Read Iban 2 Bansa Israel 16 Bible Online

2 Bansa Israel 16 - Iban bible

2 Bansa Israel 16

¹Dalam taun ti ketiga puluh enam Raja Asa megai perintah di menua Judah, Raja Baasa menua Israel nyerang menua Judah lalu belabuh nguta nengeri Ramah kena mempang jalai semua orang ke tama-pansut ari menua Judah.

²Nya alai Asa lalu ngambi pirak enggau emas ari sarang reta Rumah Sembiang, enggau ari istana, lalu ngirumka utai nya ngagai Damaskus, ngagai Raja Benhadat menua Siria, sama enggau pesan tu:

³“Awakka kitai beserakup baka apai kitai suba. Pirak enggau emas tu diberi ngagai nuan. Nya alai, putuska kaul nuan enggau Raja Baasa menua Israel, ngambika iya nyurutka diri ari menua aku.”

⁴Benhadat besetuju enggau penemu Asa, lalu iya ngasuh bala pemesai enggau bala soldadu iya nyerang nengeri di menua Israel. Sida ngalahka Ijon, Dan, Abel Bet-maakah, enggau semua nengeri di menua Naptali alai pemakai disimpan.

⁵Lebuh Raja Baasa ninga utai ti nyadi, iya lalu badu agi nguta Ramah, lalu ngelengkaka pengawa nya.

⁶Udah nya Raja Asa ngempuruka bala iya ari serata menua Judah, lalu ngasuh sida mai batu enggau ramu ti udah dikena Baasa nguta nengeri Ramah, lalu nguta nengeri Geba enggau Mispah ngena batu nya.

⁷Lebuh maya nya, nabi Hanani mansang ngagai Raja Asa. Ku iya, “Laban nuan ngarapka Raja menua Siria, lalu enda ngarapka TUHAN Allah Taala nuan, bala soldadu raja menua Israel [15] udah ulih ngerarika diri ari nuan.

⁸Ukai enda orang Etiopia enggau orang Libia mayuh agi soldadu, enggau mayuh kerita perang enggau soldadu ke nepan kuda? Tang laban nuan udah manggaika pengarap nuan ba TUHAN, Iya udah ngasuh nuan menang ngelaban sida.

⁹TUHAN ngemataka semua dunya, lalu meri pengering ngagai orang ke taluk ngagai Iya. Tang nuan udah ngereja utai ti beli. Nya alai, kenyau ari diatu nuan deka seruran beperang.”

¹⁰Jaku nya ngasuh Asa balat amat ringat ngagai nabi Hanani lalu iya nanchang nabi Hanani ngena rantai dalam rumah jil. Tu meh maya Asa belabuh merinsaka sekeda nembiak iya.

¹¹Semua utai ti nyadi lebuh Asa megai perintah, kenyau ari pun datai ke ujung, bisi dituliska magang dalam Jerita Lama Pasal Raja Menua Judah Enggau Raja Menua Israel.

¹²Dalam taun ti ketiga puluh semilan Asa nyadi raja, iya enda ulih bejalai laban kaki iya balat diempa penyakit. Tang iya enda minta saup ari TUHAN, tang minta saup ari lutur.

¹³Dua taun udah bekau nya, iya mati

¹⁴lalu dikuburka dalam kubur batu ti udah ditebuk iya ke iya empu di nengeri David. Sida nyendiaka bangkai iya ngena rempah enggau minyak wangi sebedau iya dikuburka, lalu sida ngidupka api ti mau kena sida ngulitka iya.