Read Iban 2 Bansa Israel 21 Bible Online

2 Bansa Israel 21 - Iban bible

2 Bansa Israel 21

¹Jehosapat mati lalu dikuburka ba lumbung bala raja di Nengeri David, lalu anak iya Jehoram nganti iya nyadi raja.

²Jehoram anak Jehosapat menua Judah bisi enam iku menyadi lelaki: Asariah, Jehiel, Sekariah, Asariahu, Mikael, enggau Sepatiah.

³Apai sida udah meri sida mayuh emas, pirak enggau utai ti berega nyadika pesaka sida, sama enggau nengeri ti bekuta di menua Judah. Tang iya nyerahka perintah ngagai Jehoram, laban Jehoram nya anak tuai iya.

⁴Lebuh Jehoram udah negapka diri nyadi raja, iya lalu ngasuh orang munuh sida menyadi lelaki iya, enggau sekeda bala pemesai orang Israel.

⁵Jehoram berengkah nyadi raja lebuh umur iya tiga puluh dua taun, lalu iya merintah di Jerusalem lapan taun.

⁶Iya neladan penyai ulah Raja Ahap, enggau sida raja menua Israel ti bukai, laban iya jadi enggau siku ari anak indu Ahap. Iya bedosa ngelaban TUHAN,

⁷ tang TUHAN enggai ngerusak perintah David, laban Iya udah ngaga sempekat enggau David, lalu besemaya deka ngasuh peturun iya nampung perintah iya.

⁸ Lebuh Jehoram megai perintah, Edom angkat ngelaban perintah orang Judah, lalu merintah diri empu.

⁹Jehoram enggau bala pemesai iya mai kerita perang sida lalu nyerang Edom. Bala soldadu Edom lalu ngelulung sida, tang malam nya sida ulih ngebuska kelulung munsuh lalu rari.

¹⁰Kenyau ari nya Edom mengkang merintah diri lalu enda agi diperintah menua Judah. Lebuh maya nya, nengeri Libnah mega angkat ngelaban perintah orang Judah, laban Jehoram udah ninggalka TUHAN Allah Taala aki ini iya.

¹¹Iya begagaka endur alai orang kapir nyembah petara sida ba menua ti bebukit di menua Judah, lalu iya nguluka orang Judah enggau orang Jerusalem bedosa ngelaban TUHAN.

¹²Nabi Elijah ngirumka siti surat ngagai Jehoram munyi tu: “TUHAN Allah Taala aki nuan David, ngukum nuan, laban nuan enda neladan apai nuan, Raja Jehosapat, tauka neladan aki nuan Raja Asa.

¹³Nuan udah nunda sida raja menua Israel ti bukai, lalu udah nguluka orang Judah enggau orang ke diau di Jerusalem enda tetap ati ngagai Allah Taala, baka Ahap enggau orang ke nganti iya, nguluka orang Israel enda tetap ati ngagai Allah Taala. Laban nuan udah munuh sida menyadi nuan, enggau bala ruang bilik apai nuan, ti manah agi ari nuan empu,

¹⁴TUHAN deka balat ngukum bala nembiak nuan, bala anak nuan enggau bala bini nuan, lalu deka ngerusak pesaka nuan,

¹⁵lalu nuan empu deka ngidapka penyakit pedis perut, ti deka majak balat-sebalat ari hari siti ngagai hari siti.”

¹⁶TUHAN lalu nyungkak orang Pilistin enggau orang Arab ti diau semak orang Etiopia ti udah ngentapka diri ba tebing tasik, angkat ngelaban Jehoram.

¹⁷Sida mansang ngelaban menua Judah, nyerang menua nya, lalu ngerampas semua utai ari istana, lalu nabanka semua bala bini enggau bala anak raja nyadi orang tangkap, kelimpah ari anak bunsu iya ke benama Ahasiah.[19]

¹⁸Udah nya TUHAN lalu ngasuh Raja Jehoram sakit pedis perut ti enda nemu gerai.

¹⁹Penyakit nya majak balat-sebalat nyau deka bulih dua taun, ti ngujungka iya balat amat pedis datai ke mati. Bala nembiak ke diperintah iya nadai nungkunka api kena ngulitka iya, enda baka lebuh aki ini iya mati menya.

²⁰Jehoram berengkah nyadi raja lebuh umur iya tiga puluh dua taun, lalu iya merintah di Jerusalem lapan taun. Nadai orang ngulitka iya lebuh iya mati. Sida nguburka iya di Nengeri David, tang ukai ba lumbung bala raja.