Read Iban 1 Bansa Israel 28 Bible Online

1 Bansa Israel 28 - Iban bible

1 Bansa Israel 28

¹Raja David mesanka semua pemesai di menua Israel begempuru di Jerusalem. Nya alai semua bala pemesai ari semua raban bansa, bala pemesai ke bejalaika pengawa perintah, bala tuai peturun, orang ke ngemataka reta tengkira enggau jelu tupi ti diempu raja enggau bala anak iya, semua bala pemesai ke bekereja dalam istana, bala tuai soldadu, enggau orang ke bepangkat, begempuru di Jerusalem.

² David bediri di mua sida, lalu bejaku enggau sida, “Menyadi, unggal, pendingka aku. Aku udah bisi amat ati deka ngaga rumah ti tetap ke Peti Lampang Batu Adat, ti nyadika pelasar kaki TUHAN Allah Taala kitai. Aku udah nyendiaka utai kena ngaga sebuah Rumah Sembiang nya kena ngemesaika Iya,

³tang Iya enda nyagi aku ngaga rumah nya, laban aku tu soldadu, lalu udah munuh mayuh orang.

⁴TUHAN Allah Taala ke disembah orang Israel, udah milih aku enggau bala peturun aku megai perintah di menua Israel belama iya. Iya udah milih raban bansa Judah mansutka tuai, lalu ari Judah iya udah milih ruang bilik apai aku. Ari semua ruang bilik nya, Iya udah gaga ati ngambi aku, lalu ngasuh aku nyadi raja ke semua menua Israel.

⁵Iya udah meri aku mayuh anak lelaki, lalu ari semua sida nya, Iya udah milih Solomon megai perintah di menua Israel, menua ti endang diperintah TUHAN.

⁶“Ku TUHAN bejaku ngagai aku, ‘Anak nuan Solomon deka ngaga Rumah Aku. Aku udah milih iya nyadi anak Aku, lalu Aku deka nyadi Apai iya.

⁷Aku deka ngasuh perintah iya meruan belama iya, enti iya bejimat ngasika semua adat enggau pesan Aku, baka ke dikereja iya diatu.’

⁸“Nya alai, di mua Allah Taala, enggau di mua semua bala orang Israel tu, ke endang nembiak TUHAN, aku ngasuh kita nitihka lalu ngiga semua pesan TUHAN Allah Taala kita, ngambika kita deka majak bempu menua ti manah tu, lalu nyerahka menua tu ngagai serak ti nangkanka kita belama iya.”

⁹Ngagai Solomon iya nyebut jaku tu, “Anak, aku ngasuh nuan ngaku Allah Taala ti disembah apai nuan, nyadika Allah Taala nuan, lalu betuaika Iya enggau enda bebagi ati, sereta enggau runding ti seruran ransing. Iya nemu semua runding enggau pengingin kitai. Enti nuan mansang ngagai Iya, Iya deka nyambut nuan, tang enti nuan ninggalka Iya, Iya deka ngelengkaka nuan belama iya.

¹⁰Nuan enda tau enda nemu, TUHAN udah milih nuan ngaga Rumah Sembiang Iya ti kudus. Gaga Rumah Sembiang nya; nuan enda tau enda kering, lalu ngereja pengawa nya.”

¹¹David lalu meri ngagai Solomon semua pelan ke rumah dalam Rumah Sembiang nya, pelan ke bilik setor, enggau pelan ke semua bilik bukai, enggau pelan ke Endur ti Pemadu Kudus, alai dosa diampun.

¹²Iya mega meri ngagai Solomon pelan ke semua utai ti udah dikira iya ke tengah laman enggau ke bilik ti ngelingi tengah laman nya, pelan ke bilik setor alai nyimpan pekekas Rumah Sembiang, enggau alai nyimpan pemeri ti diserahka ngagai TUHAN.

¹³David mega meri ngagai iya pelan kena ngatur bala imam enggau orang Lewi ngereja pengawa sida, ngereja pengawa dalam Rumah Sembiang, sereta ngintu semua pekekas dalam Rumah Sembiang.

¹⁴Iya meri atur pasal pemayuh pirak enggau emas kena begagaka pekekas nya,

¹⁵kena begagaka siti-siti lampu enggau penuduk lampu,

¹⁶kena begagaka mija pirak, enggau siti-siti mija emas alai engkah tuku roti ti diberi ngagai Allah Taala.

¹⁷Iya mega meri atur pasal pemayuh emas ti tulin ti tau dikena begagaka serampang, mangkuk, enggau tepayan, pemayuh pirak enggau emas kena begagaka pinggai,

¹⁸enggau pemayuh emas ti tulin kena begagaka alta alai nunu menyan, enggau kena begagaka kerita perang ke melikat cherub ti besayap, ti ngerembaika sayap seduai iya ari atas Peti Lampang Batu Adat TUHAN.

¹⁹Ku Raja David, “Semua utai nya bisi dalam pelan ti ditulis nitihka atur ti udah diberi TUHAN Empu ngagai aku, ngambika dikereja.”

²⁰Ku Raja David bejaku ngagai anak iya Solomon, “Nuan enda tau enda kering sereta berani, lalu kereja pengawa nya. Anang takut tauka irau ati; laban TUHAN Allah Taala, ti nyadi Allah Taala aku, bisi enggau nuan. Iya enda ngelebuka nuan, tauka ninggalka nuan, nyentuk ngagai maya semua pengawa begagaka Rumah Sembiang TUHAN udah tembu magang.

²¹Bala imam enggau bala orang Lewi udah diberi pengawa ti deka dikereja sida dalam Rumah Sembiang. Orang ke bekereja, ke bisi semua macham pengelandik gagit ati deka nulung nuan, lalu semua orang mayuh enggau bala tuai sida endang nganti atur ari nuan.”