Read Iban 2 Bansa Israel 5 Bible Online

2 Bansa Israel 5 - Iban bible

2 Bansa Israel 5

¹ Lebuh Raja Solomon udah nembuka semua pengawa begagaka Rumah Sembiang, iya lalu nyimpan dalam bilik setor Rumah Sembiang semua utai ti udah diserahka apai iya David ngagai TUHAN, iya nya pirak, emas enggau utai bukai.

² Udah nya Raja Solomon mesanka semua tuai raban bansa enggau tuai peturun orang Israel ngasuh sida begempuru di Jerusalem, deka mindahka Peti Lampang Batu Adat TUHAN ari Sion, Nengeri David, ngagai Rumah Sembiang.

³Semua sida begempuru lebuh maya Gawai Belangkau.

⁴Lebuh semua bala tuai udah sampal datai, bala orang Lewi lalu nanggung Peti Lampang Batu Adat TUHAN

⁵lalu ngesan iya ngagai Rumah Sembiang. Bala imam enggau orang Lewi mega mindahka Langkau Kain TUHAN, enggau semua pekekas dia ngagai Rumah Sembiang.

⁶Raja Solomon enggau semua orang Israel begempuru di mua Peti Lampang Batu Adat nya, lalu meri mayuh amat jelu bedus enggau jelu sapi nyadika piring, datai ke jelu nya nyau enda ulih diitung agi.

⁷Udah nya bala imam lalu ngesan Peti Lampang Batu Adat nya ngagai Rumah Sembiang, lalu ngengkahka iya dalam Endur ti Pemadu Kudus, di baruh dua iku melikat cherub ti besayap.

⁸Sayap melikat cherub dua iku nya dikerembaika mungkur Peti nya, enggau kayu ti dikena ngaling iya.

⁹Puting kayu nya ulih dipeda orang ke bediri di mua Endur ti Pemadu Kudus, tang enda ulih dipeda ari endur bukai. (Kayu ti dikena ngesan Peti nya agi bisi dia datai ke sehari tu.)

¹⁰ Peti Lampang Batu Adat nya nadai ngundan utai bukai tang semina dua iti lampang batu ti udah diengkah Moses dalam Peti nya ba Bukit Sinai, lebuh TUHAN ngaga sempekat enggau bala nembiak Iya orang Israel, lebuh sida pansut ari menua Ejip.

¹¹ Semua imam ke bisi dia, enda milih raban, bela udah nuchi diri empu magang. Semua orang Lewi ke nebah musik, iya nya, Asap, Heman, Jedutun, enggau semua raban peturun sida, sama ngena kain linin magang. Bala orang Lewi bediri semak tisi timur alta nya mai bebendai enggau belikan. Sama enggau sida nya bisi 120 iku bala imam ke nyepu terumpit. Bala orang ke belagu nya diumba ngena munyi terumpit, bebendai, enggau pekekas musik ti bukai, lebuh sida belagu muji TUHAN: “Pujika TUHAN, laban Iya endang manah, lalu pengerindu Iya meruan belama iya.” Lebuh bala imam angkat ari Rumah Sembiang nya, Rumah nya lalu ngenyit penuh laban mua hari ti beperenching laban penampak mulia TUHAN, lalu sida enda ulih nampung pengawa sida ke nyembah TUHAN.