Read Iban Esra 7 Bible Online

Esra 7 - Iban bible

Esra 7

¹Nyau betaun-taun udah bekau nya, lebuh Artaserses nyadi raja besai menua Persia, bisi orang siku benama Esra anak Seraiah, anak Asariah, anak Hilkiah,

²anak Salum, anak Sadok, anak Ahitup,

³anak Amariah, anak Asariah, anak Meraiot,

⁴anak Serahiah, anak Usi, anak Buki,

⁵anak Abisua, anak Pinehas, anak Eleasar, anak Aron.

⁶Esra nya orang ke bepelajar, ti bepenemu-dalam pasal Adat TUHAN ti udah diberi Allah Taala ke disembah orang Israel ngagai Moses. Laban Esra diberekatka TUHAN Allah Taala iya, raja besai meri iya semua utai ti dipinta iya. Dalam taun ti ketujuh Artaserses megai perintah, Esra angkat ari menua Babilon mansang ngagai Jerusalem enggau seraban orang Israel, nyengkaum bala imam, orang Lewi, bala orang ke nebah musik dalam Rumah Sembiang, orang ke nyaga Rumah Sembiang, enggau bala orang ke gawa.

⁸Sida angkat ari Babilon kena satu hari bulan ti kesatu. Ari tulung Allah Taala, sida datai di Jerusalem kena satu hari bulan ti kelima.

¹⁰Esra udah nyerahka diri belajarka Adat TUHAN, nitihka Adat nya dalam pengidup iya, sereta ngajar semua adat enggau atur ari Adat nya ngagai orang Israel.

¹¹Raja Besai Artaserses meri surat tu ngagai Esra, ti nyadi imam sereta bepelajar ba pasal Adat enggau pesan ti udah diberi TUHAN ngagai orang Israel:

¹²“Ari Raja Besai Artaserses [13] ngagai imam Esra, ti landik pasal Adat Allah Taala ti di serega.

¹³Aku meri atur ngagai semua orang Israel, ngagai sida imam, enggau orang Lewi ti diau di serata menua ti dipegai aku, ngasuh sida mupuk sama enggau nuan mansang ngagai Jerusalem, enti sida deka.

¹⁴Aku enggau tujuh iku penyanding penemu aku, ngasuh nuan mansik gaya utai di Jerusalem, enggau di menua Judah, ngambika aku nyamai nemu enti Adat Allah Taala nuan, ti udah diserahka ngagai nuan, dititihka.

¹⁵Nuan enda tau enda mai emas enggau pirak nyadika pemeri ti deka diberi aku enggau bala penyanding penemu aku, ngagai Allah Taala ke disembah orang Israel, ke bempu Rumah Sembiang di Jerusalem.

¹⁶Nuan enda tau enda mega mai semua pirak enggau emas ti udah digumpul nuan di serata sitak menua Babilon, enggau pemeri ti diberi orang Israel enggau bala imam sida ke Rumah Sembiang Allah Taala sida di Jerusalem.

¹⁷Nuan enda tau enda ngena duit tu enggau bejimat, lalu meli sapi ti lelaki, bedus ti lelaki, anak domba, gandum, enggau wain lalu meri utai nya ba alta dalam Rumah Sembiang di Jerusalem.

¹⁸Nuan tau nguna pirak enggau emas ti laluh kena begagaka sebarang utai ti dikedekaka nuan enggau bala nembiak nuan, nitihka peneka Allah Taala nuan.

¹⁹Nuan enda tau enda nyerahka ngagai Allah Taala di Jerusalem semua pekekas ti udah diberi ngagai nuan ngambika bisi dikena ngereja pengawa dalam Rumah Sembiang.

²⁰Enti nuan agi begunaka utai bukai kena ngereja pengawa dalam Rumah Sembiang nya, nuan tau ngambi utai nya ari sarang reta raja.

²¹Aku ngasuh semua pemesai ke bekereja ngemataka sarang reta raja di Barat Eupratis, meri enggau jampat ngagai Imam Esra ti landik pasal Adat Allah Taala ti di serega, semua utai ti dipinta iya,

²²tang enda tau lebih ari 3,400 kilogram pirak, 10,000 kilogram gandum, 2,000 liter wain, 2,000 liter minyak kana, enggau ni penyampau garam ti diguna.

²³Kita enda tau enda bejimat meri semua utai ti diguna Allah Taala ti di serega ke Rumah Sembiang Iya. Kita enda tau enda nentuka Iya enda ringat ngagai aku tauka ringat ngagai orang ke merintah nangkanka aku.

²⁴Kita enda tau ngumpul chukai ari bala imam, orang Lewi, orang ke nebah musik, jejaga, orang ke gawa, tauka sebarang orang bukai ke bekereja dalam Rumah Sembiang.

²⁵Nuan, Esra, ngena penemu-dalam ti udah diberi Allah Taala ngagai nuan, enda tau enda ngeletak orang ke bejalaika pengawa perintah enggau nyadi hakim ngambika sida bisi merintah semua orang ke diau di Barat Eupratis, ti diau nitihka Adat Allah Taala nuan. Nuan enda tau enda ngajar Adat nya ngagai sebarang orang ke enda nemu Adat nya.

²⁶Enti orang enda ngasika Adat Allah Taala nuan, tauka adat perintah menua, sida enda tau enda diukum tekala nya: ngena ukum bunuh, tauka dibuai ngagai menua bukai, tauka reta tengkira sida dirampas, tauka sida ditutup dalam rumah jil.”

²⁷Ku Esra bejaku, “Puji TUHAN Allah Taala aki ini kitai! Iya udah ngasuh raja besai meri basa ngagai Rumah Sembiang di Jerusalem.

²⁸Ulih pengasih Allah Taala, raja besai, bala penyanding penemu iya, enggau semua bala pemesai iya ke bekuasa, udah bebasaka aku. TUHAN Allah Taala aku udah meri aku pemerani, lalu aku ulih mujuk mayuh bala tuai peturun orang Israel pulai enggau aku.”