Read Iban 2 Bansa Israel 32 Bible Online

2 Bansa Israel 32 - Iban bible

2 Bansa Israel 32

¹Lebuh Raja Hesekiah udah ngereja semua utai nya lalu nunjukka diri mengkang tetap ati betuaika TUHAN, Senakerip, raja menua Asiria, nyerang menua Judah. Iya ngelulung mayuh bengkah nengeri ti bekuta, lalu ngasuh bala soldadu iya ngeruntuhka kuta lalu tama ngagai nengeri nya.

²Lebuh Hesekiah meda Senakerip deka nyerang Jerusalem,

³iya enggau bala pemesai iya mutuska runding deka nutup semua penatai ai di luar nengeri; sida lalu nulung iya.

⁴Mayuh amat sida begempuru, lalu sida nutup semua penatai ai ti rarat nengah menua nya. Ku sida bejaku, “Awakka raja menua Asiria nadai tetemuka ai, lebuh iya datai.”

⁵Raja Hesekiah lalu bebendar amat gawa ngaduka kuta ti udah runtuh, lalu nirika menara ba kuta nya, lalu ngaga dinding ari luar dinding kuta nya. Nambahka nya, iya mega ngukuhka kuta ti udah digaga ba tanah tambun ba timur nengeri Jerusalem. Iya mega ngasuh orang begagaka sangkuh enggau terabai.

⁶Iya ngeletak pemesai soldadu nguluka semua orang ke lelaki di nengeri nya, lalu ngempuruka sida ba tengah padang di mua pintu kuta nengeri, lalu bejaku ngagai sida. Ku iya,

⁷“Kita enda tau enda kering sereta berani. Anang takutka raja orang Asiria, tauka bala soldadu ti diuluka iya, laban kuasa ti setanah enggau kitai besai agi ari kuasa ti setanah enggau iya.

⁸Iya semina bisi kuasa mensia, tang kitai bisi TUHAN Allah Taala kitai nulung kitai, lalu beperang ngarika kitai.” Orang mayuh berasai diperansang ninga jaku raja sida.

⁹Apin tentu lama udah bekau nya, lebuh Senakerip enggau bala soldadu iya agi di Lakis, iya ngirumka pesan tu ngagai Hesekiah enggau ngagai orang Judah ti diau enggau Hesekiah di Jerusalem:

¹⁰“Aku, Senakerip, Raja Besai menua Asiria nanyaka utai ti ngasuh kita kempang ati mengkang di Jerusalem dikelulung kami baka tu.

¹¹Hesekiah madahka ngagai kita, TUHAN Allah Taala kita deka ngelepaska kita ari jari kami, tang Hesekiah nipu kita, lalu iya deka nejuka kita mati keberuran enggau aus.

¹²Iya empu ti udah ngerusak semua endur alai nyembah TUHAN, enggau semua alta, lalu udah nya ngasuh orang Judah enggau orang Jerusalem nyembah sereta nunu menyan ba siti aja alta.

¹³Kati kita enda nemu utai ti udah dikereja aki ini aku, enggau utai ti udah dikereja aku empu ngagai orang bansa bukai? Kati petara orang bansa bukai udah kala ngelepaska bansa sida ari raja menua Asiria?

¹⁴Kemaya bala petara orang menua bukai bisi udah kala ngelepaska menua sida ari jari aku? Nya alai, nama utai ti ngasuh kita ngumbai petara kita deka ngelepaska kita ari jari aku?

¹⁵Nya alai anang nejuka Hesekiah nipu kita, tauka nesatka runding kita baka nya, lalu anang arapka iya, laban nadai petara orang bansa bukai udah ulih ngelepaska nembiak iya ari jari raja menua Asiria. Nya alai, petara kita tetap enda ulih ngelepaska kita ari jari aku!”

¹⁶Bala pemesai orang Asiria mega nyebut utai ti jai agi ari nya pasal TUHAN Allah Taala enggau pasal Hesekiah ti nyadi nembiak TUHAN.

