Read Iban 2 Bansa Israel 24 Bible Online

2 Bansa Israel 24 - Iban bible

2 Bansa Israel 24

¹Joas berengkah nyadi raja menua Judah lebuh umur iya tujuh taun, lalu iya merintah di Jerusalem empat puluh taun. Indai iya Sibiah, ari nengeri Beer-seba.

²Iya ngereja utai ti ngerinduka ati TUHAN, seagi-agi Imam Jehoiada mengkang idup.

³Jehoiada milih dua iku indu nyadika bini Raja Joas, lalu bini Joas ke dua iku nya ngadaka anak lelaki enggau anak indu.

⁴Lebuh Joas udah lama nyadi raja, iya bekira deka ngaduka Rumah Sembiang.

⁵Iya bejaku enggau bala imam enggau orang Lewi ngasuh sida mansang ngagai semua nengeri di menua Judah, mupu duit ari semua orang mayuh chukup kena ngaduka Rumah Sembiang. Iya ngasuh sida berengkah gawa tekala nya. Tang orang Lewi ngerindang diri.

⁶ Nya alai iya mesanka Jehoiada ti nyadi tuai sida, lalu nanya, “Nama kebuah nuan nadai udah ngasuh orang Lewi mupu duit ari menua Judah enggau ari Jerusalem ti patut dibayar orang mayuh kena melanja Langkau Kain TUHAN nitihka atur Moses, ke nembiak TUHAN?” (

⁷Bala orang ke nitihka Ataliah, indu ke jai nya, [21] udah ngerusak Rumah Sembiang, lalu udah nyembah Baal ngena mayuh utai ti kudus dia.)

⁸Raja lalu ngasuh orang Lewi ngaga siti peti alai nyimpan duit pupu, lalu ngengkahka peti nya ba mua pintu Rumah Sembiang.

⁹Sida lalu ngirumka jaku gerah ngagai serata nengeri Jerusalem enggau menua Judah, ngasuh semua orang mai ngagai TUHAN duit pupu baka ke udah terubah digumpul Moses, ti nembiak TUHAN, di menua puang.

¹⁰Orang mayuh enggau bala tuai sida gaga ati ninga jaku gerah nya, lalu sida mai duit pupu sida lalu ngisi peti nya.

¹¹Tiap hari orang Lewi mai peti nya ngagai pemesai raja ke betanggungjawapka utai nya. Lebuh peti nya penuh, kerani raja enggau pengari Imam Besai ngambi duit nya ari peti nya, lalu mulaika peti nya ngagai endur peti nya diengkah. Nya alai sida mupu mayuh amat duit.

¹²Raja enggau Jehoiada meri duit nya ngagai orang ke nyadi tuai ngaduka Rumah Sembiang, lalu sida ngaji orang ke landik begagaka utai ari batu, tukang kayu, tukang tempa, ngambika sida ngaduka Rumah Sembiang.

¹³Semua sida nya bebendar amat gawa, lalu sida ulih ngaduka Rumah Sembiang nya sebaka enggau gamal asal iya, sereta tegap.

¹⁴Lebuh pengawa nya udah tembu, emas enggau pirak ti laluh lalu diberi ngagai raja enggau ngagai Imam Jehoiada. Seduai iya lalu ngasuh orang ngena emas enggau pirak ti laluh nya begagaka mangkuk enggau pekekas bukai ke Rumah Sembiang. Lebuh Jehoiada agi idup, piring endang seruran diberi ba Rumah Sembiang.

¹⁵Lebuh umur iya manggai seratus tiga puluh taun, iya mati.

¹⁶Sida nguburka iya ba lumbung bala raja di Nengeri David kena sida ngingatka pemanah pengawa ti udah dikereja iya ke orang Israel, ke Allah Taala, enggau ke Rumah Sembiang.

¹⁷Tang lebuh Jehoiada udah mati, bala tuai orang Judah mujuk Raja Joas mendingka sida.

¹⁸Nya alai orang mayuh badu agi nyembah dalam Rumah TUHAN Allah Taala aki ini sida, lalu sida belabuh nyembah engkeramba, enggau anak patung petara indu Aserah. TUHAN lalu ringat ngagai menua Judah enggau Jerusalem.

¹⁹TUHAN ngasuh bala nabi meri jaku tangkan ngagai sida, ngasuh sida pulai baru ngagai Iya, tang orang mayuh enggai mending.

²⁰ Udah nya Roh Allah Taala lalu bekuasa ba Sekariah anak Imam Jehoiada. Iya bediri ba endur alai iya ulih dipeda orang mayuh, lalu bejaku enggau nyawa ti inggar, “TUHAN Allah Taala nanyaka kebuah kita enda agi ngasika pesan Iya, lalu ngasuh diri ditinggang penusah ti besai tu! Laban kita udah ninggalka Iya, nya alai Iya ninggalka kita!”

²¹Orang mayuh lalu bepekat ngelaban Sekariah ari asuh raja. Sida nuku iya ngena batu ba tengah laman Rumah Sembiang.

²²Raja Joas enda ingatka pemanah Jehoiada, apai Sekariah, enggau iya, lalu iya ngasuh orang munuh Sekariah. Lebuh Sekariah nyau deka ngapuska seput, iya ngangau, “Awakka TUHAN meda lalu malas!”

²³Ba pun musin chelap taun nya, bala soldadu orang Siria nyerang menua Judah enggau Jerusalem, munuh semua tuai bansa, lalu nabanka mayuh amat perapasan ngagai Damaskus.

²⁴Bala soldadu orang Siria enda mayuh, tang TUHAN nejuka sida ngalahka bala soldadu orang Judah ke mayuh agi ari sida, laban orang Judah udah ninggalka TUHAN Allah Taala aki ini sida. Nya meh chara Raja Joas diukum.

²⁵Iya balat amat bakal, lalu lebuh bala munsuh pulai, dua iku pemesai iya bepekat ngelaban iya, lalu munuh iya lebuh iya gali ba katil, laban iya udah munuh anak Imam Jehoiada. Joas dikuburka di nengeri David, tang ukai ba lumbung bala raja. (

²⁶Orang ke bepekat ngelaban Joas nya Sabat anak Sime-at, orang Amon, enggau Jehosabat anak Simrit orang bansa Moap.)

²⁷Cherita pasal bala anak lelaki Joas, jaku ti benabi ti disebut ngelaban iya, enggau cherita pasal chara iya ke ngaduka Rumah Sembiang, bisi dituliska magang dalam Jaku Kenang Pasal Bup Raja. Anak iya ke benama Amasiah nganti iya nyadi raja.