Read Iban 2 Bansa Israel 6 Bible Online

2 Bansa Israel 6 - Iban bible

2 Bansa Israel 6

¹Udah nya Raja Solomon besampi, “TUHAN, Nuan rindu diau dalam mua hari enggau pemetang.

²Diatu aku udah ngaga sebuah rumah ti manah ke Nuan, alai Nuan diau belama iya.”

³Semua orang bela bediri dia. Raja nguing ngagai sida, lalu minta Allah Taala merekatka sida.

⁴ Ku iya bejaku, “Pujika TUHAN Allah Taala ke disembah orang Israel! Iya udah ngamatka semaya ti udah digaga Iya enggau apai aku David lebuh Iya bejaku munyi tu,

⁵‘Kenyau ari maya Aku udah mai bala nembiak Aku pansut ari menua Ejip nyentuk ngagai diatu, Aku apin milih nengeri di menua Israel nyadi endur alai sebuah rumah deka digaga, alai kita deka nyembah Aku, lalu Aku apin milih sapa orang ke deka nguluka nembiak Aku Israel.

⁶Tang diatu Aku udah milih Jerusalem nyadi endur alai kita deka nyembah Aku, lalu nuan, David, deka merintah bala nembiak Aku.’ ”

⁷Lalu ku Solomon nampung jaku iya, “Apai aku David udah bekira deka ngaga sebuah rumah alai nyembah TUHAN Allah Taala ke disembah orang Israel,

⁸tang ku TUHAN bejaku ngagai iya, ‘Ati nuan ti deka ngaga rumah ke Aku endang ngena,

⁹tang ukai nuan ti deka ngaga rumah nya. Anak nuan, anak nuan empu, deka ngaga rumah Aku.’

¹⁰“Diatu TUHAN udah ngamatka semaya Iya. Aku udah nganti apai aku nyadi raja menua Israel, lalu aku udah ngaga sebuah rumah alai nyembah TUHAN Allah Taala ke disembah orang Israel.

¹¹Aku udah ngengkahka dalam Rumah Sembiang Peti Lampang Batu Adat ti ngundan lampang batu sempekat ti udah digaga TUHAN enggau orang Israel.”

¹²Udah nya, di mua orang mayuh, Solomon mansang lalu bediri di mua alta, ngangkatka jari iya lalu besampi. (

¹³Solomon udah ngaga siti panggau temaga, lalu udah ngengkahka panggau nya ba tengah laman. Panggau nya 2.2 meter besegi, enggau 1.3 meter peninggi. Iya niki ngagai panggau nya, besugang di mua semua orang mayuh, lalu ngangkatka jari iya tunga ke langit.)

¹⁴Ku iya besampi, “TUHAN Allah Taala ke disembah orang Israel, nadai petara ti baka Nuan di langit enggau di dunya. Nuan ngamatka semaya Nuan enggau bala nembiak Nuan, lalu ngayanka pengerindu Nuan ke sida, lebuh sida diau ngasika Nuan enggau pengabis ati sida.

¹⁵Nuan udah ngamatka semaya ti udah digaga Nuan enggau apai aku David. Sehari tu semua leka jaku semaya nya udah dikamatka magang.

¹⁶ Nya alai, TUHAN Allah Taala ke disembah orang Israel, kamatka meh semaya ti udah digaga Nuan enggau apai aku lebuh Nuan madahka siku ari peturun iya deka seruran merintah nyadi raja orang Israel, enti iya bejimat ngasika Adat Nuan, baka David empu.

¹⁷Nya alai diatu, TUHAN Allah Taala ke disembah orang Israel, awakka semua utai ti udah disemaya Nuan enggau nembiak Nuan David, dikamatka magang.

¹⁸ “Tang kati Nuan, O TUHAN, amat ulih diau di dunya tu begulai enggau orang lelaki enggau indu? Indah semua langit deh enda ulih ngundan Nuan, nya alai baka ni ku Rumah Sembiang tu ulih ngundan Nuan?

¹⁹TUHAN Allah Taala aku, aku tu nembiak Nuan. Pendingka sampi aku, lalu beri utai ti dipinta aku ari Nuan.

²⁰ Ibun Rumah Sembiang tu siang malam. Nuan udah besemaya madahka Diri deka disembah ba endur tu, nya alai dingaka aku lebuh aku ngadap ngagai Rumah Sembiang tu lalu besampi.

²¹Dingaka sampi aku enggau sampi bala nembiak Nuan orang Israel, lebuh sida ngadap ngagai endur tu lalu besampi. Dingaka kami ari rumah Nuan ti di serega, lalu ampun kami.

²²“Lebuh orang kena dawa ngereja penyalah, lalu dibai ngagai alta Nuan dalam Rumah Sembiang tu, alai sida deka besumpah madahka diri nadai penyalah,

²³pendingka sida ari serega, O TUHAN, lalu akim meh bala nembiak Nuan. Ukum meh orang ke salah, nitihka pematut, lalu lepaska orang ke nadai penyalah.

