Read Iban 2 Bansa Israel 34 Bible Online

2 Bansa Israel 34 - Iban bible

2 Bansa Israel 34

¹ Umur Joasih lapan taun lebuh iya nyadi raja menua Judah, lalu iya merintah di Jerusalem tiga puluh satu taun.

²Iya ngereja utai ti ngerinduka ati TUHAN. Iya neladan aki iya Raja David, terit amat ngasika semua adat Allah Taala.

³Dalam taun ti kelapan Josiah udah nyadi raja, lebuh iya agi biak, iya belabuh nyembah Allah Taala aki iya Raja David. Empat taun udah bekau nya, iya belabuh ngerusak endur alai orang kapir nyembah petara sida, ngerusak tanda petara indu Aserah, enggau semua engkeramba ti bukai.

⁴ Nitihka atur ti diberi iya, alta alai nyembah Baal dipechahka, lalu alta ti alai nunu menyan semak alta nya dirubuh. Sida nutuk semua engkeramba Aserah, enggau semua engkeramba bukai, nyadi amau lalu udah nya naburka amau nya ba kubur orang ke udah ngenjuk piring ngagai engkeramba nya.

⁵ Iya nunu tulang bala imam orang kapir ba alta alai sida ke nyembah engkeramba sida. Nya meh jalai iya nuchi menua Judah enggau nengeri Jerusalem.

⁶Iya mega ngereja baka nya ngagai nengeri enggau endur ti udah dirusak di menua Manasi, Epraim, enggau Simeon, nyentuk ngagai Naptali di utara.

⁷Di serata menua ti dipegai iya di utara, iya mechahka alta enggau engkeramba Aserah, nutuk engkeramba sida nyadi amau, lalu mechahka alta ti alai sida nunu menyan. Udah nya iya pulai ngagai Jerusalem.

⁸Dalam taun ti kelapan belas iya udah megai perintah, lebuh iya udah nuchi menua nya enggau Rumah Sembiang lalu nutup semua pengawa orang kapir ke besembahka engkeramba, Raja Josiah lalu ngasuh tiga iku orang ngaduka Rumah Sembiang Allah Taala. Sida tiga nya Sapan anak Asaliah, Maseiah ti nyadi tuan gabenor nengeri Jerusalem, enggau Joah anak Joahas, siku pemesai ti tinggi pangkat.

⁹Duit ti udah digumpul orang Lewi ke nyaga Rumah Sembiang lalu diserahka ngagai Imam Besai Hilkiah. (Duit nya udah digumpul ari orang Epraim enggau orang Manasi, enggau ari orang bukai ti diau di menua ti di utara, enggau ari orang ke diau di menua Judah, Benjamin enggau Jerusalem.)

¹⁰Udah nya duit nya lalu diserahka ngagai tiga iku orang ke nyadi tuai ngaduka Rumah Sembiang, ke meri duit nya ngagai

¹¹bala tukang kayu, enggau tukang rumah kena sida bebelika batu enggau ramu kena ngaduka semua rumah ti udah ditejuka bala raja menua Judah buruk lalu enda diaduka baru ngelamatu.

¹²Orang ke ngereja pengawa nya endang tetap tau dikarapka. Sida iya dikemataka empat iku orang Lewi: Jahat seduai Obadiah ari raban peturun Merari, enggau Sekariah seduai Mesulam ari raban peturun Kohat. (Semua orang Lewi landik magang nebah musik.)

¹³Orang Lewi ti bukai megai pengawa berangkutka barang kena ngaga rumah nya, sereta ngemataka bala orang ke gawa ngereja mayuh bengkah pengawa. Lalu sida ti bukai bekereja nyadi kerani, tauka nyadi jejaga.

¹⁴Lebuh duit nya benung dipansutka ari bilik setor, Hilkiah bisi tetemuka Bup Adat TUHAN, iya nya Adat ti udah diberi Allah Taala ngagai Moses.

¹⁵Ku iya bejaku enggau Sapan, “Aku bisi tetemuka Bup Adat dalam Rumah Sembiang.” Iya lalu meri bup nya ngagai Sapan.

¹⁶Sapan lalu mai bup nya ngagai raja. Ku Sapan madahka ngagai raja, “Kami udah ngereja semua utai ti diasuh nuan.

