Read Iban 2 Bansa Israel 15 Bible Online

2 Bansa Israel 15 - Iban bible

2 Bansa Israel 15

¹Roh Allah Taala bekuasa ba Asariah anak Odet.

²Asariah lalu mansang ngagai Raja Asa. Ku iya ngangau, “Pendingka aku ulih kita, Raja Asa, enggau semua orang Judah enggau orang Benjamin! TUHAN bisi enggau kita, seagi-agi kita meruan enggau Iya. Enti kita ngiga Iya, Iya deka ngasuh kita nemu Iya, tang enti kita ninggalka Iya, Iya deka ngelengkaka kita.

³Orang Israel lama udah nadai nyembah Allah Taala ti bendar, nadai imam ngajar, nadai adat.

⁴Tang lebuh sida dituntung penusah, sida nguingka diri ngagai TUHAN Allah Taala ke disembah orang Israel. Sida ngiga Iya lalu nemu Iya.

⁵Lebuh maya nya menya, orang nadai likun lebuh sida tama-pansut, laban menua balat dituntung pengachau enggau penyarut.

⁶Bansa siti nekanka pengidup bansa siti, lalu nengeri siti nekanka pengidup orang di nengeri siti, laban Allah Taala ngasuh penusah enggau pemerinsa ninggang sida.

⁷Tang kita enda tau enda kering, lalu anang lemi semengat. Kita deka nerima upah ke pengawa ti dikereja kita.”

⁸Lebuh Asa ninga jaku ti benabi nya, jaku ti dipansutka Asariah anak [14] Odet, iya berasai diperansang. Iya lalu muai semua engkeramba di menua Judah enggau Benjamin, enggau semua engkeramba dalam nengeri ti udah dialahka iya di menua ti bebukit di menua Epraim. Iya mega ngaduka alta TUHAN ti bediri ba tengah laman Rumah Sembiang.

⁹Mayuh orang ari Epraim, Manasi, enggau Simeon udah ngalih ari Asa, lalu diau di menua ti diperintah iya, laban sida meda TUHAN bisi enggau iya. Asa mesanka semua sida, enggau orang ari menua Judah enggau Benjamin.

¹⁰Sida begempuru di Jerusalem dalam bulan ti ketiga, dalam taun ti kelima belas Asa nyadi raja.

¹¹Ba hari nya sida ngenjuk piring ngagai TUHAN ari perapasan ti udah dibai sida pulai, iya nya, tujuh ratus iku sapi, enggau tujuh ribu iku bedus.

¹²Sida ngaga siti sempekat madahka diri besetuju deka nyembah TUHAN Allah Taala aki ini sida, enggau pengabis ati enggau semengat sida.

¹³Barang sapa enda nyembah TUHAN, nemuka orang nya biak tauka tuai, lelaki tauka indu, deka bunuh.

¹⁴Sida lalu besumpah dalam nama TUHAN enggau nyawa ti inggar madahka diri deka nitihka sempekat nya. Udah nya sida manjung lalu nyepu terumpit.

¹⁵Semua orang di menua Judah lantang ati magang laban sida udah ngaga sempekat nya enggau pengabis ati sida. Sida gaga ati nyembah TUHAN, lalu Iya nerima sida, lalu ngasuh serata menua nya likun.

¹⁶Raja Asa lalu muai ini iya Maakah ari pangkat iya ti nyadi indai kuin, laban ini iya udah ngaga engkeramba ke petara indu Aserah. Asa nebang engkeramba nya, mepat iya, lalu nunu repik iya ba Lebak Kidron.

¹⁷Taja pen Asa enda ngerusak semua endur alai orang kapir nyembah petara sida, iya mengkang tetap ati ngagai TUHAN sepemanjai umur iya.

¹⁸Iya ngengkahka dalam Rumah Sembiang semua utai ti udah diserahka apai iya Abijah ngagai Allah Taala, sereta enggau utai ti digaga ari emas enggau ari pirak ti udah diserahka iya empu.

¹⁹Perang nadai agi nyadi nyentuk ngagai ketiga puluh lima taun iya nyadi raja.