Read Iban 2 Bansa Israel 13 Bible Online

2 Bansa Israel 13 - Iban bible

2 Bansa Israel 13

¹Dalam taun ti kelapan belas Raja Jeroboam udah nyadi raja menua Israel, Abijah nyadi raja menua Judah,

²lalu iya merintah tiga taun di Jerusalem. Indai iya Mikaiah anak Uriel, ari nengeri Gibe-ah. Perang nyadi entara Abijah enggau Jeroboam.

³Abijah ngempuruka 400,000 iku bala soldadu, lalu Jeroboam nyatup iya ngena 800,000 iku soldadu.

⁴Soldadu dua bengkah nya lalu besatup ba menua ti bebukit di menua Epraim. Raja Abijah niki ngagai Bukit Semaraim lalu ngangauka Jeroboam enggau orang Israel: “Pendingka aku!” ku iya bejaku.

⁵“Kati kita enda nemu, TUHAN Allah Taala ke disembah orang Israel udah ngaga sempekat ti enda tau dilanggar enggau David, kena Iya meri David enggau peturun iya kuasa nyadi raja menua Israel belama iya?

⁶Jeroboam anak Nebat udah angkat ngelaban Solomon, raja iya empu.

⁷Udah nya iya ngempuruka seraban orang ke nadai guna, lalu sida ngalahka Rehoboam ti agi kelalu biak sereta nadai peneleba, lalu iya enda ulih ngelaban sida.

⁸Diatu kita nguji beperang ngelaban kuasa diraja ti udah diberi TUHAN ngagai peturun David. Bala soldadu kita amat mayuh, lalu kita mai mayuh anak sapi ti lelaki ti udah digaga Jeroboam ari emas nyadika petara kita.

⁹Kita udah muru bala imam TUHAN, bala peturun Aron, lalu kita udah muru orang Lewi. Kita udah nganti sida ngena bala imam ke diletak kita ngena chara orang bansa bukai. Barang sapa datai mai sapi ti lelaki tauka tujuh iku jelu bedus, tau nuchi diri empu nyadi imam ke utai ti dikumbai kita petara.

¹⁰“Tang kami mengkang betuaika TUHAN Allah Taala kami, lalu enda ninggalka Iya. Imam ke datai ari peturun Aron ngereja pengawa sida, ditulung orang Lewi.

¹¹Genap pagi enggau genap lemai sida meri TUHAN menyan enggau piring jelu ti ditunu segala. Sida ngenjuk piring ba mija ti tuchi, lalu genap lemai sida nungkun lampu ba penuduk lampu ti digaga ari emas. Kami ngereja utai ti udah diasuh TUHAN kereja kami, tang kita udah ninggalka Iya.

¹²Allah Taala Empu nyadi tuai kami, lalu bala imam Iya bisi ditu mai terumpit sida, sedia deka nyepu terumpit sida nesau kami mansang beperang ngelaban kita. Kita orang Israel! Anang ngelaban TUHAN Allah Taala aki ini kita! Kita enda ulih menang!”

¹³Lebuh maya nya Jeroboam udah ngasuh sekeda bala soldadu iya ngeramka ipa laban sida deka nyerang bala soldadu orang Judah ari belakang, lalu bala soldadu sida ti bukai nyatup sida ari mua.

¹⁴Orang Judah malik lalu meda diri nyau dikelulung munsuh. Sida lalu nyabak ngangauka TUHAN minta saup Iya, lalu bala imam nyepu terumpit sida.

¹⁵Orang Judah, diuluka Abijah manjung lalu nyerang. Allah Taala ngalahka Jeroboam enggau bala soldadu orang Israel.

¹⁶Orang Israel rari, lalu Allah Taala nejuka orang Judah ngalahka sida.

¹⁷Abijah enggau bala soldadu iya balat amat ngalahka orang Israel. Setengah juta bala soldadu Israel ti kering dibunuh.

¹⁸Nya alai orang Judah menang ngelaban orang Israel, laban sida manggaika pengarap sida ba TUHAN Allah Taala aki ini sida.

¹⁹Abijah lalu begagaika bala soldadu Jeroboam, lalu nguan sekeda nengeri iya, iya nya, Betel, Jesanah, enggau Epron, enggau genturung pendiau ti semak nengeri nya.

²⁰Jeroboam nadai ulih bekuasa agi lebuh Abijah nyadi raja. Ke pengujung iya, TUHAN munuh iya, lalu iya mati.

²¹Tang Abijah, mansang kering-sekering. Iya bisi empat belas iku bini, lalu iya bisi dua puluh dua iku anak lelaki, enggau enam belas iku anak indu.

²²Cherita lama pasal Abijah, utai ti disebut iya, enggau utai ti dikereja iya, bisi dituliska magang dalam Jerita Lama Pasal Nabi Ido.