Read Iban Esra 3 Bible Online

Esra 3 - Iban bible

Esra 3

¹Dalam bulan ti ketujuh, semua orang Israel bela udah ngentapka diri magang ba nengeri diri empu. Udah nya semua sida lalu begempuru di Jerusalem,

² lalu Jesua anak Josadak, enggau sida imam ti bukai, enggau Serubabel anak Sealtiel, enggau kaban belayan iya, lalu ngaga alta Allah Taala baru, ngambika sida ulih nunu piring ba alta nya nitihka atur ti ditulis dalam Adat Moses.

³ Taja pen [4] orang ke pulai nya takutka orang ke diau di menua nya, sida ngaga alta nya ba endur asal iya. Udah nya sida belabuh baru nunu piring tiap pagi, lemai ba alta nya.

⁴ Sida ngintu Gawai Belangkau nitihka atur. Genap hari sida ngenjuk piring ti diguna ke sehari nya.

⁵ Nambahka nya, sida ngenjuk piring tunu segala baka selama, enggau piring ti diberi lebuh Gawai Anak Bulan, enggau ba semua gempuru besai alai TUHAN disembah, sereta enggau semua piring ti diserahka ngagai TUHAN nitihka peneka ati diri.

⁶Taja pen sida apin belabuh ngaga Rumah Sembiang nya baru, sida belabuh ngenjuk piring tunu ngagai TUHAN berengkah ba hari ti keterubah dalam bulan ti ketujuh.

⁷Orang mayuh lalu meri duit kena ngaji tukang batu enggau tukang kayu, sereta meri pemakai, utai ti diirup, enggau minyak kana ti deka dikirumka ngagai nengeri Tire enggau Sidon kena nyilih kayu sidar ari menua Lebanon. Kayu nya deka dibai nengah tasik ngagai Jopa. Semua utai tu dikereja nitihka pemendar ari Raja Besai Sairus menua Persia.

⁸Nya alai dalam bulan ti kedua, kedua taun sida udah pulai ngagai endur asal Rumah Sembiang di Jerusalem, sida lalu belabuh gawa. Serubabel, Jesua, enggau semua orang mayuh ti bukai, bala imam, enggau orang Lewi, iya ti bendar, semua orang ke udah kena buai ngagai menua Babilon, lalu udah pulai baru ngagai Jerusalem, bela enggau gawa magang. Semua orang Lewi ke umur dua puluh taun ke atas bela diasuh nyadi tuai ngereja pengawa begagaka Rumah Sembiang nya baru.

⁹Orang Lewi ke benama Jesua enggau bala anak lelaki iya, sereta enggau kaban belayan iya, enggau Kadmi-el enggau bala anak lelaki iya (raban peturun Hodabiah) [5] sama nguluka orang mayuh begagaka Rumah Sembiang nya baru. (Sida ditulung orang Lewi ari raban peturun Henadat.)

¹⁰ Lebuh bala tukang belabuh nudukka batu pemun Rumah Sembiang, bala imam ke ngena baju panjai, mai terumpit lalu ngambi endur diri, lalu orang Lewi ari raban peturun Asap bediri dia mai bebendai sida. Sida muji TUHAN nitihka atur ti udah diberi ngagai sida kenyau ari maya Raja David menya.

¹¹ Sida belagu muji TUHAN, ngelembungka pangan diri ngena genteran tu: “TUHAN endang manah, lalu pengerindu iya ke Israel endang meruan belama iya.” Semua orang manjung enggau pengabis penginggar nyawa sida muji TUHAN, laban pengawa nudukka batu pemun Rumah Sembiang nya udah berengkah.

¹² Imam ke tuai agi umur, orang Lewi, enggau tuai peturun endang udah meda Rumah Sembiang ti dulu menya, lalu lebuh sida meda batu pemun Rumah Sembiang didudukka, sida lalu bekeduie sereta beterauh nyabak. Tang orang bukai ke dia manjung gaga ati.

¹³Nadai orang nemu bagi munyi panjung gaga ati enggau munyi sabak, laban sida inggar amat, datai ke sida nyau ulih didinga berapa batu ari endur nya.