Read Iban Esra 4 Bible Online

Esra 4 - Iban bible

Esra 4

¹Lebuh munsuh orang Judah enggau Benjamin ninga berita orang ke udah dibuai nya udah pulai baru lalu begagaka Rumah TUHAN Allah Taala ke disembah orang Israel,

² sida lalu betemu enggau Serubabel enggau bala tuai peturun, lalu bejaku, “Awakka kami enggau kita ngaga Rumah Sembiang tu. Kami pen nyembah Allah Taala ti disembah kita, lalu kami udah ngenjuk piring ngagai Iya sekumbang Raja Besai Esar-hadon menua Asiria udah ngasuh kami kitu lalu diau ditu.”

³Serubabel, Josua, enggau bala tuai peturun lalu madahka ngagai sida, “Kami enda begunaka tulung ari kita begagaka Rumah Sembiang ke TUHAN Allah Taala kami. Kami empu deka ngaga Rumah Sembiang nya, nitihka asuh Raja Besai Sairus menua Persia.”

⁴Udah nya orang ke nguan menua nya lalu nguji nagang sereta ngemba orang Judah ngambika sida enda berani ngaga Rumah Sembiang nya.

⁵Sida mega nyuap bala pemesai orang Persia ngambika sida nagang pengawa orang Judah nya, lalu sida majak ngereja nya sekumbang Raja Besai Sairus megai perintah, nyentuk ngagai maya perintah Raja Besai Darius. [6]

⁶ Lebuh Raja Besai Serses baru berengkah megai perintah, bala munsuh orang ke diau di menua Judah enggau di Jerusalem lalu nulis surat bedawaka sida.

⁷Lebuh Raja Besai Artaserses menua Persia megai perintah, Bislam, Mitredat, Tabeel, enggau pangan sida mega nulis surat ngagai raja besai. Surat nya ditulis ngena jaku orang bansa Aram [7] lalu enda tau enda disalin lebuh surat nya dibacha. [8]

⁸Rehum ti nyadi gabenor, enggau Simsai, ti nyadi kerani ke sitak menua Judah, mega nulis surat tu ngagai Raja Besai Artaserses pasal Jerusalem:

⁹“Ari Gabenor Rehum, ari Simsai, kerani ke sitak menua Judah, ari pangan seduai iya, ari bala hakim, enggau ari semua bala pemesai ti bukai, ke asal ari Erek, Babilon, enggau Susa di menua Elam,

¹⁰sereta enggau orang bukai ti udah dipindahka Asurbanipal ke besai sereta bekuasa ari menua sida, lalu diasuh ngentapka diri di nengeri Samaria enggau ba endur bukai di Barat Eupratis.” [9]

¹¹Surat nya munyi tu: “Ngagai Raja Besai Artaserses, ari bala nembiak iya ti diau di sitak di Barat Eupratis.

¹²Kami deka madahka ngagai nuan Tuan Raja pasal orang Judah ke datai ari menua bukai ti dipegai nuan. Sida udah ngentapka diri di Jerusalem, lalu benung nirika baru nengeri ti jai sereta angkat ngelaban nya. Sida udah belabuh ngaga dinding kuta ke nengeri nya baru, lalu deka nembuka pengawa nya enda lama da agi.

¹³Tuan Raja, enti nengeri tu digaga baru, lalu dinding kuta tembu digaga, orang tu deka badu agi mayar chukai, lalu penatai belanja nuan deka kurang.

¹⁴Nya alai, laban kami ngasaika diri berutang-budi ketegal pemanah nuan enggau kami, Tuan Raja, kami enggai meda utai tu nyadi, nya alai kami madahka pekara tu ngagai Tuan Raja,

¹⁵ngambika nuan meri atur ngasuh orang mansik semua utai ti udah ditulis bala aki ini nuan. Enti nuan mansik utai nya, nuan deka nemu nengeri tu endang seruran ngelaban, lalu kenyau ari kelia menya nengeri tu endang mai pengachau ngagai bala raja enggau ngagai orang ke merintah ba mayuh bengkah sitak menua. Orang ke diau di nengeri tu endang seruran mar diperintah. Nya kebuah nengeri tu dirusak.

¹⁶Kami madahka ngagai Tuan Raja, enti nengeri tu digaga baru, lalu dinding kuta tembu, nuan Tuan Raja enda ulih agi merintah di Barat Eupratis tu.”

¹⁷Raja besai lalu ngirumka saut tu: “Ngagai Gabenor Rehum, Simsai, kerani ke sitak menua, enggau ngagai bala pangan seduai iya ti diau di Samaria enggau ba endur bukai di Barat Eupratis, tabi.

¹⁸“Surat ti dikirumka kita udah disalin lalu udah dibacha di mua aku.

¹⁹Aku udah ngasuh utai nya dipansik, lalu utai nya endang amat. Kenyau ari kelia menya, Jerusalem endang seruran angkat ngelaban kuasa raja, lalu nengeri nya endang penuh laban orang ke seruran angkat ngelaban, sereta ngaga pengachau.

²⁰Raja ke bekuasa udah merintah di nengeri nya, lalu udah merintah di serata sitak di Barat Eupratis, begumpulka chukai enggau duit pupu.

²¹Nya alai kita enda tau enda meri atur nagang orang nya begagaka nengeri nya baru, nyentuk ngagai maya aku meri atur baru.

²²Kereja utai tu enggau naka penyampat, enggai ke perintah aku dituntung penusah.”

²³Lebuh surat ari Raja Besai Artaserses nya dibacha di mua Rehum, Simsai, enggau bala pangan seduai iya, sida lalu beguai-guai mansang ngagai Jerusalem, lalu mejalka orang Judah badu agi ngaga nengeri nya baru.

²⁴ Pengawa begagaka Rumah Sembiang udah diketuka, lalu enda dipajakka agi nyentuk ngagai taun ti kedua Raja Besai Darius megai perintah di menua Persia. [10]