Read Iban 2 Bansa Israel 18 Bible Online

2 Bansa Israel 18 - Iban bible

2 Bansa Israel 18

¹Lebuh Raja Jehosapat menua Judah nyau nyadi kaya sereta tebilang nama, iya ngatur siku orang ari ruang bilik iya jadi enggau siku orang ari ruang bilik Raja Ahap menua Israel.

²Berapa taun udah bekau nya, Jehosapat nemuai ngagai Raja Ahap di nengeri Samaria. Kena Ahap masa Jehosapat enggau orang ke datai enggau iya, Ahap ngasuh orang munuh berapa iku jelu bedus enggau sapi kena nyendiaka pengerami makai besai. Iya nguji ngumbuk Jehosapat enggau iya nyerang nengeri Ramot-giliat.

³Ku Raja Ahap nanya, “Kati nuan deka enggau aku nyerang Ramot?” Ku Jehosapat nyaut, “Aku sedia, enti nuan sedia. Bala soldadu aku mega sedia. Kami sigi deka enggau nuan.”

⁴Lalu ku Raja Jehosapat nampung jaku iya, “Tang manah kitai betanya ngagai TUHAN dulu.”

⁵Nya alai Ahap mesanka bala nabi, kira empat ratus iku semua sida, lalu ku iya nanya sida, “Kati patut tauka enda aku nyerang Ramot?” “Serang aja meh nengeri nya,” ku sida nabi nyaut. “Allah Taala deka ngasuh nuan menang.”

⁶Tang ku Jehosapat nanya Ahap, “Kati nuan nadai agi nabi bukai ti tau dikena kitai betanya ngagai TUHAN?”

⁷Ku Ahap nyaut, “Bisi, Mikaiah ari Imlah. Tang aku begedika iya laban iya nadai kala benabika utai ti manah ke aku, seruran utai ti jai.” “Nuan enda tau bejaku munyi nya!” ku Jehosapat nyaut.

⁸Ahap lalu mesanka siku pemesai, lalu ngasuh iya ngambi nabi Mikaiah enggau jampat.

⁹Raja dua iku nya duduk ba kerusi diraja seduai iya, ngena pekayan raja, ba endur alai orang ngindik gandum ari luar pintu nengeri Samaria, lalu semua nabi benabi di mua seduai iya.

¹⁰Siku ari bala nabi nya, Sedekiah anak Chenaana, ngaga tanduk besi, lalu bejaku enggau Ahap, “Tu utai ti disebut TUHAN, ‘Nuan deka ngena utai tu ngelaban orang Siria, lalu nuan deka ngalahka semua sida.’ ”

¹¹Semua nabi ti bukai bela nyebut nya magang. “Serang meh Ramot-giliat. Nuan deka menang,” ku sida. “TUHAN deka ngasuh nuan menang.”

¹²Nyadi ba urung maya nya, pemesai ti udah mansang ngambi Mikaiah, benung madahka ngagai Mikaiah, “Semua bala nabi ti bukai udah benabi madahka raja deka mujur. Nya alai manah nuan benabi baka nya mega.”

¹³Tang ku Mikaiah nyaut, “Dalam nama Allah Taala ti idup, aku semina nyebut utai ti diasuh Allah Taala sebut aku!”

¹⁴Lebuh iya bediri di mua Raja Ahap, raja lalu nanya iya, “Mikaiah, kati patut tauka enda kami duai Raja Jehosapat nyerang Ramot-giliat?” “Patut” ku Mikaiah nyaut. “Nuan endang tetap deka menang. TUHAN deka ngasuh nuan menang.”

¹⁵Tang ku Ahap nyaut, “Berapa kali aku enda tau enda ngasuh nuan nyebut utai ti bendar dalam nama TUHAN?”