¹⁷Kami udah ngambi duit ti disimpan dalam Rumah Sembiang, lalu udah nyerahka duit nya ngagai bala orang ke gawa enggau orang ke ngemataka sida.”

¹⁸Lalu ku Sapan nambahka jaku iya, “Imam Hilkiah udah meri siti bup ngagai aku.” Sapan lalu macha bup nya di mua raja.

¹⁹Lebuh raja ninga bup nya dibacha, iya lalu nyarikka gari diri.

²⁰Udah nya raja meri atur ngagai Hilkiah, Ahikam anak Sapan, Abdon [31] anak Mikaiah, Sapan ti nyadi kerani kot, enggau ngagai Asaiah, ti nyadi penyaup raja:

²¹“Mupuk kita lalu betanya ngagai TUHAN ngarika aku enggau ngarika orang mayuh ti agi tinggal di menua Israel enggau menua Judah. Pansik semua utai pasal ajar dalam bup tu. TUHAN balat ringat ngagai kitai laban aki ini kitai enda ngasika jaku TUHAN, lalu enda ngereja utai ti patut dikereja nitihka bup tu.”

²²Raja lalu ngasuh Hilkiah enggau sida ti bukai mansang betanya ngagai nabi indu siku ke benama Huldah, ti diau ba Jerusalem ti baru. Indu nya bini Salum anak Tokhat, uchu Haras ti nyadi tuai ngintu baju panjai ti dikena dalam Rumah Sembiang. Sida lalu madahka ngagai indu nya utai ti udah nyadi.

²³Iya lalu ngasuh sida pulai ngagai raja lalu meri

²⁴pesan TUHAN tu ngagai iya: “Aku deka ngukum Jerusalem enggau semua orang ke diau di nengeri tu ngena sumpah ti ditulis dalam bup ti udah dibacha di mua raja.

²⁵Sida udah nulak Aku, lalu udah ngenjuk piring ngagai petara bukai. Nya alai sida udah nyungkak Aku ringat ketegal semua utai ti udah dikereja sida. Aku ringat ngagai Jerusalem, lalu pengeringat Aku enda nemu padam.

²⁶Nyadi pasal raja empu, tu utai ti disebut Aku, TUHAN Allah Taala ke disembah orang Israel: Nuan udah mendingka utai ti ditulis dalam bup nya,

²⁷lalu nuan udah nesal ati sereta ngemaruhka diri di mua Aku, nyarikka gari diri sereta nyabak lebuh nuan ninga Aku deka ngukum Jerusalem enggau orang ke diau dalam nengeri tu. Aku udah ninga sampi nuan,

²⁸lalu ukum ti deka diasuh Aku ninggang Jerusalem enda nyadi sebedau nuan mati. Aku deka nejuka nuan mati enggau selamat.” Bala orang nya lalu pulai baru ngagai Raja Josiah, mai pesan nya.

²⁹Raja Josiah lalu mesanka semua tuai orang Judah enggau tuai di Jerusalem.

³⁰Sida lalu mansang ngagai Rumah Sembiang, disempulang bala imam enggau orang Lewi, enggau semua orang mayuh, ke kaya enggau ke seranta. Raja lalu macha enggau nyawa ti inggar semua bup sempekat ti udah ditemu dalam Rumah Sembiang.

³¹Iya bediri ngimbai tiang diraja [32] lalu ngaga siti sempekat enggau TUHAN, madahka iya deka ngasika TUHAN, deka nitihka adat enggau pesan TUHAN enggau pengabis ati enggau pengabis semengat iya, lalu ngereja semua atur ti diletak dalam sempekat nya, munyi ti ditulis dalam bup nya.

³²Iya ngasuh semua orang Benjamin enggau semua orang ke bisi di Jerusalem, besemaya deka nitihka sempekat nya. Nya alai orang di Jerusalem ngasika atur sempekat ti udah digaga sida enggau Allah Taala aki ini sida.

³³Raja Josiah ngerusak semua engkeramba di menua ti diempu orang Israel. Seagi-agi iya idup, sida semampai nitihka TUHAN Allah Taala aki ini sida.