Read Iban 2 Bansa Israel 31 Bible Online

2 Bansa Israel 31 - Iban bible

2 Bansa Israel 31

¹Lebuh Gawai nya udah tembu, semua orang Israel lalu mansang ngagai semua nengeri di serata menua Judah, lalu mechahka tiang batu, nebang tanda petara indu Aserah, lalu ngerusak alta enggau endur alai orang kapir nyembah petara sida. Sida ngereja baka nya mega di serata menua Judah, di menua Benjamin, Epraim, enggau Manasi. Udah nya semua sida pulai ngagai menua diri empu.

²Raja Hesekiah lalu numbuhka baru atur pengawa bala imam enggau orang Lewi, lalu genap iku sida meruan diberi pengawa. Pengawa nya nyengkaum ngenjuk piring tunu, enggau piring pemaik, enggau nyembah Allah Taala dalam Rumah Sembiang, meri puji enggau meri terima kasih ba mayuh bengkah endur dalam Rumah Sembiang.

³ Ari raban jelu bedus enggau raban jelu sapi iya empu, Raja Hesekiah meri jelu nyadika piring tunu genap pagi enggau lemai, enggau jelu ti diberi lebuh Hari Sabat, lebuh Gawai Anak Bulan, enggau lebuh gawai bukai ti diletak Adat TUHAN.

⁴ Nambahka nya, raja ngasuh orang Jerusalem mai pemeri ti endang diberi ngagai bala imam enggau orang Lewi, ngambika sida enda ibuh ngereja pengawa bukai tang semina ngereja pengawa ti diletak Adat TUHAN.

⁵Lebuh atur nya udah dipadahka, orang Israel lalu mai pemeri ari gandum ti terubah diketau sida, wain, minyak kana, ai manyi, enggau asil bukai ari umai. Sida mega mai pemeri sepuluh peratus [29] ari semua utai ti dikemisi sida.

⁶Semua orang ke diau di nengeri dalam menua Judah bela mai pemeri sepuluh peratus ari jelu sapi enggau jelu bedus sida, lalu sida mega mai mayuh pemeri bukai ti udah diserahka sida ngagai TUHAN Allah Taala sida.

⁷Pemeri nya belabuh datai dalam bulan ti ketiga, lalu majak betugung dia empat bulan.

⁸Lebuh Raja Hesekiah enggau bala pemesai iya meda pemayuh pemeri nya, sida muji TUHAN, lalu muji orang Israel.

⁹Raja bejaku ngagai bala imam sereta enggau orang Lewi pasal pemeri nya,

¹⁰lalu ku Imam Besai Asariah, ke ari peturun Sadok, bejaku enggau iya, “Sekumbang orang mayuh udah berengkah mai pemeri ngagai Rumah Sembiang, utai diempa chukup magang, sereta mayuh belaluh. Kitai bisi semua utai tu laban TUHAN udah merekatka bala nembiak Iya.”

¹¹Nitihka atur raja, sida lalu nyendiaka siti bilik setor dalam kandang Rumah Sembiang

¹²lalu sida nyimpan semua pemeri enggau pemeri sepuluh peratus dalam bilik setor nya, ngambika utai nya disimpan enggau likun. Sida ngasuh siku orang Lewi ke benama Konaniah nyadi tuai ngemataka utai nya, lalu ngasuh menyadi iya Simei nyadi penulung iya.

¹³Sepuluh iku orang Lewi diasuh gawa di baruh seduai iya: Jehiel, Asasiah, Nahat, Asahel, Jerimot, Josabat, Eliel, Ismakiah, Mahat, enggau Benaiah. Semua utai tu dikereja atas kuasa nama Raja Hesekiah seduai Imam Besai Asariah.

¹⁴Kore anak Imnah, siku orang Lewi ti nyadi tuai bala jejaga ba Pintu Timur Rumah Sembiang, nyadi tuai nerima pemeri ti diserahka ngagai TUHAN, sereta nyadung utai nya.

¹⁵Ba nengeri bukai ti alai bala imam diau, iya ditulung bala orang Lewi ti bukai ke tetap ati. Tu nama sida nya: Eden, Miniamin, Jesua, Semaiah, Amariah, enggau Sekaniah. Sida nyadung pemakai ngagai sida ke sama orang Lewi, nitihka bagi pengawa sida,

¹⁶lalu ukai nitihka ripih raban peturun. Sida meri siti ungkup ngagai semua lelaki ke umur tiga puluh [30] taun ke atas, ke betanggungjawap bekereja tiap hari dalam Rumah Sembiang nitihka pengawa sida.

¹⁷Bala imam diberi tanggungjawap nitihka raban peturun sida, lalu orang Lewi ke umur dua puluh taun ke atas diberi pengawa nitihka raban.

¹⁸Semua sida nya dituliska nama magang sama enggau nama bala bini, anak, enggau orang ke ditupi sida, laban sida endang enda tau enda seruran sedia ngereja pengawa ti kudus ba sebarang maya.

¹⁹Nyadi dalam nengeri ti udah diungkup alai peturun Aron diau, tauka ba padang rumput ti ngelingi nengeri nya, orang bisi diberi tanggungjawap nyadung pemakai ngagai semua lelaki dalam ruang bilik bala imam, enggau ngagai semua orang ke bisi nama ditulis dalam list nama orang ke ari raban peturun orang Lewi.

²⁰Raja Hesekiah ngereja utai ti ngena di serata menua Judah lalu ngerinduka ati TUHAN Allah Taala iya.

²¹Iya mujur, laban semua utai ti dikereja iya ke Rumah Sembiang tauka pengawa iya ke nitihka Adat, udah dikereja iya enggau ati ti pemadu taluk sereta angkunka Allah Taala iya.