Read Iban Esra 10 Bible Online

Esra 10 - Iban bible

Esra 10

¹Lebuh Esra benung meremi besampi di mua Rumah Sembiang, nyabak sereta ngaku dosa, mayuh orang Israel - ti lelaki, indu, enggau bala anak mit - begempuru ngelingi iya, balat amat nyabak.

²Udah nya Sekaniah anak Jehiel, ari raban peturun Elam, bejaku enggau Esra, “Kami udah enda ngasika Allah Taala laban kami udah jadi enggau indu bansa bukai. Tang taja pia, orang Israel agi bisi pengadang.

³Diatu kitai enda tau enda besumpah ngaga semaya enggau Allah Taala kitai, madahka kitai deka muai sida indu tu enggau bala anak sida. Kami deka nitihka ajar nuan, enggau ajar orang bukai ke bebasaka jaku Allah Taala. Kami deka nitihka Adat Allah Taala.

⁴Nuan endang betanggungjawap ngereja utai tu. Kami nyukung nuan. Nya alai, pajak lalu tembuka pengawa nuan.”

⁵Esra lalu berengkah ngasuh bala tuai imam, tuai orang Lewi, enggau semua orang Israel ti bukai besumpah deka ngereja utai ti disebut Sekaniah.

⁶Udah nya Esra angkat ari mua Rumah Sembiang lalu tama ngagai rumah Jehohanan anak Eliasip, lalu bemalam dia [17] tusah ati ngira orang ke pulai ari menua bukai udah enda tetap ati ngagai TUHAN. Iya nadai makai, nadai ngirup.

⁷Pesan lalu dikirumka ngagai serata nengeri Jerusalem enggau serata menua Judah, minta semua orang ke udah pulai ari menua bukai, begempuru di Jerusalem

⁸nitihka atur bala tuai orang mayuh. Enti orang bisi enda datai dia dalam kandang tiga hari, semua reta tengkira sida deka dirampas, lalu sida nadai agi hak nyadi raban orang Israel.

⁹Berengkah ari dua puluh hari bulan ti kesemilan, dalam kandang tiga hari, semua lelaki ti diau di menua Judah enggau menua Benjamin datai di Jerusalem, lalu begempuru ba padang ti di mua Rumah Sembiang. Hari bangat amat ujan, lalu ketegal nya, enggau ketegal pemesai guna gempuru nya, semua orang nyau digak-digak magang laban chelap.

¹⁰Imam Esra bediri, lalu bejaku ngagai sida. Ku iya, “Kita udah enda tetap ati ngagai TUHAN, lalu udah ngasuh penyalah ninggang orang Israel, laban kita udah jadi enggau indu bansa bukai.

¹¹Nya alai, diatu kita enda tau enda ngaku dosa kita ngagai TUHAN Allah Taala aki ini kita, lalu ngereja utai ti ngerinduka ati Iya. Kita enda tau enda nyeraraka diri ari orang bansa bukai ke diau di menua kitai, lalu muai bini kita ke orang bansa bukai.”

¹²Orang mayuh lalu nyaut enggau nyawa ti inggar, “Kami deka ngereja sebarang utai ti diasuh nuan.”

¹³Tang ku sida nambahka jaku sida, “Bala kitai tu kelalu mayuh, lalu ujan tu kelalu bangat. Kami enda ulih bediri ditu. Pekara tu ukai utai ti ulih ditembuka kitai dalam sehari dua, laban kami mayuh amat udah kena laban dosa tu.

¹⁴Awakka bala pemesai ti diau di Jerusalem mutarka pekara tu. Udah nya awakka semua orang ke jadi enggau indu bansa bukai, betemu enggau bala tuai enggau bala hakim ari nengeri sida empu, ba maya ti diletak. Nya jalai kitai nyeliahka pengeringat Allah Taala ba pekara tu.”

¹⁵Nadai orang nyakal penemu nya, kelimpah ari Jonatan anak Asahel enggau Jahseiah anak Tikbah ke disukung Mesulam enggau siku orang Lewi ke benama Sabetai.

¹⁶Orang ke udah pulai ari menua bukai, nerima atur nya. Nya alai imam Esra lalu milih [18] lelaki ari bala tuai peturun, nuliska nama sida. Kena satu hari bulan ti kesepuluh, sida lalu belabuh mansik pekara nya,

¹⁷lalu dalam kandang tiga bulan udah bekau nya, sida mansik semua lelaki ke jadi enggau indu bansa bukai.

¹⁸Tu nama lelaki ke jadi enggau indu bansa bukai: Imam, ditusun nitihka raban peturun: Ari raban peturun Josua enggau sida menyadi lelaki iya ke anak lelaki Jehosadak: Maseiah, Elieser, Jarip, enggau Gedaliah.

¹⁹Sida besemaya deka muai bini sida, lalu sida meri siku bedus ti lelaki nyadika piring pengampun dosa sida.

²⁰Ari raban peturun Imer: Hanani seduai Sebadiah

²¹Ari raban peturun Harim: Maseiah, Elijah, Semaiah, Jehiel, enggau Usiah

²²Ari raban peturun Pasur: Elioenai, Maseiah, Ismail, Netanel, Josabat, enggau Elasah

²³Orang Lewi Josabat, Simei, Kelaiah (kedua bali nama Kelita), Petahiah, Judah, enggau Elieser

²⁴Orang ke tukang nebah musik Eliasip Orang ke nyaga Rumah Sembiang Salum, Telem, enggau Uri

²⁵Sida ke bukai Raban peturun Paros: Ramiah, Isiah, Malkijah, Mijamin, Eleasar, Malkijah, enggau Benaiah

²⁶Ari raban peturun Elam: Mataniah, Sekariah, Jehiel, Apdi, Jerimot, enggau Elijah

²⁷Ari raban peturun Satu: Elioenai, Eliasip, Mataniah, Jerimot, Sabat, enggau Asisa

²⁸Ari raban peturun Bebai: Jehohanan, Hananiah, Sabai, enggau Atlai

²⁹Ari raban peturun Bani: Mesulam, Maluk, Adaiah, Jasup, Sil, enggau Jerimot

³⁰Ari raban peturun Pahat Moap: Adna, Chelal, Benaiah, Maseiah, Mataniah, Besalel, Binui, enggau Manasi

³¹Ari raban peturun Harim: Elieser, Isijah, Malkijah, Semaiah, Simeon, Benjamin, Maluk, enggau Semariah

³³Ari raban peturun Hasum: Matenai, Matatah, Sabat, Elipelet, Jeremai, Manasi, enggau Simei

³⁴Ari raban peturun Bani: Madai, Amram, Uil, Benaiah, Bedeiah, Cheluhi, Baniah, Meremot, Eliasip, Mataniah, Matenai, enggau Jasu

³⁸Ari raban peturun Binui: Simei, Selemiah, Natan, Adaiah, Meknadebai, Sasai, Sarai, Asarel, Selemiah, Semariah, Salum, Amariah, enggau Josep

⁴³Ari raban peturun Nebo: Jeiel, Matitiah, Sabat, Sebina, Jadai, Joel, enggau Benaiah

⁴⁴Semua orang lelaki tu udah bela jadi enggau indu orang bansa bukai. Sida muai bini sida, lalu muru sida sama enggau bala anak sida. [19]