Read Iban 2 Bansa Israel 20 Bible Online

2 Bansa Israel 20 - Iban bible

2 Bansa Israel 20

¹Nyau kelama udah bekau nya, bala soldadu orang Moap enggau Amon, enggau bansa bukai ke setanah enggau sida, iya nya orang bansa Meun, [16] nyerang menua Judah.

²Sekeda bala seruan datai lalu madah ngagai Raja Jehosapat: “Mayuh amat bala soldadu ari Edom udah datai ari tebing seberai Tasik Mati deka nyerang nuan. Sida udah ngalahka Hasason-tamar.” (Tu siti agi nama ke nengeri En-gedi.)

³Jehosapat lalu takut, lalu iya besampi ngagai TUHAN minta TUHAN ngiring Iya. Udah nya iya lalu meri atur ngasuh semua orang di menua nya bepasa magang.

⁴Orang datai ari semua nengeri dalam menua Judah ngagai Jerusalem minta TUHAN ngiring sida,

⁵lalu semua sida, enggau semua orang Jerusalem begempuru ba tengah laman ti baru ba Rumah Sembiang. Raja Jehosapat mansang lalu bediri di mua sida

⁶lalu besampi, “O TUHAN Allah Taala aki ini kami, Nuan merintah di serega, atas semua bansa ti di dunya tu. Nuan bekuasa sereta kering, lalu nadai orang ulih ngelaban Nuan.

⁷ Nuan endang Allah Taala kami. Lebuh bala nembiak Nuan Israel pindah ngagai menua tu, Nuan muru orang ke diau di menua tu, lalu meri menua tu ngagai bala peturun pangan Nuan Abraham, nyadika pesaka sida belama iya.

⁸Sida udah diau ditu, lalu udah ngaga Rumah Sembiang kena sida ngemesaika Nuan, laban sida nemu,

⁹enti penusah ti besai bisi ninggang sida kena Nuan ngukum sida, baka perang, penyakit ti berampit, tauka lapar pungkang, sida tau datai lalu bediri di mua Rumah Sembiang tu alai Nuan ke disembah. Sida tau besampi ngagai Nuan lebuh sida kena laban penusah, lalu Nuan deka ningaka sida, lalu ngidupka sida.

¹⁰ “Diatu, orang Amon, Moap enggau Edom udah datai deka nyerang kami. Lebuh bala aki ini kami pansut ari menua Ejip, Nuan enda nyagi sida tama ngagai menua bansa orang nya. Nya alai bala aki ini kami bejalai ngelaungka sida, lalu enda ngerusak sida.

¹¹Diatu peda Nuan jalai sida malas pemanah kami. Sida datai deka muru kami ari menua ti udah diberi Nuan ngagai kami.

¹²O Allah Taala kami! Ukum meh sida, laban kami tu nadai daya ngelaban bala soldadu ti ngemayuh nya nyerang kami. Kami enda nemu utai ti patut dikereja kami, tang kami minta Nuan nulung kami.”

¹³Semua orang Judah, sama enggau bini enggau anak sida, bediri magang dia di mua Rumah Sembiang.

¹⁴Roh TUHAN lalu datai ngagai siku orang Lewi ke bisi dalam tekang bala. Nama orang nya Jahasil anak Sekariah. Iya datai ari raban peturun Asap, nengah Mataniah, Jeiel, enggau Benaiah.

¹⁵ Ku Jahasil bejaku, “Tuan Raja, enggau semua kitai orang Judah ke di Jerusalem! TUHAN madahka kita enda tau lemi semengat, tauka takut nyatup bala soldadu ti mayuh nya. Perang tu perang Allah Taala, ukai perang kita.

¹⁶Serang sida pagila lebuh sida niki genting tanah ba Sis. Kita deka besatup enggau sida ba ujung lebak ti nuju ngagai menua puang semak Jeruel.

¹⁷ Perang tu ukai perang kita. Belatur aja, lalu diau jenuh nengkilaka TUHAN menang beperang ngarika kita orang Judah enggau ngarika Jerusalem. Anang takut tauka tusah ati. Mansang ngelaban sida pagila; TUHAN deka enggau kita.”

