Read Iban 2 Bansa Israel 25 Bible Online

2 Bansa Israel 25 - Iban bible

2 Bansa Israel 25

¹Amasiah berengkah nyadi raja lebuh umur iya dua puluh lima taun, lalu iya merintah di Jerusalem dua puluh semilan taun. Indai iya Jeho-adin [22] datai ari Jerusalem.

²Iya ngereja utai ti ngerinduka ati TUHAN, tang enggau ati ti lembau.

³Lebuh iya udah negapka perintah iya, iya lalu munuh bala pemesai ti udah munuh apai iya.

⁴ Tang iya enda munuh bala anak orang nya, laban iya nitihka pesan TUHAN dalam Adat Moses: “Apai indai enda tau dibunuh ketegal penyalah anak sida, lalu anak enda tau dibunuh ketegal penyalah apai indai sida. Orang semina tau dibunuh ketegal penyalah sida empu.”

⁵Udah nya Raja Amasiah ngempuruka semua lelaki ari raban bansa Judah enggau Benjamin nyadi soldadu nitihka raban peturun sida, lalu ngeletak pemesai nyadi tuai ke raban seribu iku enggau raban seratus iku sida. Iya ngempuruka 300,000 iku lelaki ke umur dua puluh taun ke atas, orang ke tau enggau beperang, ke sikar bekenaka sangkuh enggau terabai.

⁶Nambahka nya, iya mega ngaji 100,000 soldadu ari menua Israel, ngena ungkus kira empat tan pirak.

⁷Tang siku nabi mansang ngagai Raja Amasiah, lalu bejaku enggau iya, “Anang mai bala soldadu orang Israel tu enggau nuan, laban TUHAN nadai enggau orang ke datai ari perintah ti di utara.

⁸Enti nuan ngumbai diri kering [23] beperang ngena chara tu, Allah Taala deka ngasuh nuan alah laban munsuh; laban Allah Taala bisi kuasa nulung tauka ngalah.”

⁹Amasiah lalu nanya ngagai nabi nya, “Tang kati ku semua pirak ti udah dibayar kena aku ngaji sida?” Ku nabi nya nyaut, “TUHAN ulih meri nuan mayuh agi pirak ari nya!”

¹⁰Amasiah lalu ngasuh bala soldadu ke digaji nya pulai ngagai menua sida empu. Bala soldadu nya lalu pulai, balat amat ringat ngagai orang Judah.

¹¹Enggau ati ti berani Amasiah nguluka bala soldadu iya ngagai Lebak Garam. Dia sida ngelaban lalu munuh sepuluh ribu iku soldadu orang Edom.

¹²Orang Judah nangkap sepuluh ribu iku ti bukai, lalu mai orang tangkap nya ngagai pala tingkah batu di nengeri Sela, lalu muai sida ke baruh. Semua sida redak magang.

¹³Tang bala soldadu orang Israel ti enda disagi Amasiah mansang enggau iya beperang, lalu nyerang nengeri orang Judah entara Samaria enggau Bet-horon, munuh tiga ribu iku lelaki dalam nengeri nya, lalu ngerampas mayuh amat perapasan.

¹⁴Lebuh Amasiah pulai udah bekau iya ti ngalahka orang Edom, iya mai engkeramba sida, nirika engkeramba nya, nyembah lalu meri piring ngagai engkeramba nya.

¹⁵Nya alai TUHAN ringat ngagai Amasiah, lalu ngasuh siku nabi mansang ngagai Amasiah. Nabi nya lalu nanya, “Nama kebuah nuan nyembah petara orang bansa bukai ke enda ulih ngelepaska sida empu ari kuasa nuan?”

¹⁶Tang lebuh nabi nya agi benung bejaku, Amasiah lalu ngelampat jaku iya, ku iya, “Kemaya nuan udah diasuh nyadi penyanding penemu ke raja? Badu agi nuan bejaku, enggai ke aku ngasuh orang munuh nuan!” Nabi nya lalu badu agi bejaku. Tang sebedau iya badu bejaku, iya sempat nyebut, “Aku nemu Allah Taala udah mutuska runding deka ngerusak nuan laban nuan udah ngereja semua utai tu, lalu enda mendingka jaku lalau aku.”

¹⁷Udah nya Raja Amasiah enggau bala pemesai iya baum lalu ngirumka pesan ngagai Raja Jehoas anak Jehoahas, uchu Jehu menua Israel, nyakap iya lalu mai iya belaban. [24]

¹⁸Jehoas ngirumka saut ngagai Amasiah raja menua Judah: “Nyadi sekali madang duri di Bukit Lebanon ngirumka pesan ngagai kayu sidar: ‘Awakka anak indu nuan jadi enggau anak lelaki aku.’ Siku jelu babas mansa, lalu ngindik madang duri nya.

¹⁹Nuan Amasiah temegah madahka diri udah ngalahka orang Edom, tang aku ngelalau nuan, anang mindah ari rumah. Nama kebuah ngaga pengachau ti semina deka ngenusahka nuan enggau bala nembiak nuan?”

²⁰Tang Amasiah enggai mending ari asuh Allah Taala, ngambika sida alah laban munsuh sida, laban sida udah nyembah engkeramba orang Edom.

²¹Nya alai Jehoas, raja menua Israel nyerang Amasiah, raja menua Judah. Sida besatup ba Bet-semes di menua Judah.

²²Soldadu orang Judah alah laban bala orang Israel, lalu bala soldadu sida rari ngagai rumah diri empu.

²³Jehoas raja menua Israel nangkap Amasiah raja menua Judah, lalu mai iya ngagai Jerusalem. Dia Raja Jehoas lalu ngeruntuhka kuta nengeri nya sepemanjai 200 meter, berengkah ari Pintu Epraim nyentuk ngagai Pintu Sukut.

²⁴Iya mai ngagai Samaria nyadika perapasan iya semua emas enggau pirak ti dalam Rumah Sembiang, pekekas ti dikena dalam Rumah Sembiang ti dijaga bala peturun Obet-edom, enggau reta tengkira ti dalam istana. Iya mega mai orang tangkap.

²⁵Raja Amasiah mengkang idup lima belas taun udah bekau pemati Raja Jehoas menua Israel.

²⁶Semua utai bukai ti udah dikereja Amasiah ari pun ngagai pengujung perintah iya bisi dituliska magang dalam Jerita Lama Pasal Raja Menua Judah Enggau Raja Menua Israel.

²⁷Kenyau ari maya iya ninggalka TUHAN, orang udah bepekat ngelaban iya di Jerusalem. Iya lalu rari ngagai nengeri Lakis, tang sida nitihka iya ngagai nengeri nya, lalu munuh iya dia.

²⁸Bangkai iya ditepanka ba kuda lalu dibai ngagai Jerusalem, lalu iya dikuburka ba lumbung bala raja di Nengeri David.