Read Iban Nehemiah 10 Bible Online

Nehemiah 10 - Iban bible

Nehemiah 10

¹Orang ke terubah nyain nya Tuan Gabenor Nehemiah anak Hakaliah, ditangkanka Sedekiah. Bala orang tu mega nyain:

²Imam: Seraiah, Asariah, Jeremiah, Pasur, Amariah, Malkijah, Hatus, Sebaniah, Maluk, Harim, Meremot, Obadiah, Daniel, Gineton, Baruk, Mesulam, Abijah, Mijamin, Masiah, Bilgai, enggau Semaia.

⁹Orang Lewi: Jesua anak Asaniah, Binui ari raban bansa Hanadat, Kadmi-el, Sebaniah, Hodiah, Kelita, Pelaiah, Hanan, Mika, Rehob, Hasabiah, Sakur, Serebiah, Sebaniah, Hodiah, Bani, enggau Beninu.

¹⁴Bala tuai bansa: Paros, Pahat Moap, Elam, Satu, Bani, Buni, Asgat, Bebai, Adonijah, Bikbai, Adin, Ater, Hesekiah, Asur, Hodiah, Hasum, Besai, Harip, Anatot, Nebai, Makpias, Mesulam, Hesir, Mesesabel, Sadok, Jadua, Pelatiah, Hanan, Anaiah, Hosea, Hananiah, Hasup, Halohes, Pilha, Sobek, Rehum, Hasapnah, Maseiah, Ahiah, Hanan, Anan, Maluk, Harim, enggau Banah.

²⁸Kami, orang Israel, bala imam, orang Lewi, bala orang ke nyaga Rumah Sembiang, bala orang ke nebah musik dalam Rumah Sembiang, orang ke bekereja dalam Rumah Sembiang, enggau semua orang bukai ke ngasika Adat Allah Taala, iya nya kami empu, enggau bini kami, sereta enggau semua anak kami ke udah chukup tuai lalu nemu reti utai, udah nyeraraka diri ari orang bansa bukai ke diau di menua kami.

²⁹Diatu kami, enggau bala tuai bansa kami besumpah deka diau nitihka Adat ti udah diberi Allah Taala nengah nembiak Iya Moses. Kami besumpah deka ngasika semua jaku ti disebut TUHAN ngagai kami, lalu kami deka nitihka semua adat enggau atur Adat Iya. Awakka kami tulah enti kami ngelanggar jaku sumpah tu.

³⁰ Kami enggai jadi enggau orang bansa bukai ke diau di menua kami.

³¹ Enti orang bansa bukai mai gandum tauka sebarang utai bukai lalu nyual utai nya ngagai kami lebuh Hari Sabat, tauka lebuh hari kudus ti bukai, kami enggai meli utai nya ari sida. Genap taun ti ketujuh, kami deka ngetu bumai tanah kami, lalu deka muai semua utang orang ba kami.

³² Genap taun kami deka meri 5 gram pirak kena nulung mayar ungkus ngintu Rumah Sembiang.

³³Kami deka meri utai ti disebut di baruh tu lagi ngambika utai nya bisi dikena nyembah Allah Taala dalam Rumah Sembiang: Roti ti kudus, gandum nyadika piring ti diberi tiap hari, jelu ti ditunu nyadika piring tiap hari, piring ti kuduska Hari Sabat, ke Gawai Anak Bulan, enggau ke gawai bukai, pemeri ti kudus, piring pengampun dosa orang Israel, enggau sebarang utai bukai ti diguna dalam Rumah Sembiang.

³⁴Bala kami tu, bala imam, enggau orang Lewi, deka bechabut undi genap taun kena nentuka raban peturun ti deka meri kayu api kena nunu piring ti diberi ngagai TUHAN Allah Taala kami, nitihka atur Adat.

³⁵ Kami deka mai ngagai Rumah Sembiang tiap taun piring ari buah bungas, gandum ti terubah diketau kami, enggau buah bungas ti terubah mansau ba puchuk kayu kami.

³⁶ Genap iku kami deka mai ngagai bala imam dalam Rumah Sembiang, anak tuai kami, lalu nyerahka iya dia ngagai Allah Taala nitihka atur Adat. Kami deka mega nyerahka anak ti terubah diadaka jelu sapi kami, enggau anak domba ti terubah diadaka bedus kami enggau anak kambin ti terubah diadaka kambin kami.

³⁷ Kami deka mai ngagai imam dalam Rumah Sembiang, tuku roti ti digaga ari gandum ti terubah diketau kami genap taun, enggau piring wain, minyak kana, enggau semua macham buah. Kami deka mai ngagai orang Lewi ke ngumpul pemeri sepuluh peratus dalam genturung pendiau kami, pemeri sepuluh peratus ari utai ti ditanam ba tanah kami.

³⁸ Imam ari peturun Aron deka bejalai enggau orang Lewi lebuh pemeri sepuluh peratus nya digumpul. Orang Lewi deka nyimpan sepuluh peratus ari semua pemeri sepuluh peratus nya dalam setor Rumah Sembiang ngambika bisi dikena dalam Rumah Sembiang nya.

³⁹Orang Israel enggau orang Lewi enda tau enda mai gandum, wain, enggau minyak kana ti diberi orang mayuh, ngagai bilik setor alai pekekas rumah TUHAN ditaruh. Dia mega endur alai imam ke bekereja, orang ke nyaga Rumah Sembiang, enggau raban orang ke belagu dalam Rumah Sembiang, diau. Kami enggai nejuka Rumah Sembiang Allah Taala kami enda diintu.