Read Iban 2 Bansa Israel 9 Bible Online

2 Bansa Israel 9 - Iban bible

2 Bansa Israel 9

¹ Lebuh kuin menua Sheba ninga Raja Solomon tebilang bendar nama, iya lalu mansang ngagai Jerusalem deka ngabas penalam penemu Raja Solomon ngena tanya ti mar. Iya datai mai mayuh bala pengiring, enggau mayuh jelu unta ti ngundan mayuh amat rempah, batu ti berega, enggau emas. Lebuh kuin nya betemu enggau Solomon, iya lalu nanyaka semua tanya ti ba ati iya.

²Solomon nyaut semua tanya iya. Nadai utai ti enda ulih diterangka Solomon.

³Kuin menua Sheba ninga penemu-dalam ti disebut Solomon, sereta meda istana ti udah digaga iya.

⁴Iya meda gaya pemakai Solomon, rumah alai bala pemesai iya diau, gaya atur pengawa ke bala orang ke bekereja dalam istana, enggau pekayan ti dikena sida, gaya gari ti dikena bala orang gaji ke ngintu Solomon lebuh pengerami makai besai, enggau piring ti diberi iya [8] dalam Rumah Sembiang. Lebuh kuin nya meda semua utai nya, iya nyau enda tesintakka seput laban iya balat alit ati.

⁵Ku iya bejaku enggau Raja Solomon, “Utai ti didinga aku di menua aku pasal nuan [9] enggau pasal penalam penemu nuan, endang amat magang!

⁶Aku enda arapka berita ti dipadahka sida ngagai aku, sebedau aku empu meda utai nya ke diri empu. Utai ti didinga aku nya enda bulih setengah ari penemu-dalam ti dikembuan nuan. Nuan lebih agi bepenemu-dalam ari ti ditusui orang.

⁷Naka meh penguntung orang ke betuaika nuan, ke seruran begulai enggau nuan, lalu ninga penemu-dalam ti disebut nuan!

⁸Pujika TUHAN Allah Taala nuan! Iya udah ngayanka pengaga ati Iya ke nuan, lalu ngaga nuan nyadi raja, ngambika nuan merintah dalam nama Iya. Laban Iya rinduka bala nembiak Iya Israel, lalu deka ngasuh sida meruan belama iya, Iya udah ngaga nuan nyadi raja, ngambika nuan bejalaika atur ti lurus sereta betul.”

⁹Iya lalu meri ngagai Raja Solomon pemeri ti udah dibai iya, iya nya 5,000 kilogram emas, mayuh rempah enggau batu ti berega. Nadai rempah bukai ti lebih alus agi ari rempah ti diberi kuin menua Sheba ngagai Raja Solomon. (

¹⁰Bala kelasi Raja Hiram enggau bala kelasi Raja Solomon ke mai emas ari Opir, mega mai kayu juniper enggau batu ti berega.

¹¹Solomon ngena kayu nya begagaka tangga Rumah Sembiang, istana iya, belikan enggau engkeratung ke bala orang ke nebah musik. Nadai utai baka nya bisi udah kala dipeda di menua Judah.)

¹²Raja Solomon lalu meri ngagai kuin menua Sheba semua utai ti dipinta iya, nambahka utai ti udah diberi Solomon lebuh iya besilihka pemeri [10] enggau kuin nya. Udah nya kuin nya enggau bala pengiring iya lalu mulaika diri ngagai menua Sheba.

¹³Raja Solomon nerima lebih 25,000 kilogram emas tiap taun,

¹⁴nambahka chukai ti dibayar orang ke bedagang enggau orang sedagar. Bala raja menua Arabia enggau bala tuan gabenor ke megai pelilih menua di menua Israel, mega mai pirak enggau emas ngagai iya.

¹⁵Solomon ngaga 200 iti terabai ti besai. Genap iti terabai nya disampak enggau 7 kilogram emas ti ditempa,

¹⁶enggau 300 iti terabai ti mit agi, ti disampak enggau kira 3.6 kilogram emas ti ditempa. Iya ngasuh semua terabai nya disimpan dalam Balai Utan Lebanon. [11]

¹⁷Raja mega ngasuh orang ngaga siti kerusi diraja ti besai. Sebagi ari kerusi nya disampak enggau gading, lalu sebagi ti bukai disampak enggau emas ti tulin.

¹⁸Tangga niki ngagai kerusi diraja nya bisi enam iti tangkal, sereta bisi pelasar ti lekat ngagai kerusi nya, lalu disampak enggau emas. Kerusi nya bisi lengan, enggau anak patung singa bediri ba tisi sepiak-sepiak.

¹⁹Tangga nya bisi dua belas iku anak patung singa, siku ba puting siti-siti tangkal tangga nya. Nadai kerusi diraja bisi baka nya di menua bukai.

²⁰Semua mangkuk ti dikena Raja Solomon ngirup digaga ari emas magang, lalu semua pekekas dalam Balai Utan Lebanon digaga ari emas ti tulin magang. Pirak dikira nadai rega lebuh maya Solomon menya.

²¹Raja Solomon mayuh kapal ti besai, ti belayar sama enggau kapal Raja Hiram. Kapal iya pulai tiap-tiap tiga taun, mai emas, pirak, gading, nyumbuh, enggau kera.

²²Raja Solomon lebih agi kaya, sereta dalam agi penemu ari semua raja bukai di dunya tu.

²³Semua raja bukai betanya ngagai iya magang, laban sida ingin deka ningaka penemu-dalam ti udah diberi Allah Taala ngagai iya.

²⁴Genap iku sida bela mai pemeri ngagai Solomon. Pemeri nya nyengkaum utai ti digaga ari pirak enggau emas, baju panjai, senyata, rempah, kuda enggau keledai. Utai tu nyadi ari taun siti ngagai taun siti.

²⁵ Raja Solomon mega bisi 4,000 bansal alai nyimpan kerita perang enggau kuda iya, lalu iya bisi 12,000 iku kuda kena beperang. Sekeda kuda nya disimpan iya di Jerusalem, lalu sida ti bukai disimpan iya ba nengeri bukai.

²⁶ Iya bekuasa atas semua raja dalam menua nya, kenyau ari Sungai Eupratis nyentuk ngagai menua Pilistin enggau ngagai garis entara menua Ejip.

²⁷Lebuh iya megai perintah, pirak nyau baka utai ngapa di Jerusalem, lalu kayu sidar nyau ngemayuh kayu sikamur ti ba kaki bukit menua Judah.

²⁸ Solomon meli kuda ari Musri [12] enggau ari semua menua bukai.

²⁹Cherita lama ti bukai pasal Solomon, kenyau ari pun datai ke ujung, bisi dituliska magang dalam Jerita Lama Pasal Nabi Natan, dalam Jaku Ti Benabi ti Disebut Ahijah ke datai ari Siloh, enggau dalam Genera Nabi Ido, ti bisi mega ngenang pasal perintah Raja Jeroboam menua Israel.

³⁰Solomon merintah semua menua Israel ari Jerusalem empat puluh taun.

³¹Iya mati lalu dikuburka di Nengeri David, lalu anak iya Rehoboam nganti iya nyadi raja.