¹⁷Raja besai menua Asiria mega nulis surat kena iya ngeleseka TUHAN Allah Taala ke disembah orang Israel, lalu bejaku ngelaban Iya. Ku iya, “Baka bala petara orang bansa bukai ke nadai udah kala ngelepaska bala nembiak sida ari jari aku, baka nya meh Allah Taala ti dikarapka Hesekiah, enda ulih ngelepaska bala nembiak Iya ari jari aku.”

¹⁸Bala pemesai orang Asiria lalu rauh-rauh nyebut utai nya dalam Hebrew kena sida ngemba sereta ngelemika semengat orang Jerusalem ke ba kuta nengeri, ngambika nengeri nya mudah agi alah.

¹⁹Sida bejakuka pasal Allah Taala nengeri Jerusalem baka ke bejakuka pasal petara orang bansa bukai, engkeramba ti digaga jari mensia.

²⁰Udah nya Raja Hesekiah enggau nabi Isaiah anak Amos lalu besampi ngagai Allah Taala, lalu nyabak minta tulung Iya.

²¹TUHAN lalu ngirumka siku melikat. Melikat nya lalu munuh bala soldadu enggau pemesai soldadu orang Asiria. Raja besai orang Asiria lalu pulai ngagai menua iya empu mai ati ti malu. Lebuh iya tama ngagai rumah sembiang petara iya, sekeda bala anak lelaki iya munuh iya ngena pedang.

²²Nya meh jalai TUHAN ngelepaska Raja Hesekiah enggau orang Jerusalem ari jari Senakerip, raja menua Asiria, enggau ari jari semua munsuh iya. TUHAN lalu ngibun sida likun.

²³Mayuh orang datai ngagai Jerusalem mai pemeri ngagai TUHAN, enggau pemeri ngagai Hesekiah. Kenyau ari nya semua bansa bebasaka Hesekiah magang.

²⁴Ba urung maya nya, Raja Hesekiah sakit, lalu nyau deka mati. Iya besampi ngagai TUHAN, lalu TUHAN nyaut iya lalu meri iya siti tanda.

²⁵Tang Hesekiah kelalu sumbung lalu enda meri terima kasihka utai ti udah dikereja TUHAN ba iya. Ketegal nya menua Judah enggau nengeri Jerusalem kena ukum.

²⁶Tang Hesekiah enggau orang Jerusalem ngemaruhka diri, lalu TUHAN enda nyadi ngukum orang mayuh nyentuk ngagai pemati Hesekiah.

²⁷Raja Hesekiah nyadi kaya bendar, lalu semua orang bebasaka iya. Iya ngasuh orang ngaga bilik setor alai iya nyimpan emas, pirak, batu ti berega, rempah, terabai, enggau utai bukai ti berega ti diempu iya.

²⁸Nambahka nya, iya mega ngasuh orang ngaga bilik setor alai iya nyimpan gandum, wain, enggau minyak kana, bansal ke jelu sapi iya, enggau kandang ke jelu bedus iya.

²⁹Kelimpah ari semua utai nya, Allah Taala mega meri iya jelu bedus enggau jelu sapi, enggau pengaya ti amat mayuh, datai ke nyau ulih nirika mayuh bengkah nengeri.

³⁰Raja Hesekiah nya meh orang ke mempal jalai ai ba Mata Ai Gihon, lalu ngasuh ai nya rarat nengah lubang jalai ai dalam kuta nengeri Jerusalem. Hesekiah mujur magang dalam semua utai ti dikereja iya,

³¹lalu lebuh bala pengari perintah menua Babilon datai betanyaka utai ti nyelai ti udah nyadi di menua nya, Allah Taala nejuka Hesekiah ngereja utai nitihka peneka ati iya empu, kena Allah Taala ngabas ati Hesekiah.

³²Semua utai bukai ti udah dikereja Raja Hesekiah, enggau pengangkun iya ke TUHAN bisi dituliska magang dalam Genera Nabi Isaiah anak Amos enggau dalam Jerita Lama Pasal Raja Menua Judah Enggau Menua Israel

³³Hesekiah mati lalu dikuburka ba sadau lumbung bala raja. Semua orang Judah enggau orang ke diau di Jerusalem balat amat masa iya lebuh pemati iya. Anak iya ke benama Manasi lalu nganti iya nyadi raja.