²⁴“Lebuh bala nembiak Nuan orang Israel alah laban munsuh, laban sida udah bedosa ngelaban Nuan, lalu udah nya, lebuh sida nguingka diri ngagai Nuan, lalu datai ngagai Rumah Sembiang tu, sereta ngemaruhka diri besampi minta nuan ngampun sida,

²⁵pendingka sida ari serega. Ampun dosa sida, lalu bai sida pulai baru ngagai menua ti udah diberi Nuan ngagai aki ini sida.

²⁶“Lebuh Nuan nagang hari ujan laban bala nembiak Nuan udah bedosa ngelaban Nuan, lalu udah nya, lebuh sida nesal ati lalu ngadap ngagai Rumah Sembiang tu, sereta ngemaruhka diri besampi ngagai Nuan,

²⁷pendingka sida ari serega, O TUHAN, lalu ampun dosa sida orang Israel, lalu ajar sida ngereja utai ti ngena. Udah nya, O TUHAN, asuh hari ujan di menua Nuan tu, ti udah diberi Nuan ngagai bala nembiak Nuan nyadika pesaka sida belama iya.

²⁸“Lebuh lapar pungkang nyadi di menua tu, tauka penyakit, tauka utai ti ditanam rusak laban ribut ti angat, tauka rusak laban raban buntak, tauka lebuh bala nembiak Nuan diserang munsuh, tauka lebuh penyakit tauka pemedis bisi nyadi ba bala sida,

²⁹pendingka sampi sida. Enti bala nembiak Nuan Israel, ari ati ti balat tusah, ngangkatka jari sida besampi ngadap ngagai Rumah Sembiang tu,

³⁰dingaka sampi sida. Dingaka sida ari rumah Nuan di serega, lalu ampun sida. Semina Nuan siku aja ke nemu runding enggau ati mensia. Kereja utai ba kami nitihka pematut,

³¹ngambika bala nembiak Nuan deka seruran nangi sereta ngasika Nuan lebuh sida diau di menua ti udah diberi Nuan ngagai aki ini sida.

³²“Lebuh orang bansa bukai ke diau di menua ti jauh, ninga pasal pemesai kuasa Nuan, enggau pasal Nuan ke seruran sedia deka nulung, lalu udah nya sida datai ngagai Rumah Sembiang tu lalu besampi,

³³pendingka sampi sida. Dingaka sida ari serega, alai Nuan ti diau, lalu kereja utai ti dipinta sida, ngambika semua orang di dunya tu nemu Nuan lalu ngasika Nuan, baka bala nembiak Nuan Israel. Nya baru sida deka nemu Rumah Sembiang ti udah digaga aku tu endang endur alai Nuan patut disembah.

³⁴“Lebuh Nuan ngasuh bala nembiak Nuan mansang beperang ngelaban munsuh sida, lalu sida besampi ngagai Nuan, enda milih endur alai sida, lalu sida nguing tunga ngagai nengeri ti udah dipilih Nuan tu, enggau ngagai Rumah Sembiang tu ti udah digaga aku ke Nuan,

³⁵pendingka sampi sida. Dingaka sida ari serega, lalu beri sida pemenang.

³⁶“Lebuh bala nembiak Nuan bedosa ngelaban Nuan, laban nadai siku mensia ti enda bedosa, lalu Nuan ringat lalu nejuka munsuh sida ngalahka sida, lalu nabanka sida nyadi orang tangkap ngagai menua bukai, taja pen menua nya jauh,

³⁷pendingka sampi sida. Enti sida nesal ati lebuh sida di menua nya, lalu besampi ngagai Nuan, ngaku dosa enggau penyai sida, dingaka sampi sida, O TUHAN.

³⁸Enti sida amat nesal ati lebuh sida di menua nya, lalu besampi ngagai Nuan, lalu sida nguingka mua sida tunga ngagai menua tu ti udah diberi Nuan ngagai aki ini sida, nengeri tu ti udah dipilih Nuan, enggau Rumah Sembiang tu ti udah digaga aku ke Nuan,

³⁹pendingka sampi sida. Dingaka sida ari rumah Nuan di serega. Kasihka sida lalu ampun semua dosa sida.

⁴⁰“Peda meh kami tu diatu, O Allah Taala aku, lalu pendingka sampi ti diberi ba endur tu.

⁴¹ Angkat meh Nuan, TUHAN Allah Taala, lalu tama ngagai Rumah Nuan, sama enggau Peti Lampang Batu Adat, lalu diau dia belama iya. Berekatka bala imam Nuan dalam semua utai ti dikereja sida, lalu awakka semua nembiak Nuan lantang laban pemadas Nuan enggau sida.

⁴²TUHAN Allah Taala, anang nulak raja ti udah dipilih Nuan. Kingatka pengerindu Nuan ke nembiak Nuan David.” [7]