Read Iban 1 Bansa Israel 29 Bible Online

1 Bansa Israel 29 - Iban bible

1 Bansa Israel 29

¹ Ku Raja David madahka ngagai semua orang ke begempuru dia, “Anak aku Solomon udah dipilih Allah Taala, tang iya agi biak lalu kurang peneleba. Utai ti deka dikereja nya pengawa ti besai, laban tu ukai istana alai mensia diau, tang Rumah Sembiang TUHAN Allah Taala.

²Aku udah, enggau naka ulih nyendiaka utai kena ngaga Rumah Sembiang nya - emas, pirak, temaga, besi, ramu, batu ti berega enggau batu gem, batu kena begagaka geladak, enggau mayuh batu ti alus.

³Nambahka semua utai ti udah disediaka aku, aku udah meri pirak enggau emas ari reta tengkira aku empu, ketegal pemesai pengerindu aku ke Rumah Sembiang Allah Taala.

⁴Aku udah meri 115 tan emas ti pemadu alus enggau 265 tan pirak ti tulin kena ngelagu dinding Rumah Sembiang

⁵enggau kena ngaga semua utai ti deka digaga orang ke landik. Kati orang bukai bisi deka meri utai ngagai TUHAN?”

⁶Udah nya bala tuai peturun, bala pemesai ari raban bansa, bala tuai soldadu, enggau bala orang ke ngemataka reta tengkira raja lalu madahka diri deka meri

⁷utai kena begagaka Rumah Sembiang: 190 tan emas, 380 tan pirak, 675 tan temaga, enggau 3,750 tan besi.

⁸Orang ke bisi batu ti berega meri utai nya ngagai sarang reta Rumah Sembiang. Nyadi sarang wang tu dikemataka Jehiel, ke datai ari raban bansa Gersom ari peturun Lewi.

⁹Orang mayuh udah meri enggau ati ti gerah mudah ngagai TUHAN, lalu sida gaga ati ke pemayuh utai ti diberi. Raja David mega balat amat gaga ati.

¹⁰David lalu muji Allah Taala di mua semua orang mayuh. Ku iya, “TUHAN Allah Taala aki kami Jakop, awakka Nuan dipuji belama lama iya!

¹¹ Nuan endang besai sereta bekuasa, bemulia, pemadu manah, lalu endang Raja. Semua utai di serega enggau di dunya endang enggi Nuan magang, lalu Nuan endang Raja, Raja ari atas semua.

¹²Semua pengaya enggau basa endang datai ari Nuan. Nuan merintah semua utai ngena pengering enggau kuasa Nuan, lalu Nuan ulih ngaga orang nyadi besai sereta kering.

¹³Diatu, Allah Taala kami, kami meri terima kasih ngagai Nuan, lalu kami muji nama Nuan ti bemulia.

¹⁴“Tang taja pia, aku enggau nembiak aku enda tentu ulih meri Nuan utai, laban semua utai endang pemeri ari Nuan, lalu kami semina meri pulai baru utai ti endang enggi Nuan.

¹⁵Nuan nemu, O TUHAN, kami idup ditu baka orang ke udah kena buai ngagai menua bukai, baka orang kampar, baka aki ini kami menya. Seput kami semina tan sekejap aja baka ayuk, lalu kami enda ulih ngerarika diri ari pemati.

¹⁶O TUHAN Allah Taala kami, kami udah ngempuruka semua pengaya tu kena ngaga Rumah Sembiang Nuan, kena ngemesaika nama Nuan ti kudus, tang semua utai tu datai ari Nuan magang, lalu semua utai tu endang enggi Nuan.

¹⁷Aku nemu Nuan ngabas ati genap iku orang, lalu gaga ati ke orang ke rentang ati. Ngena ati ti bendar sereta lurus aku udah abis ati meri semua utai tu ngagai Nuan, lalu aku udah meda bala nembiak Nuan ti begempuru ditu udah lantang ati mai pemeri tu ngagai Nuan.

¹⁸TUHAN Allah Taala aki ini kami Abraham, Isak enggau Jakop, awakka Nuan ngasuh pengangkun ti baka tu seruran kering belama-lama dalam ati bala nembiak Nuan, lalu awakka Nuan ngasuh sida seruran tetap ati ngagai Nuan.

¹⁹Beri meh ngagai anak aku Solomon pengingin ti enda belampung ati ngasika semua pesan, adat, enggau atur Nuan, lalu ngaga Rumah Sembiang ngena utai tu ti udah disediaka aku.”

²⁰Udah nya David lalu bejaku enggau orang mayuh, “Beri puji ngagai TUHAN Allah Taala kita!” Semua orang ke begempuru lalu muji TUHAN Allah Taala aki ini sida, lalu sida nyungkurka diri ngemesaika TUHAN enggau raja.

²¹Hari siti sida munuh jelu nyadika piring, nyerahka jelu nya ngagai TUHAN, lalu udah nya, meri utai nya ke diempa orang mayuh. Nambahka nya, sida mega meri seribu iku sapi ti lelaki, seribu iku bedus ti lelaki, enggau seribu iku anak domba nyadika piring tunu segala ba alta. Sida mega mai piring wain.

²²Nya alai sida gaga ati sehari nya lebuh sida makai ngirup di mua TUHAN. Sida lalu nyiri Solomon nyadi raja kedua kali. Dalam nama TUHAN sida nata iya nyadi raja, lalu Sadok nyadi imam.

²³ Nya alai Solomon nganti apai iya nyadi raja ba kerusi diraja ti udah ditumbuhka TUHAN. Iya mujur nyadi raja, lalu semua orang Israel ngasi magang ke iya.

²⁴Semua bala pemesai enggau bala soldadu, nyengkaum bala anak lelaki David ti bukai, besemaya deka taluk ngagai Raja Solomon.

²⁵TUHAN ngasuh semua orang Israel bebasaka Solomon, lalu Iya ngaga Solomon bemulia agi ari semua raja bukai ti udah kala megai perintah di menua Israel.

²⁶David anak Jesi merintah semua menua Israel

²⁷ empat puluh taun. Iya merintah di Hebron tujuh taun, lalu di Jerusalem tiga puluh tiga taun.

²⁸Iya mati lebuh umur iya nyau tuai, bulih pengaya sereta dibasa orang, lalu anak iya Solomon nganti iya nyadi raja.

²⁹Cherita lama pasal Raja David, ari pun nyentuk ke ujung, bisi dituliska magang dalam cherita pasal tiga iku nabi, Samuel, Natan, enggau Gat.

³⁰Cherita nya nusui pasal chara iya merintah, pemesai kuasa iya, enggau pasal semua utai ti udah nyadi ba iya, ba orang Israel, enggau ba perintah menua bukai ti bekelingi dia.