Read Iban 1 Bansa Israel 23 Bible Online

1 Bansa Israel 23 - Iban bible

1 Bansa Israel 23

¹ Lebuh David nyau tuai amat umur, iya lalu nyiri anak iya Solomon nyadi raja menua Israel.

²Raja David ngempuruka semua bala tuai orang Israel, enggau semua bala imam, enggau orang Lewi.

³Iya ngitung tubuh semua orang Lewi ti lelaki, ari umur tiga puluh taun ke atas. Pemayuh sida nya 38,000 iku.

⁴Raja lalu ngeletak 24,000 iku ari bala sida nya bekereja dalam Rumah Sembiang, 6,000 iku nyadi kerani, enggau nyadi hakim,

⁵4,000 iku bekereja nyadi jejaga, lalu 4,000 iku muji TUHAN ngena pekekas musik ti diberi raja kena sida ngereja pengawa nya.

⁶David magi orang Lewi ngagai tiga bengkah raban, nitihka raban peturun sida, iya nya raban peturun Gerson, Kohat, enggau Merari.

⁷Gerson bisi dua iku anak lelaki: Ladan seduai Simei.

⁸Ladan bisi tiga iku anak lelaki: Jehiel, Setam, enggau Joel,

⁹ti nyadi tuai ke raban peturun ti diturunka Ladan. (Simei bisi tiga iku anak lelaki: Selomot, Hasiel, enggau Haran.) [47]

¹⁰Simei bisi empat iku anak lelaki: Jahat, Sina, Jeus, enggau Beriah, nitihka ripih penuai umur sida. Jeus seduai Beriah nadai mayuh peturun. Nya alai seduai iya diitung nyadi siti aja raban peturun.

¹²Kohat bisi empat iku anak lelaki: Amram, Isar, Hebron, enggau Usil.

¹³ Anak lelaki iya ke tuai nya Amran. Amran nya apai Aron seduai Moses. (Aron enggau peturun iya udah diseraraka ngambika sida ngibun utai ti kudus belama iya, nunu menyan lebuh nyembah TUHAN, bekereja ke TUHAN, lalu merekatka orang mayuh dalam nama Iya.

¹⁴Tang anak lelaki nabi Moses disengkaumka dalam raban orang Lewi.)

¹⁵Moses bisi dua iku anak lelaki, Gersom seduai Elieser.

¹⁶Orang ke nyadi tuai ke bala anak Gersom nya Sebuel.

¹⁷Elieser semina bisi siku aja anak lelaki, Rehabiah, tang Rehabiah mayuh peturun.

¹⁸Anak lelaki Kohat ke lumur dua, Isar, bisi siku anak lelaki, benama Selomit, ti nyadi tuai ke raban peturun nya.

¹⁹Anak lelaki Kohat ke lumur tiga, Hebron, bisi empat iku anak lelaki: Jeriah, Amariah, Jahasiel, enggau Jekamim.

²⁰Anak lelaki Kohat ke lumur empat, Usil, bisi dua iku anak lelaki: Mikah seduai Isiah.

²¹Merari bisi dua iku anak lelaki: Mahli seduai Musi. Mahli mega bisi dua iku anak lelaki, Eleasar seduai Kis,

²²tang Eleasar mati nadai anak lelaki, semina anak indu aja. Bala anak indu iya jadi enggau bala petunggal sida empu, iya nya bala anak lelaki Kis.

²³Musi anak lelaki Merari ke lumur dua, bisi tiga iku anak lelaki: Mahli, Eder, enggau Jerimot.

²⁴Tu meh bala peturun Lewi, nitihka raban peturun enggau ruang bilik sida. Semua nama sida dituliska magang. Genap iku peturun iya ke umur dua puluh taun ke atas, bisi pengawa magang dalam Rumah Sembiang.

²⁵Ku David, “TUHAN Allah Taala ke disembah orang Israel udah meri pemaik ngagai bala nembiak Iya, lalu Iya Empu deka diau di Jerusalem belama iya.

²⁶ Nya alai bala orang Lewi enda ibuh agi ngesan langkau sembiang nya, enggau semua pekekas ti dikena nyembah Allah Taala.”

²⁷Nitihka atur ti penudi diberi David, semua orang Lewi dituliska nama magang ngambika sida diberi pengawa lebuh umur sida manggai dua puluh taun.

²⁸ Tu macham pengawa ti diberi ngagai sida: nulung bala imam ke ari peturun Aron ngereja pengawa nyembah Allah Taala dalam Rumah Sembiang, ngintu tengah laman enggau bilik dalam Rumah Sembiang, lalu nyaga utai ti kudus ngambika enda kamah,

²⁹betanggungjawapka roti ti diberi ngagai Allah Taala, tepung ti dikena ngaga piring, singkap roti ti enda beragi, piring ti dipanggang, enggau tepung ti dichampur enggau minyak kana, nimbang enggau nakar piring ti diberi ngagai Rumah Sembiang,

³⁰enggau muji sereta ngemuliaka TUHAN pagi lemai

³¹enggau genap kali piring ditunu ke TUHAN lebuh Hari Sabat, lebuh Gawai Anak Bulan, enggau lebuh gawai bukai. Atur mega digaga kena ngeletak pemayuh tubuh orang Lewi bekereja sekali-sekali. Orang Lewi nadai diberi pengawa bukai tang semina nyembah TUHAN siku aja.

³²Sida diberi tanggungjawap ngintu Langkau Kain TUHAN enggau Rumah Sembiang, enggau pengawa nulung kaban belayan sida, iya nya bala imam ke ari peturun Aron, nyembah Allah Taala dalam Rumah Sembiang.