Read Iban 2 Bansa Israel 26 Bible Online

2 Bansa Israel 26 - Iban bible

2 Bansa Israel 26

¹Semua orang Judah milih anak lelaki Amasiah ke benama Usiah, ke umur enam belas taun, nganti apai iya nyadi raja. (

²Udah bekau pemati Amasiah, Usiah ngalah lalu nirika nengeri Elat lalu mulaika nengeri nya ngagai Judah.)

³Usiah nyadi raja lebuh umur iya enam belas taun, lalu iya merintah di Jerusalem lima puluh dua taun. Indai iya Jekoliah, ari Jerusalem.

⁴Iya ngereja utai ti ngerinduka ati TUHAN, neladan apai iya.

⁵Sekumbang Sekariah, ti nyadi penyanding penemu iya, agi idup, Usiah betuaika TUHAN enggau ati ti tetap, lalu Allah Taala merekatka iya.

⁶Usiah nyerang orang Pilistin. Iya ngeruntuhka kuta nengeri Gat, Jabnil, enggau Asdot, lalu iya nirika nengeri ti bekuta semak Asdot, enggau ba endur bukai di menua Pilistin.

⁷Allah Taala nulung iya ngalahka orang Pilistin, orang Arab ti diau di Gurbaal, enggau orang Meun.

⁸Orang Amon mayar chukai ngagai Usiah, lalu kuasa iya amat besai datai ke berita pasal iya nyau ngelekai nyentuk ngagai menua Ejip.

⁹Kena negapka kuta nengeri Jerusalem, Usiah ngaga menara ba Pintu Sukut, Pintu Lebak, enggau ba sukut kuta nya.

¹⁰Iya mega ngaga menara ti bekuta di menua pesisir, lalu numbak berapa buah telaga, laban iya nupi mayuh amat jelu ba kaki bukit di barat enggau ba emperan. Iya rinduka pengawa umai, nya alai iya meransang orang Judah bekebun anggur ba menua ti bebukit, lalu bumai tanah ti ami.

¹¹Bala soldadu iya mayuh, lalu sida endang seruran sedia deka beperang. Cherita pasal utai ti dikereja bala soldadu iya dituliska magang ulih kerani iya Jeiel seduai Maseiah ari baruh Hananiah, siku ari orang ke bekereja ke raja.

¹²Bala soldadu raja diuluka 2,600 iku bala pemesai.

¹³Sida pemesai tu nguluka 307,500 iku soldadu ke ulih ngelaban munsuh ngarika raja.

¹⁴Usiah meri ngagai bala soldadu iya terabai, sangkuh, selapuk kebal, baju kebal, panah enggau laja, enggau batu ti deka ditimbakka ngena pangwang.

¹⁵Orang ke diasuh iya begagaka utai di Jerusalem, ngaga semacham pekekas kena nimbakka laja, enggau kena nimbakka batu ari menara enggau ari sukut kuta nengeri. Berita pasal iya ngelekai ngagai semua endur, lalu iya nyadi orang ke besai kuasa ari tulung Allah Taala.

¹⁶Tang lebuh Usiah nyau udah kering, iya sumbung. Penyumbung iya ngujungka iya dibuai. Iya enda ngasika TUHAN Allah Taala iya laban iya mansang ngagai Rumah Sembiang lalu nunu menyan ba alta ti alai nunu menyan.

¹⁷Imam Asariah, disempulang lapan puluh iku imam ke kering sereta berani, lalu nitihka raja

¹⁸ deka nagang iya. Ku sida, “Usiah! Nuan nadai hak nunu menyan ke TUHAN. Semina imam ke ari peturun Aron aja, ti udah dikuduska, tau ngereja pengawa nya. Angkat nuan ari tu. TUHAN Allah Taala udah ringat ngagai nuan, lalu Iya enggai agi merekatka nuan.”

¹⁹Usiah lalu ringat. bediri tegir-tegir dia dalam Rumah Sembiang, ngimbai alta ti alai nunu menyan, megai utai ti dikena nunu menyan. Iya lalu ringat ngagai bala imam. Tekala nya penyakit kulit ti tau ngerampit lalu pegari ba kening iya.

²⁰Asariah enggau sida imam ti bukai lalu genung-genung merening meda kening raja. Udah nya sida lalu mejalka iya angkat ari Rumah Sembiang. Iya lalu beguai-guai pansut, laban TUHAN udah ngukum iya.

²¹Kenyau ari nya, nyentuk ngagai pemati iya, iya nyadi orang ke enda tuchi ketegal penyakit nya. Iya nadai agi tau tama ngagai Rumah Sembiang. Iya diau dalam rumah iya empu. Semua kuasa iya dirampas ari iya, lalu iya diganti anak iya ke benama Jotam megai perintah di menua nya.

²²Nabi Isaiah anak Amos bisi nuliska semua utai bukai ti udah dikereja Raja Usiah lebuh maya Usiah megai perintah.

²³ Usiah mati lalu dikuburka ba tanah kubur bala raja, tang laban iya ngidapka penyakit kulit, iya enda dikuburka ba lumbung bala raja empu. Anak iya Jotam nganti iya nyadi raja.