Read Iban 2 Bansa Israel 29 Bible Online

2 Bansa Israel 29 - Iban bible

2 Bansa Israel 29

¹Hesekiah nyadi raja menua Judah lebuh umur iya dua puluh lima taun, lalu iya merintah di Jerusalem dua puluh semilan taun. Indai iya Abijah anak Sekariah.

²Iya ngereja utai ti ngerinduka ati TUHAN, neladan aki iya Raja David.

³Dalam bulan ti kesatu [26] taun Hesekiah berengkah nyadi raja, iya muka semua pintu Rumah Sembiang, lalu ngasuh pintu nya diaduka baru.

⁴Iya ngempuruka bala imam enggau orang Lewi ba tengah laman timur Rumah Sembiang

⁵lalu bejaku ngagai sida dia. Ku iya, “Kita orang Lewi enda tau enda nguduska diri, lalu nuchi Rumah Sembiang TUHAN Allah Taala aki ini kita. Buai ari Rumah Sembiang nya semua utai ti ngamahka iya.

⁶Sida aki ini kitai udah enda tetap ati ngagai TUHAN Allah Taala kitai, lalu udah ngereja utai ti nyungkak TUHAN ringat. Sida udah ninggalka Iya, lalu nguingka belakang sida ngagai endur alai Iya diau.

⁷Sida udah nikupka pintu Rumah Sembiang, nejuka lampu padam, lalu enda nunu menyan tauka ngenjuk piring tunu dalam Rumah Sembiang Allah Taala ke disembah orang Israel.

⁸Nya kebuah TUHAN ringat ngagai menua Judah enggau Jerusalem, lalu utai ti udah dikereja Iya ngagai sida udah ngasuh semua orang tekenyit ati sereta takut. Kita empu nemu nya.

⁹Bala apai kitai udah mati beperang, lalu bala bini enggau bala anak kitai udah ditabanka munsuh nyadi orang tangkap.

¹⁰“Diatu aku udah mutuska runding deka ngaga siti sempekat enggau TUHAN Allah Taala ke disembah orang Israel, ngambika Iya enda agi ringat ngagai kitai.

¹¹Anak, anang masau jam. Kita tu orang ke udah dipilih TUHAN nunu menyan ke Iya, sereta nguluka orang mayuh nyembah Iya.”

¹²Tu nama orang Lewi ke bisi dia: Ari raban peturun Kohat: Mahat anak Amasai, enggau Joel anak Asariah Ari raban peturun Merari: Kis anak Abdi, enggau Asariah anak Jehalelel Ari raban peturun Gerson: Joah anak Simah, enggau Eden anak Joah Ari raban peturun Elisapan: Simri seduai Jeuel Ari raban peturun Asap: Sekariah seduai Mataniah Ari raban peturun Heman: Jehuel seduai Simei Ari raban peturun Jedutun: Semaiah seduai Usiel

¹⁵Bala sida tu lalu ngempuruka bala orang Lewi ti bukai, lalu semua sida bela nuchi diri magang. Udah nya, nitihka atur ti diberi Raja Hesekiah ngagai sida, sida lalu belabuh nuchi Rumah Sembiang, nitihka Adat TUHAN. [27]

¹⁶Bala imam tama ngagai Rumah Sembiang, deka nuchi rumah nya, lalu sida muai semua utai ti enda tuchi ngagai tengah laman Rumah Sembiang. Ari nya bala orang Lewi lalu mai semua utai nya pansut ari nengeri ngagai Lebak Kidron.

¹⁷Pengawa nuchi Rumah Sembiang berengkah kena satu hari bulan ti kesatu, lalu kena lapan hari bulan nya, semua pengawa nya tembu magang dikereja, nyentuk ngagai bilik penama ti nuju ngagai Rumah Sembiang. Udah nya sida bekereja lapan hari da agi, nyentuk ngagai enam belas hari bulan nya, nyendiaka Rumah Sembiang alai besembiang.

¹⁸Orang Lewi lalu madahka ngagai Raja Hesekiah: “Kami udah tembu nuchi Rumah Sembiang, nyengkaum alta alai nunu piring, mija alai engkah roti ti kudus, enggau semua pekekas utai nya.

