Read Iban 2 Bansa Israel 22 Bible Online

2 Bansa Israel 22 - Iban bible

2 Bansa Israel 22

¹Orang ke diau di Jerusalem lalu nyiri anak bunsu Jehoram ke benama Ahasiah nyadi raja; laban bala soldadu ke datai ngagai kem sama enggau orang Arab udah munuh semua anak iya ke tuai agi. Nya alai Ahasiah anak Jehoram dichiri nyadi raja menua Judah.

²Ahasiah umur dua puluh dua taun [20] lebuh iya berengkah nyadi raja; iya merintah setaun di Jerusalem. Indai iya Ataliah uchu Omri.

³Ahasiah mega neladan ruang bilik Raja Ahap, laban indai iya Ataliah, ke nyadika penyanding iya, nguluka iya ngereja penyai.

⁴Iya bedosa ngelaban TUHAN baka Raja Ahap, laban udah bekau pemati apai iya, orang ari ruang bilik Raja Ahap nyadika penyanding penemu iya, ke ngujungka iya dirusak.

⁵Iya nitihka jaku lalau sida, lalu beserakup enggau Raja Jehoram anak Raja Ahap orang Israel, nyerang Raja Hasael menua Aram, betempuh enggau bala raja nya ba Ramot-giliat, lalu Joram bakal laban orang Aram lebuh perang nya.

⁶Iya lalu pulai ngagai nengeri Jesril nganti bakal diri suman, lalu Ahasiah nemuai ngabas iya.

⁷Tang Allah Taala udah ngeletak Ahasiah dibuai ngena penemuai iya ngagai Joram. Lebuh Ahasiah nemuai ngagai Joram, seduai iya betemu enggau Jehu anak Nimsi, ti udah dipilih TUHAN ngerusak ruang bilik Raja Ahap.

⁸Lebuh Jehu benung bejalaika ukum Allah Taala ngagai peturun Ahap, iya betemu enggau seraban bala tuai orang Judah enggau bala anak menyadi Ahasiah ti udah sama nemuai enggau Ahasiah. Jehu munuh semua sida.

⁹Jehu lalu begigaka Ahasiah, lalu nemu iya belalai di Samaria. Ahasiah lalu dibai ngagai Jehu lalu dibunuh. Tang sida nguburka bangkai iya, laban sida bebasaka aki iya Raja Jehosapat, ke udah enggau naka ulih betuaika TUHAN. Nadai siku sida Ahasiah sebilik agi tinggal megai perintah di menua nya.

¹⁰Lebuh Ataliah, indai Raja Ahasiah ninga anak iya udah mati, iya lalu ngasuh semua sida raja orang Judah sebilik dibunuh magang.

¹¹Ahasiah bisi siku menyadi-tiri ti indu ke benama Jehoseba, ke jadi enggau siku imam ke benama Jehoiada. Indu nya, enggau chara belalai, ngidupka siku anak Ahasiah, ke benama Joas, nabanka iya ari bala menyadi iya ke baru deka dibunuh, lalu ngelalaika iya enggau siku orang ke ngibun iya ba bilik tinduk dalam Rumah Sembiang. Iya majak ngelalaika Joas, lalu Ataliah enda ulih munuh iya.

¹²Joas dilalaika dia enam bulan, sekumbang Ataliah ke merintah nyadi kuin.