Read Iban 2 Bansa Israel 12 Bible Online

2 Bansa Israel 12 - Iban bible

2 Bansa Israel 12

¹Lebuh Rehoboam udah negapka diri nyadi raja, iya enggau semua nembiak iya lalu ngelengkaka Adat TUHAN.

²Dalam taun ti kelima Rehoboam nyadi raja, TUHAN ngukum sida laban sida enda taluk ngagai TUHAN. Raja Sisak menua Ejip nyerang Jerusalem

³ngena 1,200 buah kerita perang, 60,000 iku bala soldadu ke nepan kuda, enggau mayuh soldadu bukai ti enda ulih diitung, nyengkaum soldadu orang Libia, Suki-im, enggau Etiopia.

⁴Iya ngalahka nengeri ti bekuta di menua Judah, lalu nyerang nyentuk ngagai Jerusalem.

⁵Imam Semaiah lalu mansang ngagai Raja Rehoboam enggau ngagai bala tuai orang Judah ti udah begempuru di Jerusalem laban sida ngerarika diri ari Sisak. Ku iya bejaku enggau sida, “Tu pesan TUHAN ngagai kita: ‘Kita udah ninggalka Aku, nya alai diatu Aku ninggalka kita. Awakka Sisak ngalahka kita.’ ”

⁶Raja enggau bala tuai ngaku diri udah bedosa, lalu ku sida, “Utai ti dikereja TUHAN endang lurus.”

⁷Lebuh TUHAN meda nya, Iya bejaku baru enggau Semaiah. Ku Iya, “Laban sida ngaku dosa diri, Aku enggai ngerusak sida. Tang lebuh Sisak nyerang, sida semina ulih ngidupka nyawa diri aja. Jerusalem enda dirusak,

⁸tang Sisak deka ngalahka sida, lalu sida deka nemu bida entara betuaika Aku enggau betuaika raja mensia.”

⁹ Raja Sisak nyerang Jerusalem, lalu ngerampas utai ti berega ari Rumah Sembiang, enggau ari istana. Iya ngerampas semua utai, nyengkaum terabai emas ti udah digaga Raja Solomon.

¹⁰Kena iya nganti terabai nya, Rehoboam ngaga terabai temaga, lalu nyerahka utai nya ngagai pemesai ti nyadi tuai nyaga pintu istana.

¹¹Genap kali raja mansang ngagai Rumah Sembiang, bala jejaga mai terabai nya, lalu udah nya mulaika terabai nya baru ngagai bilik jejaga.

¹²Laban iya nunduk ngagai TUHAN, TUHAN enda ngerusak iya abis lengis, lalu utai di menua Judah nyadi menyana baru.

¹³Rehoboam merintah di Jerusalem lalu kuasa iya ti nyadi raja nambah-menambah. Umur iya empat puluh satu taun lebuh iya nyadi raja, lalu iya merintah tujuh belas taun di Jerusalem, nengeri ti udah dipilih TUHAN ari semua menua Israel nyadi endur alai TUHAN patut disembah. Indai Rehoboam nya Namah, ari menua Amon.

¹⁴Rehoboam ngereja utai ti jai, laban iya enggai nguji ngiga peneka TUHAN.

¹⁵Utai ti dikereja Rehoboam ari pun datai ke ujung, enggau cherita pasal ruang bilik iya tau ditemu dalam Jerita Lama Pasal Nabi Semaiah enggau Jerita Lama Pasal Nabi Ido. Rehoboam enggau Jeroboam endang seruran beperang ngelaban pangan diri.

¹⁶Rehoboam mati lalu dikuburka ba lumbung bala raja di Nengeri David, lalu anak iya Abijah nganti iya nyadi raja.