¹⁸Udah nya Raja Jehosapat nyungkurka diri ke tanah, lalu semua orang Judah enggau orang ke diau di Jerusalem bela nyungkurka diri nyembah TUHAN.

¹⁹Orang Lewi ke ari raban peturun Kohat enggau Korah bediri, lalu manjung muji TUHAN Allah Taala ke disembah orang Israel.

²⁰Tumu pagi hari siti, sida mansang ngagai menua puang semak Tekoa. Lebuh sida mupuk, Jehosapat bejaku enggau sida, “Orang Judah enggau orang Jerusalem! Arapka TUHAN Allah Taala kita, nya baru kita tan ngelaban munsuh. Arapka utai ti disebut sida nabi Iya.”

²¹Lebuh raja udah betanya ngagai orang mayuh, iya lalu ngasuh sekeda orang ke nebah musik ngerasukka baju panjai ti dikena sida ngereja pengawa ti kudus, lalu bejalai dulu ari bala soldadu, sereta belagu: “Pujika TUHAN. Pengerindu Iya meruan belama iya!”

²²Lebuh sida belabuh belagu, TUHAN lalu ngeramka ipa lalu nyerang orang Amon, orang Moap enggau orang Edom ke datai nyerang orang Judah, lalu bala munsuh nya rari.

²³Laban orang Amon enggau orang Moap nyerang orang Edom, ngeluska semua sida. Lebuh sida udah ngeluska orang Edom, sida lalu bebunuh diri sama diri.

²⁴Lebuh bala orang Judah datai ba siti menara jejaga di menua puang, sida malik ngagai bala munsuh lalu meda bangkai munsuh betegaring ba sebelah tanah. Nadai siku sida ulih ngerarika diri.

²⁵Lebuh Jehosapat enggau bala soldadu iya mansang ngambi perapasan, sida tetemuka mayuh amat jelu sapi [17] pemakai, gari, enggau barang ti berega. Sida begumpulka perapasan nya tiga hari. Tang utai nya kelalu mayuh, datai ke sida nyau enda ulih mai semua utai nya.

²⁶Ba hari ti keempat, sida lalu begempuru ba Lebak Berakah, lalu muji TUHAN ketegal semua utai ti udah dikereja Iya. Nya kebuah lebak nya dikumbai “Lebak Barakah.” [18]

²⁷Jehosapat nguluka bala soldadu iya pulai menang ngagai Jerusalem, laban TUHAN udah ngalahka munsuh sida.

²⁸Lebuh sida datai di Jerusalem, sida mansang ngagai Rumah Sembiang, diumba ngena munyi belikan enggau terumpit.

²⁹Semua bansa ti ninga chara TUHAN udah ngalahka bala munsuh orang Israel, takut magang.

³⁰Nya alai menua nadai agi pengachau lebuh Jehosapat megai perintah, lalu Allah Taala ngasuh semua menua nya likun.

³¹Jehosapat berengkah nyadi raja menua Judah lebuh umur iya tiga puluh lima taun, lalu iya merintah di Jerusalem dua puluh lima taun. Indai iya Asubah anak Silhi.

³²Baka apai iya ke dulu ari iya, iya ngereja utai ti ngena di mua TUHAN;

³³Tang endur alai orang kapir nyembah petara sida, enda dirusak. Orang Judah enda nyembah Allah Taala aki ini sida enggau pengabis ati sida.

³⁴Semua utai bukai ti udah dikereja Jehosapat, kenyau ari pun nyentuk ngagai pengujung perintah iya, bisi dituliska magang dalam Jerita Lama Pasal Jehu Anak Hanani, siti ari Jerita Lama Pasal Raja Menua Israel.

³⁵Raja Jehosapat udah sekali beserakup enggau Raja Ahasiah menua Israel, ti udah ngereja mayuh macham penyai.

³⁶Ba penyangkai kapal di Esion-geber sida bisi udah ngaga kapal ti ulih belayar di tasik.

³⁷Tang Elieser anak Dodabahu, ari nengeri Meresah, bisi meri jaku tangkan ngagai Jehosapat, “TUHAN deka ngerusak utai ti udah digaga nuan, laban nuan udah setanah enggau Ahasiah.” Semua kapal iya pechah magang lalu nadai kala belayar.