Read Iban 1 Bansa Israel 26 Bible Online

1 Bansa Israel 26 - Iban bible

1 Bansa Israel 26

¹Tu bagi pengawa ke orang Lewi ke bekereja nyadi jejaga ba Rumah Sembiang. Ari raban peturun Korah nya Meselemiah anak Kore, ari ruang bilik Asap.

²Iya bisi tujuh iku anak lelaki, diripih nitihka penuai sida: Sekariah, Jediael, Sebadiah, Jatnil,

³Elam, Jehohanan, enggau Eliehoenai.

⁴ Obet-edom udah diberekatka Allah Taala enggau lapan iku anak lelaki, diripih nitihka penuai sida: Semaiah, Jehosabat, Joah, Sakar, Netanel,

⁵Amil, Isakar, enggau Peuletai.

⁶Anak lelaki Obet-edom ke tuai, Semaiah, bisi enam iku anak lelaki: Othni, Repael, Obet, Elsabat, Elihu, enggau Semakiah. Sida tu orang ke bepangkat dalam raban peturun sida empu, laban sida tu landik. Dua iku ke dudi nya balat amat landik.

⁸Ruang bilik Obet-edom mansutka enam puluh dua iku orang ke landik ngereja pengawa tu.

⁹Ruang bilik Meselemiah mansutka lapan belas iku orang ke landik.

¹⁰Hosah, ari raban peturun Merari, bisi empat iku anak lelaki: Simri (apai iya ngasuh iya nyadi tuai, taja pen iya ukai anak tuai),

¹¹Hilkiah, Tebaliah, enggau Sekariah. Semua orang ari ruang bilik Hosah ti nyadi jejaga dalam Rumah Sembiang nya tiga belas iku.

¹²Bala orang ke nyaga Rumah Sembiang nya dibagi ngagai raban nitihka ruang bilik, lalu sida iya diberi pengawa dalam Rumah Sembiang, baka orang Lewi ti bukai.

¹³Genap ruang bilik, enda milih pemayuh orang dalam ruang bilik nya, bechabut undi kena nentuka pintu ti dijaga sida.

¹⁴Selemiah enchabut undi ke pintu ti muak ke timur, lalu anak iya Sekariah, orang ke selalu meri jaku lalau ti manah, enchabut undi ke pintu ti muak ke utara.

¹⁵Obet-edom udah diberi pintu ti muak ke selatan, lalu bala anak lelaki iya diletak nyaga bilik setor.

¹⁶Supim seduai Hosah diasuh nyaga pintu ti muak ke barat, enggau pintu Saleket ba jalai ti muak ke atas. Orang ke jaga endang meruan diberi jam maya sida jaga, begintir-gintir.

¹⁷Muak ke timur, enam iku jejaga bekereja sehari; muak ke utara, empat; enggau muak ke selatan, empat. Empat iku jejaga nyaga bilik setor tiap hari, dua iku ba siti-siti bilik setor.

¹⁸Semak balai ti besai ti muak ke barat, empat iku orang jaga ngimbai jalai raya, enggau dua iku ba balai nya empu.

¹⁹Nya meh bagi pengawa jejaga ti diberi ngagai raban peturun Korah enggau ngagai raban peturun Merari.

²⁰Orang Lewi ti bukai diasuh ngemataka sarang reta Rumah Sembiang, enggau nyaga bilik setor alai nyimpan pemeri ti diserahka ngagai Allah Taala.

²¹Ladan, siku ari bala anak lelaki Gerson, nya nurunka dua tiga ruang bilik, nyengkaum ruang bilik anak iya Jehiel.

²²Anak Ladan ti lelaki dua iku, Setam seduai Joel, nyadi tuai ngemataka sarang reta Rumah Sembiang enggau bilik setor.

²³Pengawa mega diletak ngagai peturun Amram, Isar, Hebron enggau Usil.

²⁴Sebuel, siti raban bansa ari anak Moses ke benama Gersom, nyadi tuai pemesai ke betanggungjawapka sarang reta Rumah Sembiang.

²⁵Iya bekaban enggau Selomit ari menyadi Gersom ke benama Elieser. Elieser nya apai Rehabiah, ti nyadi apai Jesaiah, apai Joram, apai Sikri, apai Selomit.

²⁶Selomit enggau sida sebilik ngemataka semua pemeri ti diserahka Raja David, bala tuai bilik, bala tuai peturun, enggau bala pemesai soldadu, ngagai Allah Taala.

²⁷Sida ngambi sekeda perapasan ti udah ulih sida lebuh sida beperang, lalu nyerahka utai nya ngambika bisi dikena dalam Rumah Sembiang.

²⁸Selomit enggau sida sebilik nyadi tuai ngemataka semua utai ti udah diserahka ngagai Allah Taala ngambika bisi dikena dalam Rumah Sembiang, nyengkaum pemeri ti dibai nabi Samuel, dibai Raja Saul, dibai Abner anak Ner, enggau dibai Joap anak Seruiah.

²⁹Chenaniah enggau bala anak lelaki iya, ari peturun Isar, diasuh ngereja pengawa opis: nyadi pemesai dalam opis, enggau nyadi hakim.

³⁰Hasabiah enggau 1,700 iku bala kaban belayan iya ti tebilang magang, ke datai ari peturun Hebron, diasuh ngatur semua pekara pengarap enggau semua pekara bukai di menua Israel di barat Sungai Jordan.

³¹Jeriah nya orang ke nyadi tuai ke bala peturun Hebron. Dalam taun ti keempat puluh David nyadi raja, purih ari peturun Hebron bisi kena pansik, lalu bala soldadu ti tebilang nama ari ruang bilik nya bisi ditemu diau di Jaser, di menua Giliat.

³²Raja David milih 2,700 iku tuai bilik ti tebilang ari kaban belayan Jeriah, lalu ngasuh sida ngemataka semua pekara pengarap enggau pekara bukai di menua Israel ti di timur Sungai Jordan, iya nya di menua Reuben, Gat, enggau Manasi Timur.