Read Iban 2 Bansa Israel 10 Bible Online

2 Bansa Israel 10 - Iban bible

2 Bansa Israel 10

¹Rehoboam mansang ngagai Sekem, alai semua orang ke di utara menua Israel udah begempuru, deka nyiri iya nyadi raja.

²Lebuh Jeroboam anak Nebat, ti udah rari ari Raja Solomon ngagai menua Ejip, ninga berita pasal Rehoboam, iya lalu pulai baru ngagai menua Israel.

³Raban bansa ti di utara lalu mesanka Jeroboam, lalu semua sida mansang betemu enggau Rehoboam, lalu bejaku enggau iya,

⁴“Apai nuan udah balat amat ngasuh kami gawa. Enti nuan ngasuh pengawa kami lempung agi, nya baru kami deka taluk ngagai nuan.”

⁵Ku Rehoboam nyaut, “Beri aku tiga hari alai aku berundingka utai tu. Udah nya kita datai ditu baru.” Bala sida lalu mupuk.

⁶Raja Rehoboam lalu betanya ngagai orang ke tuai, ti udah bekereja nyadi penyanding penemu ke apai iya Solomon. “Nama saut asuh kita beri aku ngagai bala orang tu?” ku iya nanya sida.

⁷Disaut sida, “Enti nuan nelap enggau orang tu lalu nguji meri sida saut ti siru, sida deka lantang ati, lalu sida deka seruran taluk ati betuaika nuan.”

⁸Tang iya enggai mendingka jaku lalau ari orang ke tuai. Iya lalu mansang ngagai orang bala orang ke sama serambau enggau iya, ke digaga iya nyadika penyanding penemu iya diatu.

⁹“Ba runding kita, nama utai ti patut dikereja aku?” ku iya nanya sida. “Nama utai ti patut disebut aku ngagai orang tu ke minta aku ngasuh pengawa sida lempung agi?”

¹⁰Ku sida nyaut, “Tu utai ti patut dipadahka nuan ngagai sida: ‘Tunjuk anak aku tu besai agi ari punggung apai aku.’

¹¹Padahka ngagai sida, ‘Apai aku udah ngasuh pengawa kita berat. Aku deka ngasuh pengawa kita lebih berat agi ari nya. Iya udah nyipat kita ngena penyipat. Aku deka nyipat kita ngena penyipat ti bedurika besi!”

¹²Tiga hari udah bekau nya Jeroboam enggau semua orang mayuh lalu mansang baru ngagai Raja Rehoboam, munyi ti udah diasuh iya.

¹³Raja Rehoboam enggai mendingka jaku lalau ari orang ke tuai, lalu iya bejaku kasar enggau orang mayuh,

¹⁴nitihka jaku lalau ari penyanding penemu ti agi biak. Ku iya, “Apai aku udah ngasuh kita ngereja pengawa ti berat. Aku deka ngasuh pengawa kita lebih berat agi ari nya. Iya udah nyipat kita ngena penyipat. Aku deka nyipat kita ngena penyipat ti bedurika besi!”

¹⁵Utai tu nyadi kena TUHAN Allah Taala ngamatka jaku ti udah disebut Iya ngagai Jeroboam anak Nebat ngena nabi Ahijah ari Siloh. Nya kebuah raja enggai mendingka orang mayuh.

¹⁶ Lebuh orang mayuh meda Raja Rehoboam enggai mendingka sida, sida lalu manjung, “Anang taluk ngagai David enggau ruang bilik iya! Nama utai ti bisi udah dikereja sida ke kitai? O Orang Israel! Aram kitai pulai! Awakka Rehoboam ngaduka diri empu!” Orang Israel lalu angkat ngelaban perintah,

¹⁷ninggalka Rehoboam nyadi raja semina ke orang ke diau di menua Judah aja.

¹⁸Udah nya Raja Rehoboam lalu ngasuh Adoniram, ti nyadi tuai ngemataka pengawa bala ulun, mansang ngagai orang Israel. Tang sida nuku iya ngena batu datai ke mati. Lebuh Rehoboam ninga nya, iya lalu beguai-guai nepan kerita perang iya lalu rari ngagai Jerusalem.

¹⁹Berengkah ari nya orang ke diau di utara menua Israel semampai ngelaban raja ke datai ari peturun David.