Read Iban 2 Bansa Israel 8 Bible Online

2 Bansa Israel 8 - Iban bible

2 Bansa Israel 8

¹Solomon ngaga Rumah Sembiang enggau istana dalam pengelama dua puluh taun.

²Iya mega nirika baru nengeri ti udah diberi Raja Hiram ngagai iya, lalu ngasuh orang Israel ngentapka diri di nengeri nya.

³Iya ngalahka menua Hamat enggau Sobah,

⁴lalu nirika kuta ke nengeri Palmira di menua puang. Iya nirika baru semua nengeri di menua Hamat alai nyimpan barang.

⁵Solomon mega nirika baru semua nengeri Bet-horon Ulu enggau Bet-horon Ili (nengeri ti bekuta, ti bisi pintu kuta ti ulih dikalang),

⁶nengeri Baalat, semua nengeri alai iya nyimpan barang, enggau nengeri alai raban kuda enggau kerita perang iya disimpan. Iya udah bejalaika semua pelan iya ti deka ngaga rumah di Jerusalem, di Lebanon, enggau di serata menua ti diperintah iya.

⁷Solomon mejalka semua peturun orang Kanaan bekereja ke iya. Sida tu peturun orang Kanaan ti enda dibunuh sida, lebuh sida ngerampas menua nya. Bansa orang tu nyengkaum orang Iti, orang Amor, orang Peris, orang Ibi, enggau orang Jebus. Peturun orang tu agi nyadi ulun nyentuk ngagai diatu.

⁹Orang Israel nadai dipejalka ngereja pengawa ti berat, tang sida bekereja nyadi soldadu, nyadi pemesai, nyadi tuai ke orang ke nepan kerita perang, enggau nyadi soldadu ke nepan kuda.

¹⁰Dua ratus lima puluh iku pemesai ngemataka bala ulun ke bekereja begagaka mayuh bengkah rumah nya.

¹¹Solomon mai bini iya, anak raja menua Ejip, pindah ari Nengeri David ngagai sebuah rumah ti digaga David ke bini iya. Ku Solomon, “Bini aku enda tau diau dalam istana David raja orang Israel, laban semua endur ti udah alai Peti Lampang Batu Adat diengkah, nyadi kudus magang.”

¹²Solomon ngenjuk piring ngagai TUHAN ba alta ti udah digaga di mua Rumah Sembiang.

¹³ Iya ngenjuk piring tunu nitihka Adat Moses ba genap hari ti kudus, iya nya, Hari Sabat, Gawai Anak Bulan, enggau tiga bengkah gawai genap taun, iya nya Gawai Roti Ti Enda Beragi, Gawai Ngetau, enggau Gawai Belangkau.

¹⁴Nitihka atur ti udah diletak apai iya David, iya lalu ngatur pengawa ti dikereja bala imam tiap hari, enggau pengawa orang Lewi ke nulung bala imam belagu ngena pantun, enggau ngereja pengawa sida. Iya mega ngatur raban orang ke nyaga Rumah Sembiang ngambika sida bisi ngereja pengawa nyaga pintu siti-siti, nitihka jaku David, ke nembiak Allah Taala.

¹⁵Atur ti udah diberi David ngagai bala imam enggau ngagai orang Lewi ba pasal bilik setor enggau pasal pekara bukai, udah dikereja enggau silik.

¹⁶Lebuh maya nya, semua projek Solomon udah tembu magang. Semua pengawa udah mujur magang dikereja, kenyau ari nudukka batu pemun nyentuk ngagai penembu Rumah Sembiang nya.

¹⁷Udah nya Solomon lalu mansang ngagai Esion-geber enggau Elat, iya nya dua bengkah penyangkai kapal ti ba Teluk Akaba, di menua Edom.

¹⁸Raja Hiram ngirumka ngagai Raja Solomon berapa buah kapal, dipejalaika bala pemesai enggau kelasi iya empu ke endang chukup peneleba. Sida belayar enggau bala pemesai Raja Solomon ngagai menua Opir, lalu mai ngagai Raja Solomon kira enam belas tan emas.