Read Iban 1 Bansa Israel 25 Bible Online

1 Bansa Israel 25 - Iban bible

1 Bansa Israel 25

¹Raja David enggau bala tuai orang Lewi lalu milih raban peturun orang Lewi nguluka pengawa besembiang: Asap, Heman, enggau Jedutun. Pengawa sida nya madahka pesan Allah Taala, diumba enggau musik ari belikan enggau bebendai. Tu ripih nama orang ke udah dipilih nguluka pengawa besembiang, enggau bagi pengawa ti dikereja siti-siti raban:

²Empat iku anak lelaki Asap: Sakur, Josep, Netaniah, enggau Asarelah. Sida tu diuluka Asap, ke madahka pesan Allah Taala, genap kali raja ngasuh iya.

³Enam iku anak lelaki Jedutun: Gedaliah, Seri, Jesaiah, Simei, Hasabiah, enggau Matitiah. Sida tu diuluka apai sida, madahka pesan Allah Taala, diumba enggau musik ari belikan, enggau lagu puji, enggau lagu terima kasih ngagai TUHAN.

⁴Empat belas iku anak lelaki Heman: Bukiah, Mataniah, Usil, Sebuel, Jerimot, Hananiah, Hanani, Eliatah, Gidalti, Romanti-eser, Josbekasah, Maloti, Hotir, enggau Mahasiot.

⁵Allah Taala udah meri ngagai Heman, ti nyadi nabi ke raja, empat belas iku anak lelaki tu, enggau tiga iku anak indu, munyi ti udah disemaya Iya, ngambika meri kuasa ngagai Heman.

⁶Semua anak lelaki iya tu nebah bebendai enggau belikan, diuluka apai sida, kena ngumba pengawa nyembah Allah Taala dalam Rumah Sembiang.

⁷Semua dua puluh empat iku lelaki tu orang ke landik magang. Orang Lewi ti bukai endang orang ke udah dilatih nebah musik. Pemayuh sida 288 iku.

⁸Kena nentuka bagi pengawa sida, sida bechabut undi, nemuka sida nya agi biak tauka udah tuai, endang udah bisi pengelandik tauka semina baru deka ngujika diri.

⁹Orang ke 288 iku nya dibagi, nitihka ruang bilik sida, ngagai dua puluh empat iti raban, dua belas iku dalam siti-siti raban, lalu siti-siti raban diuluka siku tuai. Tu ripih sida ke bekereja: (1) Josep ari ruang bilik Asap; (2) Gedaliah; (3) Sakur; (4) Seri; (5) Netaniah; (6) Bukiah; (7) Asarelah; (8) Jesaiah; (9) Mataniah; (10) Simei; (11) Usil; (12) Hasabiah; (13) Sebuel; (14) Matitiah; (15) Jerimot; (16) Hananiah; (17) Josbekasah; (18) Hanani; (19) Maloti; (20) Eliatah; (21) Hotir; (22) Gidalti; 923) Mahasiot; (24) Romanti-eser.