Read Iban Esra 1 Bible Online

Esra 1 - Iban bible

Esra 1

¹ Dalam taun ti kesatu Sairus nyadi raja besai menua Persia, [1] TUHAN ngamatka jaku ti udah disebut Iya ngena nabi Jeremiah. Iya nyungkak Sairus mansutka siti atur, lalu ngirumka atur nya ngena surat ngambika dibacha enggau nyawa ti inggar di semua endur dalam menua ti diperintah iya:

² “Tu atur ari Sairus, Raja Besai menua Persia. TUHAN Allah Taala serega, udah ngasuh aku merintah semua dunya, lalu udah meri ngagai aku tanggungjawap ngaga Rumah Sembiang ke Iya di Jerusalem, di menua Judah.

³Awakka Allah Taala meruan enggau semua kita ke nembiak Iya. Kita enda tau enda mansang ngagai Jerusalem, lalu nirika baru Rumah TUHAN Allah Taala ke disembah orang Israel, Allah Taala ti disembah di Jerusalem.

⁴Enti bala nembiak Iya ti udah dibuai ngagai menua bukai bisi begunaka tulung kena sida pulai, orang ke berimbai pendiau enggau sida enda tau enda nulung sida, meri sida pirak enggau emas, pemakai enggau jelu kena mai barang, sereta enggau piring ngambika bisi diserahka dalam Rumah Sembiang Allah Taala di Jerusalem.”

⁵Udah nya bala tuai peturun ari raban bansa Judah enggau Benjamin, bala imam enggau orang Lewi, enggau semua orang bukai ti udah ditegu Allah Taala ati, sedia mupuk lalu nirika Rumah TUHAN baru di Jerusalem.

⁶Semua orang ke berimbai pendiau enggau sida meri sida pirak, emas, pemakai, jelu kena mai barang, utai berega ti bukai, enggau piring ke Rumah Sembiang.

⁷Raja Besai Sairus meri pulai baru ngagai sida mangkuk ti udah ditabanka Raja Nebukadnesar ari Rumah Sembiang di Jerusalem, lalu udah naruh utai nya dalam rumah sembiang bala petara iya.

⁸Raja Besai nyerahka utai nya ngagai Mitredat, tuai ngemataka sarang reta raja. Mitredat lalu nuliska semua utai nya ke Sesbasar, gabenor menua Judah.

⁹Baka tu ku pemayuh utai nya: bisin emas kena meri piring — 30 bisin pirak kena meri piring — 1,000 bisin bukai — 29 mangkuk emas — 30 mangkuk pirak — 410 mangkuk ti bukai — 1,000

¹¹Pemayuh semua bisin emas enggau pirak sereta enggau perengka bukai ti dibai Sesbasar enggau orang bukai ke sama udah dibuai ngagai menua Babilon, lebuh sida mulaika diri ngagai Jerusalem nya 5,400 iti.