Read Iban 2 Bansa Israel 4 Bible Online

2 Bansa Israel 4 - Iban bible

2 Bansa Israel 4

¹ Raja Solomon ngasuh orang ngaga siti alta temaga, 9 meter besegi, lalu peninggi iya 4.5 meter.

²Iya mega ngaga, ari temaga, sigi tangki ti segala, penalam 2.2 meter, buka 4.4 meter, lalu sakap iya 13.2 meter.

³Ngelingi tisi tangki nya ari luar [5] bisi dua iti rintai ukir ti beranggung dua. Ukir nya digaga neladan gamal sapi ti lelaki, lalu digaga ari temaga ti dikena ngaga tangki nya empu.

⁴Tangki nya diengkah ba atas belakang dua belas iku sapi ti lelaki ti digaga ari temaga, ti nunga ke luar, tiga nunga ke utara, tiga nunga ke barat, tiga nunga ke selatan lalu tiga nunga ke timur.

⁵Penebal dinding tangki nya 75 milimeter. Lilit tisi tangki nya baka lilit tisi mangkuk, melebir ke luar baka kuntum bungai. Tangki nya ulih ngundan kira 60,000 liter.

⁶ Sida mega ngaga sepuluh iti bisin, lima deka diengkah ba tisi selatan Rumah Sembiang, lalu lima ba tisi ti muak ke utara. Bisin nya dikena masu perengka tubuh jelu ti deka ditunu nyadika piring. Ai ti dalam tangki nya dikena bala imam masu diri.

⁷ Sida ngaga sepuluh iti penuduk lampu ari emas nitihka gamal ti selama, enggau sepuluh iti mija, lalu ngengkahka utai nya dalam bilik besai Rumah Sembiang, lima iti penuduk lampu enggau lima iti mija ba siti-siti tisi. Sida mega ngaga seratus igi mangkuk emas.

⁹Sida ngaga siti tengah laman ti di dalam ke bala imam, enggau tengah laman ti di luar. Pintu ti ba lubang pintu ti nyeraraka tengah laman dua iti nya disampak enggau temaga.

¹⁰Tangki nya diengkah semak sukut ti muak ke timur selatan.

¹¹Huram mega ngaga periuk, sandak, enggau mangkuk. Nitihka semaya iya enggau Raja Solomon, tu bagi semua utai ti tembu digaga iya ke Rumah Sembiang: Tiang besai ti dua batang Tutup tiang ti baka mangkuk ba puchuk tiang ti dua batang nya Ukir rantai ti dianyam, ti ba siti-siti tutup tiang Empat ratus igi buah delima ti digaga ari temaga ti ditusun berintai dua ngelingi ukir ti ba tutup tiang siti-siti Sepuluh buah kerita tarit Sepuluh iti bisin Tangki Dua belas iku sapi ti lelaki alai manggaika tangki nya Periuk, sandak enggau serampang Huram, ke endang amat landik begagaka utai, ngaga semua utai nya ari temaga magang, nitihka jaku Raja Solomon. Semua utai nya deka dikena dalam Rumah Sembiang.

¹⁷Raja ngasuh semua utai nya digaga ba endur alai orang ke ngeluluhka besi ba entara Sukot enggau Seredah [6] ba Lebak Jordan.

¹⁸Mayuh amat utai digaga, datai ke orang nyau enggai agi kiruh ngira pemayuh temaga ti dikena.

¹⁹Raja Solomon mega ngasuh pekekas emas digagaka Rumah Sembiang: alta enggau mija alai engkah roti ti diberi ngagai Allah Taala;

²⁰penuduk lampu, enggau lampu, ari emas ti alus. Lampu nya deka menyadi di mua Endur ti Pemadu Kudus nitihka atur;

²¹ukir bungai, lampu, enggau penyepit;

²²pekekas kena madamka api, mangkuk, pinggai alai engkah menyan, enggau talam kena mai bara api. Semua utai tu digaga ari emas ti tulin magang. Pintu luar ke Rumah Sembiang, enggau pintu ngagai Endur ti Pemadu Kudus disampak enggau emas magang.