Read Iban 2 Bansa Israel 19 Bible Online

2 Bansa Israel 19 - Iban bible

2 Bansa Israel 19

¹Lebuh Raja Jehosapat menua Judah pulai enggau selamat ngagai istana iya di Jerusalem,

²siku nabi ke benama Jehu anak Hanani, mansang betemu enggau raja, lalu ku iya bejaku enggau raja, “Kati nuan ngumbai diri ngereja utai ti ngena nulung orang ke jai, lalu setanah enggau orang ke begedika TUHAN? Utai ti dikereja nuan udah nyungkak TUHAN ringat.

³Tang taja pia, nuan bisi pemadas ba nuan empu. Nuan udah muai semua tanda petara indu Aserah ti disembah orang mayuh, lalu nuan udah nguji nitihka peneka Allah Taala.”

⁴Taja pen Raja Jehosapat diau di Jerusalem, tang iya selalu bejalai nemuai ngagai orang mayuh, kenyau ari Beer-seba di selatan nyentuk ngagai tisi menua ti bebukit di menua Epraim di utara, laban iya deka mai orang mayuh pulai baru ngagai TUHAN Allah Taala aki ini sida.

⁵Iya ngeletak orang nyadi pengulu dalam siti-siti nengeri ti bekuta di menua Judah,

⁶lalu meri jaku ajar ngagai sida munyi tu, “Bejimat kita lebuh kita ngatur pechara. Kita ukai ngakim ngena kuasa mensia, tang ngena kuasa TUHAN, lalu Iya bisi enggau kita lebuh kita meri ukum.

⁷Nangika TUHAN, lalu bejimat lebuh kita ngakim, laban TUHAN Allah Taala kitai enggai meda orang meri atur ti enda lurus, tauka bepilih mata, tauka makai suap.”

⁸Jehosapat mega ngeletak di Jerusalem sekeda orang Lewi, imam enggau tuai ruang bilik orang Israel, ngasuh sida ngakim ngarika TUHAN, lalu mutarka laya entara orang Israel. Opis sida di Jerusalem.

⁹Ku iya bejaku ngagai sida, “Kita enda tau enda nangika TUHAN, tetap ati ngagai Iya enggau pengabis ati kita;

¹⁰Genap kali orang ari bansa kita empu datai ari nengeri bukai mai ngagai kita pekara pasal orang ke udah munuh orang, tauka pasal adat, tauka pesan, atur tauka adat, kita enda tau enda ngajar sida, ngambika sida enda ngereja penyalah enggai ke TUHAN ringat ngagai kita enggau ngagai kaban belayan kita. Kereja nya ulih kita, nya baru kita enda ngereja utai ti salah.

¹¹Imam Besai Amariah udah diberi aku kuasa nyadi tuai kita ngatur semua pekara TUHAN, lalu Sebadiah anak Ismail, ti nyadi tuan gabenor menua Judah, deka ngatur semua pekara raja, lalu orang Lewi deka bekereja ke kita nyadi pemesai kita. Kereja pengawa kita enggau ati ti berani. Awakka TUHAN setanah enggau orang ke ngereja utai ti ngena!”