Read Iban Esra 5 Bible Online

Esra 5 - Iban bible

Esra 5

¹ Ba urung maya nya dua iku nabi, Hagai, enggau Sekariah anak Ido, belabuh bejaku dalam nama Allah Taala ke disembah orang Israel, ngagai orang Judah ti diau di menua Judah enggau di Jerusalem.

² Lebuh Serubabel anak Sealtiel enggau Jesua anak Josadak ninga jaku nabi dua iku nya, sida lalu belabuh nirika Rumah Sembiang baru di Jerusalem, disaup nabi ke dua iku nya.

³Tatenai ti nyadi gabenor di Barat Eupratis, Setar Bosenai, enggau pemesai ti bukai mansang ngagai Jerusalem, lalu kemaya nya nanya, “Sapa ngemendarka kita ngaga Rumah Sembiang tu lalu ngaga perengka ke Rumah tu?”

⁴Sida [11] mega minta nama semua orang ke nulung ngaga Rumah Sembiang nya.

⁵Tang Allah Taala ngemataka bala tuai orang Judah, lalu bala pemesai orang Persia mutuska penemu enda ngereja utai ngagai bala tuai orang Judah nya, sebedau sida nulis surat ngagai Raja Besai Darius lalu nerima saut ari iya.

⁶Baka tu ku munyi utai ti ditulis sida ngagai raja besai:

⁷“Ngagai Raja Besai Darius, awakka nuan merintah dalam pemaik.

⁸Kami deka madahka ngagai Tuan Raja, pasal kami ke udah bejalai ngagai sitak menua Judah, lalu nemu Rumah Sembiang ke Allah Taala ti Besai benung digaga ari batu, enggau ngena batang pengerat ti ditebuk ngagai dinding. Pengawa nya benung dikereja enggau bejimat, lalu mansang belama.

⁹Udah nya kami nanya ngagai bala tuai orang mayuh, minta sida madahka ngagai kami, sapa ke meri sida kuasa ngaga Rumah Sembiang nya baru, sereta ngaga pekekas ke Rumah nya.

¹⁰Kami mega minta sida madahka nama sida, ngambika kami ulih madahka ngagai nuan sapa ti nyadi tuai ngereja pengawa nya.

¹¹Ku sida nyaut, ‘Kami tu nembiak Allah Taala ti merintah di serega enggau di dunya, lalu kami ngaga Rumah Sembiang tu baru laban Rumah tu udah digaga sereta disikap dulu menya ulih siku raja ti bekuasa ke megai perintah di menua Israel.

¹² Tang laban aki ini kami udah ngeringatka ati Allah Taala ti di serega, nya alai Iya nejuka sida dialahka Raja Nebukadnesar menua Babilon, siku raja ke datai ari peturun raja menua Kaldea. Rumah Sembiang nya dirusak, lalu orang ari bansa kami dibuai ngagai menua Babilon.

¹³ Udah nya, dalam taun ti keterubah Raja Sairus merintah nyadi raja besai di menua Babilon, Sairus meri atur ngasuh Rumah Sembiang tu digaga baru.

¹⁴Iya mulaika pekekas emas enggau pekekas pirak ti dikena dalam Rumah Sembiang nya, ti udah ditabanka Nebukadnesar ari Rumah Sembiang nya di Jerusalem, lalu udah diengkah iya dalam rumah sembiang di Babilon. Raja Besai Sairus udah nyerahka pekekas nya ngagai siku orang ke benama Sesbasar, ti udah diletak iya nyadi gabenor menua Judah.

¹⁵Raja Besai ngasuh Sesbasar mai utai nya lalu mulaika utai nya ngagai Rumah Sembiang di Jerusalem, lalu ngaga Rumah Sembiang nya baru ba endur asal iya.

¹⁶Nya alai Sesbasar datai lalu nudukka batu pemun ke Rumah Sembiang nya. Pengawa begagaka Rumah Sembiang nya lalu majak dikereja nyentuk ngagai diatu, tang pengawa nya apin tembu.

¹⁷Nya alai, enti Tuan Raja besetuju, awakka orang diasuh mansik utai ti udah ditulis bala raja di menua Babilon, ngambika nemu enti Raja Besai Sairus amat udah ngasuh Rumah Sembiang tu digaga baru. Udah nya, padahka ngagai kami utai ti diasuh nuan kereja kami ba pasal pekara tu.”