Read Iban 2 Bansa Israel 2 Bible Online

2 Bansa Israel 2 - Iban bible

2 Bansa Israel 2

¹Raja Solomon lalu mutuska runding deka ngaga Rumah Sembiang, enggau ngaga sebuah istana ke iya empu.

²Iya ngasuh 70,000 iku orang ngangkut barang kena ngaga rumah nya, enggau 80,000 iku ningkuh batu ba menua ti bebukit, dikemataka 3,600 iku mandur.

³Solomon ngirumka pesan tu ngagai Raja Hiram di Tire: “Dulu menya nuan bekaul enggau apai aku David, lalu nuan ngirumka kayu sidar ngagai iya kena iya ngaga rumah iya empu.

⁴Aku diatu baru deka ngaga sebuah Rumah Sembiang kena ngemesaika TUHAN Allah Taala aku. Rumah nya deka nyadi endur ti kudus alai bala nembiak aku enggau aku empu nyembah TUHAN, betunuka menyan ti digaga ari rempah ti bebau rengut, endur alai kami deka seruran meri roti ti kudus nyadika piring kami, ngenjuk piring tunu genap pagi lemai, enggau lebuh Hari Sabat, lebuh Gawai Anak Bulan, enggau ba mayuh bengkah hari ti kudus kena kami ngemesaika TUHAN Allah Taala kami, munyi ti udah diasuh TUHAN kereja orang Israel belama iya.

⁵Aku deka ngaga Rumah Sembiang ti besai, laban Allah Taala kami besai agi kuasa ari petara bukai.

⁶ Tang iya ti bendar, nadai orang ulih ngaga rumah ke Allah Taala. Indah semua langit luar deh enda ulih ngundan Iya. Nya alai, Rumah Sembiang ti deka digaga aku nya semina nyadi endur alai betunuka menyan ke Allah Taala.

⁷Nya alai kirumka ngagai aku siku orang ke landik ngukir, landik bekereja ngena emas, pirak, temaga, enggau besi, landik begagaka kain ti biru, ungu enggau mirah. Iya deka bekereja sama enggau bala tukang tempa ti udah dipilih apai aku ari menua Judah enggau ari Jerusalem.

⁸Aku nemu bala nuan endang landik beramu. Nya alai, kirumka lumpung kayu sidar, saipris, enggau juniper ari Lebanon. Aku sedia deka ngirumka bala aku nulung bala nuan

⁹nyendiaka kayu ramu enggau naka pemayuh, laban Rumah Sembiang ti deka digaga aku nya besai sereta manah tukuh.

¹⁰Aku deka ngirumka bekal ke bala nuan: 2,000 tan gandum, 2,000 tan barli, 400,000 liter wain, enggau 400,000 liter minyak kana.”

¹¹Raja Hiram lalu ngirumka saut iya ngagai Solomon. Ku iya nulis, “Laban TUHAN rinduka bala nembiak Iya, Iya udah ngasuh nuan nyadi raja sida.

¹²Pujika TUHAN Allah Taala ke disembah orang Israel ti udah ngaga langit enggau dunya! Iya udah meri ngagai Raja David anak ti bepenemu-dalam, ke penuh laban pemereti ati enggau pengelandik, ke bekira deka ngaga sebuah Rumah Sembiang TUHAN, enggau sebuah istana ke iya empu.

¹³Aku ngirumka ngagai nuan siku tukang besi ke pandai sereta landik. Nama iya Huram.

¹⁴Indai iya ari raban bansa Dan, lalu apai iya endang asal ari nengeri Tire. Iya nemu begagaka utai ari emas, pirak, temaga, ari besi, batu enggau ari kayu. Iya nemu begagaka utai ari kain ti biru, ungu enggau kain ti mirah, enggau ari linin. Iya nemu ngaga sebarang macham ukir, lalu ulih nitihka sebarang pelan ti diasuh titihka iya. Awakka iya sama bekereja enggau bala nuan ti landik, sereta enggau bala orang ke udah bekereja ke apai nuan, Raja David.

¹⁵Nya alai, kirumka kitu gandum, barli, wain, enggau minyak kana ti udah disemaya nuan.

¹⁶Kami deka nebang ba Bukit Lebanon semua kayu sidar ti dipeguna nuan, ngaga kayu nya nyadi akit, lalu beraratka akit nya nengah tasik nyentuk ngagai Jopa. Ari nya nuan tau mai kayu nya ngagai Jerusalem.”

¹⁷Raja Solomon ngitung tubuh semua orang bansa bukai ke diau di menua Israel, baka ke udah dikereja apai iya David. Pemayuh orang bansa bukai ke diau di menua nya: 153,000 iku.

¹⁸Tujuh puluh ribu iku ari bala sida nya diasuh iya ngangkut barang kena begagaka Rumah Sembiang, 80,000 iku ningkuh batu ba bukit, lalu ngasuh 3,600 nyadi mandur ngambika pengawa nya mujur dikereja.