Read Iban 2 Bansa Israel 30 Bible Online

2 Bansa Israel 30 - Iban bible

2 Bansa Israel 30

¹ Orang mayuh enda ulih ngintu Gawai Paska ba maya ti patut dalam bulan ti kesatu, laban sida nadai chukup imam ti udah nuchi diri, enggau laban orang apin mayuh begempuru di Jerusalem. Nya alai Raja Hesekiah, bala pemesai iya, enggau orang ke diau di Jerusalem besetuju deka ngintu Gawai nya dalam bulan ti kedua. Raja Hesekiah lalu ngirumka jaku gerah ngagai semua orang Israel enggau orang Judah. Enggau naka penyimat, iya ngirumka surat ngagai raban bansa Epraim enggau raban bansa Manasi, minta sida datai ngagai Rumah Sembiang di Jerusalem ngintu Gawai Paska kena ngemesaika TUHAN Allah Taala ke disembah orang Israel.

⁴Raja enggau orang mayuh gaga ati ke pelan nya,

⁵nya alai sida mesanka semua orang Israel, kenyau ari Dan di utara nyentuk ngagai Beer-seba di selatan, minta sida begempuru di Jerusalem mayuh agi ari ti udah, lalu ngintu Gawai Paska nitihka Adat.

⁶Bala orang ke mai pesan mupuk, nitihka jaku raja enggau bala pemesai iya, lalu bejalai ngagai serata menua Judah enggau menua Israel, mai pesan tu: “Orang Israel, kita udah mujur nan di menua tu lebuh orang Asiria nyerang. Nya alai pulai meh kita baru diatu ngagai TUHAN Allah Taala ke disembah Abraham, Isak, enggau Jakop, ngambika TUHAN pulai baru ngagai kita.

⁷Anang baka aki ini kita enggau baka kaban belayan kita orang Israel ti enda tetap ati ngagai TUHAN Allah Taala sida. Kita empu nemu, TUHAN udah balat amat ngukum sida.

⁸Anang kieh ati baka sida, tang ngasika TUHAN. Datai ngagai Rumah Sembiang di Jerusalem, ti udah dituchi TUHAN Allah Taala kita belama iya, lalu sembah TUHAN ngambika Iya enda agi ringat ngagai kita.

⁹Enti kita pulai baru ngagai TUHAN, nya baru orang ke udah nabanka kaban belayan kita nyadi orang tangkap deka sinu ati ke sida, lalu nejuka sida pulai baru ngagai menua diri. TUHAN Allah Taala kita siru sereta kasih, lalu enti kita pulai baru ngagai Iya, Iya deka nerima kita.”

¹⁰Bala orang ke mai pesan nya bejalai ngagai semua nengeri di menua Epraim enggau Manasi, enggau ngagai menua ti di utara nyentuk ngagai raban bansa Sebulun, tang orang mayuh ketawa sereta beduan sida.

¹¹Tang taja pia, sekeda orang ari raban bansa Aser, Manasi, enggau Sebulun bisi ati deka datai ngagai Jerusalem.

¹²Allah Taala mega bekereja di menua Judah, lalu ngempung orang mayuh lalu ngasuh sida mutus ati ngasika peneka Iya, lebuh sida nitihka atur raja enggau bala pemesai iya.

¹³Dalam bulan ti kedua mayuh amat orang begempuru di Jerusalem ngerami Gawai Roti Ti Enda Beragi.

¹⁴Sida ngeruntuhka semua alta di Jerusalem ti udah alai orang ngenjuk piring enggau betunuka menyan, lalu muai utai nya ngagai Lebak Kidron.

¹⁵Lalu kena empat belas hari bulan nya, sida nyayat anak domba nyadika piring Gawai Paska. Bala imam enggau orang Lewi ti enda tuchi, nyau berasai malu ke diri empu, datai ke sida nyau nyerahka diri ngagai TUHAN lalu ulih ngenjuk piring tunu dalam Rumah Sembiang.

¹⁶Sida ngambi endur diri dalam Rumah Sembiang nitihka atur dalam Adat nabi Moses. Orang Lewi meri darah ari piring ngagai bala imam, ke lalu ngunsaika darah nya ngagai alta.

¹⁷Nyadi laban orang agi mayuh apin nuchi diri, sida enda tau nyayat anak domba ke Gawai Paska nya. Nya alai bala orang Lewi ngereja pengawa nya ke sida, lalu nyerahka anak domba nya ngagai TUHAN.

¹⁸Nambahka nya, mayuh orang ke udah datai ari raban bansa Epraim, Manasi, Isakar, enggau Sebulun apin nuchi diri, lalu sida ngintu Gawai nya enggau chara ti enda menyana. Raja Hesekiah besampika sida munyi tu:

¹⁹“O TUHAN Allah Taala aki ini kami, enggau pemanah ati Nuan ampun meh orang ke nyembah Nuan enggau pengabis ati sida, taja pen sida enda tuchi.”

²⁰TUHAN nyaut sampi Hesekiah. Iya ngampun sida, lalu enda ngukum sida.

²¹Bala orang mayuh begempuru di Jerusalem ngintu pengerami Gawai Roti Ti Enda Beragi dalam pengelama tujuh hari enggau ati ti gaga, lalu orang Lewi enggau bala imam muji TUHAN tiap hari enggau pengabis pengering sida. [28]

²²Hesekiah muji orang Lewi ketegal pengelandik sida nguluka orang nyembah TUHAN. Lebuh sida udah ngenjuk piring tujuh hari kena muji TUHAN Allah Taala aki ini sida,

²³semua sida lalu mutuska runding deka nampung pengerami nya tujuh hari da agi. Nya alai sida ngintu pengerami nya tujuh hari da agi enggau ati ti gaga.

²⁴Raja Hesekiah meri seribu iku sapi ti lelaki enggau tujuh ribu iku bedus ngambika bisi dibunuh sereta diempa orang mayuh, lalu bala pemesai meri sida seribu iku sapi ti lelaki, enggau sepuluh ribu iku bedus. Lalu mayuh amat bala imam ngereja pengawa nuchi diri empu.

²⁵Semua orang Judah, bala imam, orang Lewi, orang ke datai ari utara, orang kampar ti udah ngentapka diri di menua Israel enggau menua Judah, bela rami gaga magang.

²⁶Nya alai semua orang di nengeri Jerusalem gaga ati magang, laban nadai utai ti baka nya udah kala nyadi kenyau ari rambau Raja Solomon, anak Raja David.

²⁷Bala imam enggau orang Lewi minta TUHAN merekatka orang mayuh. Allah Taala ninga sampi sida ari rumah Iya di serega, lalu iya nerima sampi sida.