¹⁶ Mikaiah lalu bejaku, “Aku meda bala soldadu orang Israel ngachir ba sebelah bukit, baka bedus ti nadai orang ngibun. Lalu ku TUHAN bejaku, ‘Bala orang tu nadai orang ngulu. Awakka sida pulai enggau selamat.’ ”

¹⁷Ahap lalu bejaku enggau Jehosapat, “Nya utai ti dipadahka aku ngagai nuan. Iya endang nadai kala benabika utai ti manah pasal aku, seruran utai ti jai!”

¹⁸Mikaiah lalu bejaku, “Diatu pendingka utai ti disebut TUHAN! Aku udah meda TUHAN duduk ba kerusi diraja Iya di serega, lalu bala melikat Iya bediri ari kanan enggau ari kiba Iya.

¹⁹Lalu ku TUHAN bejaku, ‘Sapa deka nipu Ahap ngambika iya nyerang lalu alah di Ramot-giliat?’ Sekeda melikat lalu nyebut tu, sekeda nyebut nya.

²⁰Udah nya siku roh mansang ngagai TUHAN, lalu bejaku, ‘Awakka aku nipu iya.’ TUHAN lalu nanya iya, ‘Baka ni?’

²¹Ku roh nya nyaut, ‘Aku deka mupuk lalu ngasuh semua bala nabi ke bekereja ke Ahap madahka utai ti bula.’ TUHAN lalu bejaku, ‘Mupuk meh nuan lalu tipu iya. Nuan deka mujur.’

²²Nya alai TUHAN udah ngengkahka siku roh pemula dalam nyawa bala nabi nuan; TUHAN udah ngeletak nuan deka dituntung penusah!”

²³Nabi Sedekiah anak Chenaana lalu niki ngagai Mikaiah, nampar mua iya, lalu nanya, “Kemaya Roh TUHAN udah kala ninggalka aku lalu bejaku enggau nuan?”

²⁴Disaut Mikaiah, “Nuan deka nemu nya lebuh nuan tama ngaga bilik belakang mansang ngelalaika diri.”

²⁵Raja Ahap lalu bejaku, “Tangkap Mikaiah, lalu asuh iya pulai ngagai Amon, tuan gabenor nengeri, enggau ngagai Joas.

²⁶Asuh sida nutup iya dalam rumah jil, lalu meri iya semina roti enggau ai aja, nyentuk ngagai maya aku pulai kitu baru enggau selamat.”

²⁷Ku Mikaiah bejaku, “ Enti nuan pulai enggau selamat, nya deka nunjukka TUHAN nadai bejaku ngena aku!” Lalu ku Mikaiah nambahka jaku iya, “Dinga nya, semua kita!”

²⁸Udah nya Raja Ahap menua Israel enggau Raja Jehosapat menua Judah lalu mansang nyerang nengeri Ramot-giliat.

²⁹Ku Ahap bejaku enggau Jehosapat, “Lebuh kitai nyerang, aku deka ngeluluka diri baka orang bukai, tang nuan ngena pekayan raja.” Nya alai raja menua Israel mansang beperang enda ngena pekayan raja.

³⁰Nyadi raja menua Siria udah bejaku enggau bala tuai soldadu ke nepan kerita perang, enda ngasuh sida nyerang orang bukai, tang semina raja orang Israel aja.

³¹Nya alai, lebuh orang Siria meda Raja Jehosapat, semua sida ngumbai iya raja orang Israel. Sida lalu nyerang iya. Tang Jehosapat nyerauh, lalu TUHAN Allah Taala nulung iya. Allah Taala lalu nguingka orang Siria ari iya.

³²Bala tuai kerita perang lalu nemu iya ukai raja orang Israel. Nya alai sida lalu badu agi ngagai iya.

³³Tang lebuh siku soldadu orang Siria nimbakka laja, laja nya kena ba sambung baju kebal Raja Ahap. “Bakal aku!” ku iya ngangau ngagai orang ke ngemudika kerita perang iya. “Putarka kerita tu ditu, anang agi enggau orang belaban!”

³⁴Lebuh bala orang agi benung belaban, Raja Ahap nyandih dalam kerita perang iya, merening tunga ngagai orang Siria. Lalu iya mati lebuh padam mata panas lemai nya.