¹⁹Kami udah mega mai pulai baru semua pekekas ti udah diambi Raja Ahas sekumbang iya ti enda tetap ati ngagai Allah Taala, lalu kami udah nyerahka utai nya baru ngagai TUHAN. Semua utai nya bisi di mua alta TUHAN magang.”

²⁰Raja Hesekiah lalu beguai-guai ngempuruka bala tuai nengeri, lalu semua sida sama mansang ngagai Rumah Sembiang.

²¹Sida mai tujuh iku sapi ti lelaki, tujuh iku jelu bedus, tujuh iku anak domba, enggau tujuh iku kambin nyadika piring pengampun dosa sida raja sebilik, enggau dosa orang Judah, enggau kena nuchi Rumah Sembiang. Raja lalu ngasuh bala imam, ke ari peturun Aron, meri jelu nya nyadika piring ba alta.

²²Bala imam munuh sapi ti lelaki dulu, udah nya bedus, lalu udah nya anak domba, lalu sida ngunsaika darah siku-siku jelu nya ba alta nya.

²³Ke pengujung iya sida lalu mai kambin ngagai raja, enggau ngagai orang bukai ke besembiang dia, lalu semua sida bela ngengkahka jari sida ba kambin nya.

²⁴Udah nya bala imam lalu munuh kambin nya, lalu nuang darah jelu nya ba alta nyadika genselan kena muai dosa semua orang mayuh, laban raja udah ngasuh piring tunu enggau piring pengampun dosa, digagaka semua orang Israel.

²⁵Raja nitihka atur ti udah diberi TUHAN ngagai Raja David ngena Gat, ti nyadi nabi raja, enggau ngena nabi Natan. Iya ngasuh orang Lewi bepalan ba Rumah Sembiang, mai belikan enggau bebendai,

²⁶iya nya pekekas baka ke udah dikena Raja David. Bala imam mega bediri dia mai terumpit.

²⁷Hesekiah lalu ngasuh piring tunu nya dienjuk ba alta. Lalu lebuh pengawa nya berengkah, orang mayuh lalu belagu muji TUHAN, lalu bala orang ke nebah musik belabuh nebah terumpit enggau semua perengka musik ti bukai.

²⁸Semua orang ke bisi dia bela enggau nyembah TUHAN magang, lalu pengawa belagu enggau nebah musik dikereja enda ngetu-ngetu datai ke semua piring nya udah ditunu magang.

²⁹Udah nya Raja Hesekiah enggau semua orang mayuh besugang, lalu nyembah Allah Taala.

³⁰Raja enggau bala tuai bansa lalu ngasuh orang Lewi belagu ke TUHAN ngena lagu puji ti udah ditulis David enggau lagu ti udah ditulis nabi Asap. Semua orang lalu belagu magang enggau ati ti gaga, lebuh sida besugang nyembah Allah Taala.

³¹Hesekiah lalu bejaku enggau orang mayuh, “Kita diatu udah nyerahka diri ngagai TUHAN, nya alai bai piring terima kasih kita ngagai TUHAN.” Sida lalu ngereja nya. Sekeda sida mega ngatika diri mai jelu nyadika piring tunu.

³²Sida mai tujuh puluh iku sapi ti lelaki, seratus iku jelu bedus, enggau dua ratus iku anak domba nyadika piring tunu ngagai TUHAN.

³³Sida mega mai enam ratus iku sapi ti lelaki, enggau tiga ribu iku jelu bedus nyadi piring ke diempa bala mayuh.

³⁴Tang bala imam ti munuh jelu nya enda chukup tubuh niti kulit semua jelu nya, nya alai orang Lewi nulung sida, datai ke pengawa nya tembu. Laban ba urung maya nya mayuh agi bala imam udah nuchi diri. (Orang Lewi lebih agi tetap ati ngintu diri tuchi ari bala sida imam.)

³⁵Nambahka piring tunu segala, bala sida imam mega betanggungjawap betunuka lemak ti udah diberi ari piring ti diempa orang mayuh, sereta betanggungjawap nuang wain ti diberi sama enggau piring tunu. Nya meh jalai pengawa nyembah TUHAN dalam Rumah Sembiang nyau dikereja baru.

³⁶Raja Hesekiah enggau orang mayuh bela gaga ati magang, laban Allah Taala udah nulung sida ngereja semua utai nya enggau jampat.