Read Iban 2 Bansa Israel 33 Bible Online

2 Bansa Israel 33 - Iban bible

2 Bansa Israel 33

¹Umur Manasi dua belas taun lebuh iya nyadi raja menua Judah, lalu iya merintah di Jerusalem lima puluh lima taun.

² Manasi bedosa ngelaban TUHAN laban iya nunda pengawa ti jai ti dikereja bansa orang ke udah diburu TUHAN ari menua nya lebuh bala nembiak TUHAN nyerang.

³Iya ngaduka endur alai orang kapir nyembah petara sida, ti udah dirusak apai iya Hesekiah. Iya ngaga alta alai nyembah Baal, ngaga engkeramba ke petara Aserah, sereta nyembah bintang.

⁴ Iya ngaga alta alai orang kapir nyembah petara sida dalam Rumah Sembiang, iya nya endur ti udah diletak TUHAN alai TUHAN Empu patut disembah belama iya.

⁵Iya ngaga alta kena nyembah bintang ba dua iti tengah laman Rumah Sembiang.

⁶Iya nyerahka bala anak lelaki iya nyadika piring tunu ba Lebak Hinom. Iya beburung, bedukun, bemanang, betanya ngagai orang ke tau tujum, enggau ngagai manang. Iya balat bedosa ngelaban TUHAN, lalu nyungkak TUHAN ringat.

⁷ Iya ngengkahka siti engkeramba dalam Rumah Sembiang, endur ti udah dipadahka Allah Taala ngagai David enggau ngagai anak iya Solomon munyi tu: “Di Jerusalem ditu, dalam Rumah Sembiang tu meh endur ti udah dipilih Aku, ari semua dua belas bengkah sitak menua ti diempu raban bansa orang Israel, nyadi endur alai Aku patut disembah.

⁸Lalu enti orang Israel deka ngasika semua pesan Aku, lalu nitihka semua Adat ti udah diberi nembiak Aku Moses ngagai sida, nya baru Aku enggai nejuka sida dibuai ari menua ti udah diberi Aku ngagai aki ini sida.”

⁹Manasi nguluka orang Judah lebih agi bedosa ari bansa orang ke udah diburu TUHAN ari menua nya lebuh bala nembiak TUHAN nyerang.

¹⁰Taja pen TUHAN meri jaku tangkan ngagai Manasi, enggau ngagai bala nembiak iya, tang sida enggai mending.

¹¹Nya alai TUHAN nejuka bala tuai soldadu menua Asiria nyerang menua Judah. Sida nangkap Manasi, ngaitka pengait ba iya, nanchang iya ngena rantai, lalu nabanka iya ngagai menua Babilon.

¹²Lebuh iya kena perinsa, iya ngemaruhka diri, nguing ngagai TUHAN Allah Taala iya, lalu minta tulung ari Iya.

¹³Allah Taala nerima lalu nyaut sampi Manasi, lalu ngasuh iya pulai baru ngagai Jerusalem lalu merintah baru. Tu meh utai ti ngasuh Manasi arapka TUHAN endang Allah Taala.

¹⁴Udah bekau nya, Manasi ngaga kuta ti di luar ba tisi timur Nengeri David tinggi agi, berengkah ari siti endur ba lebak semak Mata Ai Gihon, nuju ke utara ngagai Pintu Ikan, enggau ngagai endur ti dikumbai Opel dalam nengeri nya. Iya mega ngeletak siku pemesai soldadu nyadi tuai soldadu dalam genap buah nengeri ti bekuta dalam menua Judah.

¹⁵Iya muai semua petara orang bansa bukai enggau engkeramba ari Rumah Sembiang, enggau alta alai orang bansa bukai besembah ba bukit ti alai Rumah Sembiang bediri, enggau ari endur bukai di Jerusalem. Iya mai semua utai nya ke luar ari nengeri nya, lalu muai sida.

¹⁶Iya mega ngaduka alta alai TUHAN ti udah disembah, lalu iya ngenjuk piring pemaik, enggau piring terima kasih ba alta nya. Iya ngasuh semua orang Judah nyembah TUHAN Allah Taala ke disembah orang Israel.

¹⁷Taja pen orang mayuh majak ngenjuk piring ba endur bukai, tang sida semina ngenjuk piring nya ngagai TUHAN siku aja.

¹⁸Semua utai bukai ti udah dikereja Manasi, sampi ti disebut iya ngagai Allah Taala, enggau pesan ari bala nabi ke bejaku ngagai iya dalam nama TUHAN Allah Taala ke disembah orang Israel, bisi dituliska magang dalam Jerita Lama Pasal Raja Menua Judah Enggau Raja Menua Israel.

¹⁹Sampi raja, enggau saut Allah Taala ngagai sampi iya, enggau cherita pasal dosa iya sebedau iya nesal ati - penyai ti udah dikereja iya, endur alai orang kapir nyembah petara sida, enggau tanda petara indu Aserah ti udah digaga iya, enggau engkeramba ti udah disembah iya - bisi dituliska magang dalam Jerita Lama Pasal Bala Nabi.

²⁰Manasi mati lalu dikuburka dalam istana, lalu anak lelaki iya ke benama Amon nganti iya nyadi raja.

²¹Umur Amon dua puluh dua taun lebuh iya nyadi raja menua Judah, lalu iya merintah di Jerusalem dua taun.

²²Iya bedosa ngelaban TUHAN baka apai iya Manasi, sereta besembahka engkeramba ti udah disembah apai iya.

²³Tang iya enda ngemaruhka diri, lalu nguing ngagai TUHAN baka apai iya. Iya balat agi bedosa ari apai iya.

²⁴Bala pemesai Amon bepekat ngelaban iya, lalu sida munuh iya dalam istana.

²⁵Orang Judah lalu munuh bala orang ke munuh Amon, lalu ngasuh anak iya ke benama Josiah nyadi raja.