Read Iban 2 Bansa Israel 27 Bible Online

2 Bansa Israel 27 - Iban bible

2 Bansa Israel 27

¹Jotam nyadi raja lebuh umur iya dua puluh lima taun, lalu iya merintah di Jerusalem enam belas taun. Indai iya Jerusah anak Sadok.

²Iya ngereja utai ti ngerinduka ati TUHAN, baka apai iya. Tang iya enda bedosa betunuka menyan dalam Rumah Sembiang baka apai iya. [25] Tang orang mayuh majak bedosa.

³Jotam nya meh orang ke ngaga Pintu Utara ke Rumah Sembiang, lalu iya mega ngaduka kuta di Jerusalem ba endur ti dikumbai Opel.

⁴Iya ngaga mayuh bengkah nengeri di menua ti bebukit di menua Judah. Lalu iya begagaka kuta enggau menara.

⁵Iya ngelaban raja menua Amon enggau bala soldadu raja nya, lalu ngalahka sida. Udah nya iya mejalka orang Amon mayar chukai genap taun dalam tiga taun, ngagai iya baka tu: 3,400 kilogram pirak, 1,000 tan gandum, enggau 1,000 tan barli.

⁶Jotam bekuasa laban iya tetap ati ngasika TUHAN Allah Taala iya.

⁷Utai bukai ti nyadi lebuh Jotam megai perintah, perang enggau polisi iya, bisi dituliska magang dalam Jerita Lama Pasal Raja Menua Israel enggau Menua Judah.

⁸Umur Jotam dua puluh lima taun lebuh iya berengkah nyadi raja, lalu iya merintah di Jerusalem enam belas taun.

⁹Iya mati lalu dikuburka di nengeri David, lalu anak lelaki iya Ahas nganti iya nyadi raja.