Read Iban 2 Bansa Israel 17 Bible Online

2 Bansa Israel 17 - Iban bible

2 Bansa Israel 17

¹Jehosapat lalu nganti apai iya Asa nyadi raja, lalu iya ngeringka diri ngelaban Israel.

²Iya ngasuh bala soldadu nyaga nengeri ti bekuta di menua Judah, di menua pesisir, enggau nengeri ti udah dialahka Asa di menua Epraim.

³TUHAN merekatka Jehosapat laban iya neladan apai iya, lalu enda nyembah Baal.

⁴Iya betuaika Allah Taala ti disembah apai iya, ngasika pesan Allah Taala, lalu enda ngereja utai ti dikereja sida raja menua Israel.

⁵TUHAN negapka perintah Jehosapat di menua Judah, lalu semua orang mai pemeri ngagai iya, nya alai iya nyadi kaya sereta balat dibasa orang.

⁶Iya gaga ati betuaika TUHAN lalu ngerusak semua endur alai orang kapir nyembah petara sida di menua Judah, enggau tanda petara indu Aserah di menua nya.

⁷Dalam taun ti ketiga iya nyadi raja, iya ngasuh bala pemesai, iya nya Benhail, Obadiah, Sekariah, Netanel, enggau Mikaiah, ngajar ba sebelah nengeri di menua Judah.

⁸Sida nya disempulang semilan iku orang Lewi ke benama Semaiah, Netaniah, Sebadiah, Asahel, Semiramot, Jehonatan, Adonijah, Tobijah, enggau Tobadonijah. Lalu imam ke enggau sida nya Elisama seduai Jehoram.

⁹Sida mai Bup Adat TUHAN, lalu bejalai nengah semua nengeri di menua Judah, ngajar Adat TUHAN ngagai orang mayuh.

¹⁰TUHAN ngasuh semua perintah ti ngelingi Raja Jehosapat takut nyerang iya.

¹¹Sekeda orang Pilistin mai mayuh pirak enggau pemeri bukai ngagai Jehosapat, lalu sekeda orang Arab mai 7,700 iku bedus enggau 7,700 iku kambin ngagai iya.

¹²Nya alai kuasa Jehosapat nambah-menambah. Iya begagaka kuta enggau nengeri di serata menua Judah,

¹³alai nyimpan pemakai. Iya ngasuh pemesai ti tebilang nama nyaga Jerusalem,

¹⁴nitihka ripih raban peturun sida. Orang ke nyadi tuai soldadu ari raban peturun Judah nya Adnah. Iya bisi 300,000 iku soldadu dipegai iya.

¹⁵Pemesai ke lumur dua nya Jehohanan. Iya bisi 280,000 iku soldadu,

¹⁶lalu tuai soldadu ke lumur tiga nya Amasiah anak Sikri. Iya bisi 200,000 iku soldadu. (Amasiah udah nyerahka diri bekereja ke TUHAN.)

¹⁷Tuai soldadu ari raban peturun ti diturunka Benjamin nya Eliada. Iya tu orang ke tebilang nama. Iya nguluka 200,000 iku soldadu ke besenyataka terabai enggau panah.

¹⁸Tuai soldadu ke lumur dua iya nya Jehosabat. Bala iya 180,000 iku. Semua sida nya udah chukup disikap enggau senyata kena beperang.

¹⁹Bala soldadu tu bekereja ke raja di Jerusalem. Nambahka nya, raja mega ngasuh soldadu ti bukai nyaga nengeri ti bukai ti bekuta di menua Judah.