Moses ke orang Israel, nuan deka mujur. Nuan enda tau enda kering sereta berani. Anang takut tauka irau ati.

¹⁴Nyadi pasal Rumah Sembiang nya, aku udah, enggau naka ulih, ngempuruka nyau deka bulih 4,000 tan emas, enggau nyau deka bulih 40,000 tan pirak kena ngaga Rumah Sembiang nya. Nambahka nya, temaga enggau besi endang enda diletak pemayuh. Aku mega udah ngasuh orang nyendiaka ramu enggau batu, tang nuan enda tau enda nambahka nya.

¹⁵Nuan mayuh orang gawa: orang ke betingkuhka batu, tukang batu, tukang kayu, enggau mayuh orang ke landik begagaka semua macham utai

¹⁶ngena emas, pirak, temaga, enggau besi. Nya alai, awakka nuan berengkah ngereja pengawa nya, lalu awakka TUHAN meruan enggau nuan.”

¹⁷David mega ngasuh semua bala tuai orang Israel nulung Solomon.

¹⁸Ku iya bejaku, “TUHAN Allah Taala kita, udah seruran enggau kita, lalu udah meri kita pemaik. Iya udah ngasuh aku ngalahka semua orang ke nguan menua tu, lalu sida nya diatu udah nyadi ulun kita, enggau nyadi nembiak TUHAN.

¹⁹Nya alai, awakka kita betuaika TUHAN Allah Taala kita enggau pengabis ati enggau pengabis semengat kita. Awakka kita berengkah ngaga Rumah Sembiang, ngambika kita ulih nyimpan dalam Rumah nya Peti Lampang Batu Adat TUHAN, enggau semua utai ti kudus ti dikena nyembah Iya.”