Read Iban 1 Bansa Israel 5 Bible Online

1 Bansa Israel 5 - Iban bible

1 Bansa Israel 5

¹ Tu nama bala peturun Reuben anak tuai Jakop. (Laban iya udah beleman enggau siku ari indu simpan apai iya, iya udah ngelenyauka hak nyadi anak tuai, lalu hak nya diberi ngagai Josep.

² Tang raban bansa Judah nyadi raban bansa ti pemadu kering, lalu orang ke nyadi pemerintah ke semua orang Israel datai ari raban bansa Judah.)

³Reuben, anak tuai Jakop, bisi empat iku anak lelaki: Hanok, Palu, Hesron, enggau Karmi.

⁴ Tu nama peturun Joel ari serak siti ngagai serak siti: Semaiah, Gok, Simei, Mikah, Reaiah, Baal, enggau Birah. Raja besai menua Asiria ke benama Tiglat Pileser nangkap Birah, ti nyadi tuai raban bansa nya, lalu muai iya ari menua nya

⁷Cherita pasal ruang bilik bisi nyebut bala tuai peturun ari raban bansa Reuben baka tu: Jeil, Sekariah,

⁸enggau Bela, anak Asas, uchu Sema, ari raban peturun Joel. Bala raban bansa tu diau di Aroer, enggau di menua ti berengkah ari endur nya nyentuk ngagai Nebo enggau Baal-meon di utara.

⁹Raban jelu sida nyau mayuh amat di menua Giliat. Nya alai sida nguan menua tunga ke timur nyentuk ngagai menua puang, ti mungkur nyentuk ngagai Sungai Eupratis.

¹⁰Lebuh maya Raja Saul, orang ari raban bansa Reuben nyerang orang Hagri, munuh sida, lalu nguan menua orang nya di timur menua Giliat.

¹¹Raban bansa Gat diau tunga ke utara raban bansa Reuben, di menua Basan, nyentuk ngagai Salekah di timur.

¹²Orang ke nyadi tuai ke raban peturun tu nya Joel, lalu tuai ke raban peturun ke lumur dua nya Sapam. Janai enggau Sapat nyadi tuai ke raban peturun ti bukai di Basan.

¹³Orang bukai dalam raban bansa Gat nya orang ari suku raban bansa Mikael, Mesulam, Sheba, Jorai, Jakan, Sia, enggau Eber.

¹⁴Sida tu peturun Abihail anak Huri. Baka tu ku ripih orang ke nurunka Abihail: Abihail, Huri, Jaroah, Giliat, Mikael, Jeshisai, Jahdo, Bus.

¹⁵Ahi anak Abdil, uchu Guni, nyadi tuai ke suku raban bansa tu.

¹⁶Sida diau dalam nengeri di menua Basan enggau di menua Giliat, enggau ba sebelah padang rumput di Saron. (

¹⁷Cherita tu ditulis lebuh maya Raja Jotam megai perintah di menua Judah, enggau maya Jeroboam Ti Kedua megai perintah di menua Israel.)

¹⁸Pemayuh soldadu dalam raban bansa Reuben, Gat enggau Manasi Timur nya 44,760 iku. Semua sida tu udah chukup dilatih magang ba chara ngena terabai, pedang, enggau panah.

¹⁹Sida mansang nyerang raban bansa Hagri di Jetur, Napis, enggau Nodap.

²⁰Sida manggaika pengarap sida ba Allah Taala, lalu besampi ngagai Iya minta Iya nulung sida. Allah Taala lalu nyaut sampi sida, lalu ari saup Iya sida ulih ngalahka orang Hagri enggau orang ke setanah enggau orang Hagri.

²¹Sida ngerampas ari munsuh 50,000 iku jelu unta, 250,000 iku jelu bedus, enggau 2,000 iku keledai, sereta nangkap 100,000 iku soldadu munsuh.

²²Sida munuh bala munsuh, laban perang nya endang ari peneka Allah Taala. Lalu sida majak diau di menua nya nyentuk ngagai maya sida dibuai ngagai menua bukai. [14]

²³Raban bansa Manasi Timur ngentapka diri di menua Basan nyentuk ngagai Baal Hermon, Senir, Bukit Hermon di utara. Lalu bala sida jampat mayuh tubuh.

²⁴Tu nama tuai suku raban bansa sida: Eper, Ishi, Elil, Asril, Jeremiah, Hadobiah, enggau Jahdil. Semua sida tu soldadu ti tebilang nama magang, sereta nyadi tuai suku raban bansa ti dikelala orang.

²⁵Tang orang Israel enda tetap ati ngagai Allah Taala aki ini sida, lalu sida ninggalka Iya, lalu nyembah petara bansa orang ke udah diburu Allah Taala ari menua nya.

²⁶ Nya alai, Allah Taala lalu ngasuh Raja Besai Pul ari menua Asiria (mega dikumbai Tiglat Pileser) nyerang menua sida. Iya muai raban bansa Reuben, Gat, enggau Manasi Timur ari menua sida, lalu ngasuh sida ngentapka diri belama iya di Halah, Habor, enggau di Hara, enggau semak Sungai Gosan.