Read Iban 2 Bansa Israel 7 Bible Online

2 Bansa Israel 7 - Iban bible

2 Bansa Israel 7

¹ Lebuh Raja Solomon udah badu besampi, api lalu nurun ari langit, lalu nganguska piring ti udah diberi, lalu mulia TUHAN ngemenuhka Rumah Sembiang nya.

²Laban Rumah Sembiang nya nyau penuh laban mulia TUHAN, bala imam enda ulih tama kia.

³ Lebuh orang Israel meda api nya nurun ari langit, lalu Rumah Sembiang nya penuh laban penampak mulia TUHAN, sida lalu nyungkurka diri ba geladak nya, nyembah Allah Taala sereta muji Iya ketegal pemanah enggau pengerindu Iya ti meruan belama iya.

⁴Udah nya Solomon enggau semua orang mayuh lalu ngenjuk piring ngagai TUHAN.

⁵Iya meri 22,000 iku jelu sapi enggau 120,000 iku jelu bedus nyadika piring pemaik. Nya meh chara Raja Solomon enggau semua orang mayuh nyerahka Rumah Sembiang ngagai Allah Taala.

⁶Bala imam bediri ba endur ti udah diletak ke sida, betunga mua enggau bala orang Lewi, muji TUHAN ngena perengka musik ti udah diberi Raja David, lalu nyanyi siti pantun, “Pengerindu Iya meruan belama iya!” munyi ti udah diatur Raja David. Lebuh semua orang bediri, bala imam lalu nyepu terumpit.

⁷Solomon lalu nyerah ngagai TUHAN puak tengah laman ti di mua Rumah Sembiang, lalu udah nya, ngenjuk piring tunu segala, piring tepung, enggau lemak ari piring pemaik, ba endur nya laban alta temaga ti udah digaga nya kelalu mit alai ngengkahka semua piring nya.

⁸Solomon enggau semua orang Israel lalu ngintu Gawai Belangkau tujuh hari. Mayuh amat orang datai kenyau ari Genting Hamas di utara enggau ari garis entara menua enggau menua Ejip di selatan.

⁹Sida begempuru tujuh hari nyerahka alta nya, lalu udah nya, tujuh hari da agi kena ngintu gawai. Ba hari ti pengujung sida lalu muka pengerami kena nutup gawai nya.

¹⁰Hari siti, iya nya kena dua puluh tiga hari bulan ti ketujuh, Solomon lalu ngasuh orang mayuh pulai. Sida lantang ati ke semua berekat ti udah diberi TUHAN ngagai bala nembiak Iya orang Israel, ngagai David, enggau ngagai Solomon.

¹¹Lebuh Raja Solomon udah tembu ngaga Rumah Sembiang enggau ngaga istana, enggau semua utai ti udah diperambu iya,

¹²TUHAN lalu pegari di mua iya lebuh malam hari, lalu bejaku ngagai iya, “Aku udah ninga sampi nuan, lalu Aku nerima Rumah tu nyadi endur alai orang ngenjuk piring ngagai Aku.

¹³Genap kali aku nagang hari ujan, tauka ngasuh buntak makai utai ti ditanam, tauka ngasuh penyakit nyerang bala nembiak Aku,

¹⁴enti nembiak Aku ngemaruhka diri, besampi ngagai Aku, lalu ngelengkaka jalai sida ke jai, nya baru Aku deka ninga sida ari serega, lalu ngampun dosa sida, sereta ngeraika menua sida.

¹⁵Mata Aku deka tebuka lalu pending Aku deka mendingka sampi ti diberi ba endur tu.

¹⁶Laban Aku udah milih sereta nguduska Rumah tu ngambika nama Aku meruan dia belama iya. Aku deka ngemataka Rumah tu lalu nyaga iya belama iya.

¹⁷Ba pasal nuan empu, enti nuan tetap ati betuaika Aku baka apai nuan David, ngasika Adat Aku, lalu ngereja semua utai ti diasuh Aku kereja nuan,

¹⁸ nya baru Aku deka ngamatka semaya ti udah digaga Aku enggau apai nuan David, lebuh Aku madahka orang Israel ti deka seruran diperintah peturun iya.

¹⁹Tang enti nuan enggau bala nembiak nuan enda ngasika adat enggau pesan ti udah diberi Aku ngagai nuan, lalu nuan nyembah petara bukai,

²⁰Aku deka muai nuan ari menua ti udah diberi Aku ngagai nuan, lalu Aku deka ninggalka Rumah tu ti udah dikuduska Aku nyadi endur alai Aku disembah. Semua orang di semua endur deka mechat Rumah tu, lalu enda bebasaka iya.

²¹“Diatu Rumah Sembiang tu balat dibasa, tang lebuh maya nya ila, semua orang ke mansa deka alit ati lalu nanya, ‘Nama kebuah TUHAN ngereja utai baka tu ngagai menua tu, enggau ngagai Rumah Sembiang tu?’

²²Orang mayuh deka nyaut, ‘Laban sida udah ninggalka TUHAN Allah Taala sida, ti udah mai sida pansut ari menua Ejip. Sida udah taluk ngagai, nyembah, sereta betuaika petara bukai. Nya kebuah TUHAN udah ngasuh penusah tu ninggang sida.’ ”