Read Iban Esra 6 Bible Online

Esra 6 - Iban bible

Esra 6

¹Raja Besai Darius lalu ngasuh orang mansik utai ti udah ditulis dalam cherita bala raja ti disimpan di menua Babilon.

²Tang utai ti udah ditulis nya ditemu di nengeri Ekbatana di sitak menua Media. Utai nya ditulis dalam siti gulung surat. Baka tu ku munyi utai nya ditulis:

³“Dalam taun ti keterubah Raja Besai Sairus megai perintah, iya ngasuh Rumah Sembiang digaga baru di Jerusalem nyadika endur alai ngenjuk piring enggau nunu piring. Peninggi Rumah Sembiang nya enda tau enda 20 meter, lalu buka iya 27 meter.

⁴Dinding iya enda tau enda digaga ari selapis kayu enggau tiga lapis batu. Semua ungkus deka dibayar ari sarang reta raja.

⁵Perengka emas enggau pirak ti udah dibai Raja Nebukadnesar ngagai menua Babilon ari Rumah Sembiang di Jerusalem enda tau enda dipulaika baru ngagai endur asal iya dalam Rumah Sembiang di Jerusalem.”

⁶Udah nya Raja Besai Darius nyaut munyi tu: “Ngagai Tatenai gabenor di Barat Eupratis, Setar Bosenai, enggau bala pemesai bukai di Barat Eupratis; Anang semak Rumah Sembiang nya,

⁷lalu anang ngachau pengawa begagaka Rumah Sembiang nya. Awakka gabenor menua Judah enggau bala tuai orang Judah ngaga Rumah Sembiang Allah Taala nya baru, ba endur asal iya.

⁸Ngena surat tu aku ngasuh kita nulung sida ngaga Rumah Sembiang nya baru. Ungkus ti dikena sida enda tau enda lengkas dibayar ngena duit perintah, ti diterima ari chukai di Barat Eupratis, ngambika pengawa nya enda tejanggal ngapa.

⁹Tiap hari kita enda tau enda meri bala imam di Jerusalem sebarang utai ti dipeguna sida: anak sapi ti lelaki, bedus, tauka anak domba ti deka ditunu nyadika piring ngagai Allah Taala ti di serega, tauka gandum, garam, wain, tauka minyak kana.

¹⁰Utai tu enda tau enda dikereja ngambika sida ulih ngenjuk piring ti ngerinduka ati Allah Taala ti di serega, lalu besampi minta berekat ari Iya ke aku, enggau ke bala anak aku.

¹¹Aku mega madahka ngagai kita, enti orang ngelanggar atur tu, sebatang kayu pengerat deka dichabut ari rumah sida, dilancham, lalu ditumbukka ngagai tubuh sida. Lalu rumah sida deka digaga nyadi tugung uras.

¹²Awakka Allah Taala ti udah milih Jerusalem nyadika endur alai Iya disembah, muai sebarang raja tauka bansa ti ngelaban atur tu, lalu nguji ngerusak Rumah Sembiang nya. Aku, Darius, udah meri atur tu. Atur aku tu enda tau enda dititihka magang.”

¹³Udah nya gabenor Tatenai, Setar Bosenai, enggau bala pemesai ti bukai lalu nitihka jaku raja besai.

¹⁴ Bala tuai orang Judah jampat amat ngaga Rumah Sembiang nya. Sida diperansang nabi Hagai enggau nabi Sekariah. Sida tembu ngaga Rumah Sembiang nya nitihka jaku Allah Taala ke disembah orang Israel enggau atur Sairus, Darius, enggau Artaserses, bala raja besai menua Persia.

¹⁵Sida tembu ngaga Rumah Sembiang nya kena tiga hari bulan Adar dalam taun ti keenam Raja Besai Darius megai perintah.

¹⁶Udah nya orang Israel, iya nya bala imam, bala orang Lewi, enggau semua orang ke udah dibuai ngagai menua Babilon, lalu diatu udah pulai baru ngagai menua sida empu, nyerahka Rumah Sembiang nya ngagai Allah Taala enggau ati ti gaga.

¹⁷Kena sida nyerahka Rumah Sembiang nya, sida meri 100 iku sapi ti lelaki, 200 iku bedus, enggau 400 iku anak domba nyadika piring, enggau 12 iku kambin nyadika piring pengampun dosa, siku ke siti-siti raban bansa orang Israel.

¹⁸Sida mega ngatur bala imam enggau orang Lewi ngereja pengawa dalam Rumah Sembiang di Jerusalem, nitihka atur dalam bup Moses.

¹⁹ Orang ke udah pulai baru ari menua Babilon ngintu Gawai Paska kena empat belas hari bulan ti kesatu dalam taun ti nangkanka nya.

²⁰Semua bala imam enggau orang Lewi bela nuchi diri magang, lalu semua sida nyadi tuchi. Orang Lewi nyayat jelu nyadika piring Gawai Paska ke semua orang ke udah pulai ari menua Babilon, ke bala imam, enggau ke sida empu.

²¹Piring nya diempa semua orang Israel ti udah pulai ari menua Babilon, enggau semua orang ke udah ngelengkaka jalai orang kapir ti nguan menua nya lalu datai nyembah TUHAN Allah Taala ke disembah orang Israel.

²²Tujuh hari sida ngerami Gawai Roti Ti Enda Beragi enggau ati ti gaga. Sida balat gaga ati laban TUHAN udah ngasuh raja besai menua Asiria [12] kasihka sida, datai ke nyau nyukung pengawa sida ke begagaka Rumah Sembiang Allah Taala ke disembah orang Israel.