Read Iban 2 Bansa Israel 36 Bible Online

2 Bansa Israel 36 - Iban bible

2 Bansa Israel 36

¹Orang Israel milih Joahas anak Josiah nyadi raja di Jerusalem, lalu nata iya.

²Umur Joahas dua puluh tiga taun lebuh iya berengkah nyadi raja menua Judah, lalu iya merintah di Jerusalem tiga bulan.

³Raja Neko menua Ejip nabanka iya nyadi orang tangkap, lalu mejalka menua Judah mayar 3,400 kilogram pirak enggau 34 kilogram emas nyadika chukai.

⁴ Neko ngasuh menyadi lelaki Joahas ke benama Eliakim nyadi raja menua Judah, lalu nukar nama Eliakim ngagai Jehoiakim. Joahas udah ditabanka Neko ngagai menua Ejip.

⁵ Umur Jehoiakim dua puluh lima taun lebuh iya berengkah nyadi raja menua Judah, lalu iya merintah di Jerusalem sebelas taun. Iya bedosa ngelaban TUHAN Allah Taala iya.

⁶ Raja Nebukadnesar menua Babilon nyerang menua Judah, nangkap Jehoiakim, lalu nabanka iya ngagai menua Babilon ditanchang ngena rantai.

⁷Nebukadnesar nabanka sekeda utai ti berega ari Rumah Sembiang, lalu nyimpan utai nya dalam istana iya empu di Babilon.

⁸Semua utai ti udah dikereja Jehoiakim, nyengkaum utai ti jai ti dikereja iya, bisi dituliska magang dalam Jerita Lama Pasal Raja Menua Israel enggau Menua Judah. Anak lelaki iya Jehoiakin nganti iya nyadi raja.

⁹Umur Jehoiakin lapan belas [33] taun lebuh iya berengkah nyadi raja menua Judah, lalu iya merintah di Jerusalem tiga bulan sepuluh hari. Jehoiakin mega bedosa ngelaban TUHAN.

¹⁰ Ba pun musin panas, Raja Nebukadnesar nabanka Jehoiakin ngagai menua Babilon nyadi orang tangkap, lalu nabanka utai ti berega ari Rumah Sembiang. Udah nya Nebukadnesar ngasuh aya Jehoiakin [34] ke benama Sedekiah nyadi raja menua Judah enggau Jerusalem.

¹¹ Umur Sedekiah dua puluh satu taun lebuh iya berengkah nyadi raja menua Judah, lalu iya merintah di Jerusalem sebelas taun.

¹²Iya bedosa ngelaban TUHAN, lalu enda ngemaruhka diri mendingka nabi Jeremiah, ke madahka jaku TUHAN.

¹³ Sedekiah angkat ngelaban Raja Nebukadnesar, ti udah mejalka iya besumpah dalam nama Allah Taala madahka diri deka taluk. Iya kieh amat, enggai nesal ati lalu enggai pulai baru ngagai TUHAN Allah Taala ke disembah orang Israel.

¹⁴Nambahka nya, bala tuai orang Judah, bala imam, enggau orang mayuh nunda teladan ti jai ari bansa orang ke ngelingi sida, besembahka engkeramba, lalu ari nya ngamahka Rumah Sembiang, ti udah dikuduska TUHAN Empu.

¹⁵TUHAN Allah Taala aki ini sida udah majak ngasuh bala nabi Iya meri jaku tangkan ngagai bala nembiak Iya, laban Iya enggai ke sida enggau Rumah Sembiang nya dirusak.

¹⁶Tang sida beduan bala orang ke mai pesan Allah Taala, enda mendingka jaku TUHAN, lalu ketawaka bala nabi Iya. Ke pengujung iya, TUHAN balat amat ringat ngagai bala nembiak Iya, datai ke sida nyau enda ulih ngerarika diri ari ukum Iya.

¹⁷ Nya alai TUHAN ngasuh raja menua Babilon nyerang sida. Raja nya munuh bala orang Judah ke bujang, nyengkaum sida ke dalam Rumah Sembiang. Iya nadai kasih mimit ke sida, nemuka sida nya orang ke biak tauka tuai, lelaki tauka indu, sakit tauka bepengerai. Allah Taala nyerahka semua sida ngagai raja menua Babilon.

¹⁸Raja menua Babilon ngerampas utai ari Rumah Sembiang, ari sarang reta Rumah Sembiang, enggau pengaya raja enggau bala pemesai iya, lalu nabanka semua utai nya ngagai menua Babilon.

¹⁹ Iya nunu Rumah Sembiang, enggau nengeri Jerusalem, nyengkaum semua istana enggau pengaya nengeri nya, lalu ngeruntuhka kuta nengeri.

²⁰Iya nabanka semua orang ke enda dibunuh, ngagai menua Babilon. Din sida nyadi ulun bekereja ke iya, enggau ke peturun iya, nyentuk ngagai maya perintah menua Persia ditumbuhka.

²¹ Nya meh jalai utai ti udah dipadahka TUHAN ngena nabi Jeremiah dikamatka: “Menua nya nadai orang nguan tujuh puluh taun, kena malas pengawa sida ke enda ngintu Hari Sabat.” [35]

²²Dalam taun ti kesatu Sairus nyadi raja besai menua Persia, [36] TUHAN ngamatka jaku ti udah disebut Iya ngena nabi Jeremiah. Iya nyungkak Sairus meri atur, lalu ngirumka atur nya ngena surat, ngambika bisi dibacha enggau nyawa ti inggar di serata menua ti diperintah iya:

²³ “Tu atur ari Sairus, Raja Besai menua Persia. TUHAN Allah Taala serega, udah ngasuh aku merintah semua dunya, lalu udah meri ngagai aku tanggungjawap ngaga sebuah Rumah Sembiang ke Iya di Jerusalem, di menua Judah. Nya alai semua kita ke nembiak Allah Taala, enda tau enda kin; awakka TUHAN Allah Taala kita meruan enggau kita.”