Read Iban 2 Bansa Israel 1 Bible Online

2 Bansa Israel 1 - Iban bible

2 Bansa Israel 1

¹Solomon anak Raja David negapka diri megai perintah, lalu TUHAN Allah Taala merekatka iya, lalu ngasuh iya balat bekuasa.

²Raja Solomon meri pesan ngagai semua pemesai ti nyadi tuai ke seribu iku soldadu, nyadi tuai ke seratus iku, semua pemesai perintah, semua tuai bilik, enggau semua orang mayuh ti bukai,

³ngasuh sida bejalai enggau iya ngagai endur alai besembiang di Gibeon. Sida mansang ngagai Gibeon laban Langkau Kain TUHAN, ti udah digaga Moses di menua puang, bisi dia. (

⁴ Tang Peti Lampang Batu Adat di Jerusalem, disimpan dalam langkau kain ti udah didirika Raja David lebuh iya mai Peti nya ari Kiriat-jearim.)

⁵ Alta temaga ti udah digaga Besalel anak Uri, uchu Hur, bisi mega di Gibeon di mua Langkau Kain TUHAN ti Pemadu Tinggi. Solomon enggau semua orang mayuh lalu nyembah TUHAN dia.

⁶Raja ngenjuk piring ba alta temaga ti ba Langkau Kain TUHAN kena iya nyembah TUHAN. Iya ngasuh orang munuh seribu iku jelu lalu nunu jelu nya segala ba alta nya.

⁷Malam nya Allah Taala pegari di mua Solomon, lalu bejaku ngagai iya, “Pinta ari Aku sebarang utai ti dikedekaka nuan.”

⁸Ku Solomon nyaut, “Nuan seruran ngayanka pengerindu ti besai ngagai apai aku David, lalu diatu Nuan udah ngasuh aku nganti iya nyadi raja.

⁹ O TUHAN Allah Taala, awakka Nuan ngamatka semaya ti udah digaga Nuan enggau apai aku. Nuan udah ngasuh aku nyadi raja megai orang ke ngemayuh tu datai ke sida nyau enda ulih diitung agi.

¹⁰Nya alai, beri aku penemu-dalam enggau pemandai kena aku merintah sida. Enti enda, baka ni ku aku ulih merintah bala nembiak Nuan ti kering tu?”

¹¹Ku Allah Taala nyaut Solomon, “Nuan udah milih utai ti ngena. Nuan nadai minta pengaya tauka reta tengkira, tauka nama ti tebilang, tauka minta munsuh nuan dibunuh, tauka minta umur diri panjai, tang nuan udah minta penemu-dalam enggau pemandai ngambika nuan ulih merintah bala nembiak Aku ti udah diasuh Aku ibun nuan.

¹²Aku deka meri ngagai nuan penemu-dalam enggau pemandai. Lalu nambahka nya, Aku deka meri nuan mayuh agi pengaya, reta tengkira, lalu ngasuh nuan lebih agi tebilang ari semua raja bukai ke dulu tauka dudi agi ari nuan.”

¹³Solomon lalu ninggalka [1] endur alai besembiang di Gibeon, alai Langkau Kain TUHAN ti bediri, lalu pulai ngagai Jerusalem. Iya megai perintah di menua Israel ari Jerusalem.

¹⁴ Iya ngempuruka 1,400 buah kerita perang, enggau 12,000 iku kuda perang. Sekeda sida nya diengkah iya di Jerusalem, lalu sida ti bukai diengkah iya ba mayuh bengkah nengeri bukai.

¹⁵Lebuh iya megai perintah, pirak enggau emas mayuh amat di Jerusalem, datai ke sida nyau baka utai ngapa, lalu kayu sidar nyau ngemayuh kayu sikamur ba kaki bukit di menua Judah.

¹⁶ Kuda Raja Solomon dibeli iya ari menua Ejip enggau ari Kue; orang ke bedagang ngarika raja meli kuda nya ari Kue ngena rega ti dikena lebuh maya nya.

¹⁷Sida meli kerita perang ari menua Ejip, lalu udah nya nyual kerita perang nya ngagai raja orang Iti enggau raja bansa Aram ngena rega 600 singkap duit pirak ke sebuah kerita. Sida nyual siku kuda ngena rega 150 singkap duit pirak.