Read Iban Nehemiah 12 Bible Online

Nehemiah 12 - Iban bible

Nehemiah 12

¹Tu nama bala imam enggau orang Lewi ke sama pulai enggau Serubabel anak Sealtiel, enggau Imam Besai Jesua, ari menua Babilon:

²Imam: Seraiah, Jeremiah, Esra, Amariah, Maluk, Hatus, Sekaniah, Rehum, Meremot, Ido, Ginetoi, Abijah, Mijamin, Madiah, Bilgah, Semaiah, Joiarip, Jedaiah, Salu, Amok, Hilkiah, enggau Jedaiah. Orang tu udah nyadi tuai ke bala imam lebuh maya Jesua.

⁸Orang Lewi: Tu nama orang ke nguluka orang belagu meri terima kasih: Jesua, Binui, Kadmi-el, Serebiah, Judah, enggau Mataniah.

⁹Tu nama orang ke ngelembungka sida: Bakbukiah, Uno, enggau orang Lewi ti bukai.

¹⁰Jesua nya apai Joiakim. Joiakim nya apai Eliasip. Eliasip nya apai Joiada.

¹¹Joiada nya apai Jonatan, lalu Jonatan nya apai Jadua.

¹²Baka tu ku nama imam ti nyadi tuai ke genap bengkah raban peturun imam lebuh Joiakim nyadi Imam Besai: Imam — Raban peturun Meraiah — Seraiah Hananiah — Jeremiah Mesulam — Esra Jehohanan — Amariah Jonatan — Maluchi Josep — Sebaniah Adna — Harim Helkai — Meraiot Sekariah — Ido Mesulam — Gineton Sikri — Abijah Piltai — Miniamin enggau raban peturun Moadiah Shamua — Bilgah Jehonatan — Semaiah Matenai — Joiarip Usi — Jedaiah Kalai — Salai Eber — Amok Hasabiah — Hilkiah Netanel — Jedaiah

²²Nama tuai bilik orang Lewi enggau tuai bilik bala imam bisi ditulis sekumbang sida Imam Besai Eliasip, Joiada, Jonatan, enggau Jadua agi idup. Semua nama nya tembu dituliska magang lebuh Darius nyadi raja besai menua Persia.

²³Tang nama tuai bilik orang Lewi ditulis semina nyentuk ngagai maya Jonatan, uchu Eliasip aja.

²⁴Nitihka atur Hasabiah, Serebiah, Jesua anak Kadmi-el, orang Lewi dibagi ngagai mayuh bengkah raban. Dua bengkah raban sekali-sekali muji Allah Taala. Raban dua bengkah nya besaut-saut muji sereta meri terima kasih ngagai Allah Taala nitihka atur ti udah diberi Raja David, ke nembiak Allah Taala.

²⁵Tu nama jejaga Rumah Sembiang ti nyadi tuai nyaga bilik setor semak pintu Rumah Sembiang: Mataniah, Bakbukiah, Obadiah, Mesulam, Talmon, enggau Akup.

²⁶Orang tu idup lebuh maya Joiakim anak Jesua, uchu Jehosadak, enggau lebuh maya Nehemiah nyadi gabenor, enggau lebuh maya Esra, iya nya imam ti landik pasal Adat.

²⁷Lebuh dinding kuta nengeri Jerusalem diserahka, orang Lewi lalu dibai ngagai nengeri nya ari sebarang endur sida diau, ngambika sida ulih enggau ngerami pengawa nyerahka dinding kuta nya ngena lagu terima kasih, ngena bebendai enggau belikan.

²⁸Ruang bilik orang Lewi ti landik belagu lalu datai ari endur alai sida ke udah ngentapka diri ngelingi Jerusalem, enggau ari nengeri ti mit ngelingi Netopah,

²⁹enggau ari Betgilgal, Geba, enggau Asmabet.

³⁰Bala imam enggau orang Lewi lalu nuchi diri, nuchi orang mayuh, nuchi pintu, enggau dinding kuta nengeri.

³¹Aku ngempuruka bala tuai orang Judah ba atas dinding kuta nengeri, lalu ngasuh sida nguluka dua bengkah raban ti besai bejalai ngelingi nengeri, meri terima kasih ngagai Allah Taala. Raban ti keterubah bejalai musin ke kanan ba atas dinding kuta nya tunga ngagai Pintu Uras. [12]

³²Hosaiah bejalai ngentudika sida, dititihka setengah ari bala tuai orang Judah.

³³Tu nama bala imam ke bejalai ngentudika sida, besepuka terumpit: Asariah, Esra, Mesulam, Judah, Benjamin, Semaiah, enggau Jeremiah. Sida lalu dititihka Sekariah anak Jonatan, uchu Semaiah. (Bala aki ini iya nyengkaum Mataniah, Mikaiah, enggau Sakur, ari raban peturun Asap.)

³⁶Sekariah lalu dititihka bala ari raban peturun iya empu, iya nya sida Semaiah, Asarel, Milalai, Gilalai, Mai, Netanel, Judah, enggau Hanani. Semua sida nya mai pekekas musik magang sebaka enggau pekekas ti ditebah Raja David, ke nembiak Allah Taala. Esra, ti landik pasal Adat, nguluka raban iya ba pejalai nya.

³⁷Lebuh sida datai ba Pintu Ai Ti Engkeching sida lalu niki tangga ti nuju ngagai Nengeri David, mansa istana David, lalu pulai baru ngagai dinding kuta ba Pintu Ai, ti ba tisi timur nengeri nya.

³⁸Raban sebengkah ke meri terima kasih, bejalai musin ke kiba nengah puchuk dinding kuta, lalu aku nitihka sida disempulang setengah ari bala mayuh. Kami bejalai mansa Menara Dapur ngagai Dinding Kuta Ti Besai Buka,

³⁹lalu ari nya kami bejalai mansa Pintu Epraim, Pintu Jesanah, [13] Pintu Ikan, Menara Hananel, enggau Menara Seratus, ngagai Pintu Bedus. Kami nembuka pejalai kami semak pintu Rumah Sembiang.

⁴⁰Nya alai raban ti dua bengkah ti meri terima kasih ngagai Allah Taala, sama datai ba kandang Rumah Sembiang. Nambahka bala tuai ke bejalai enggau aku,

⁴¹raban aku nyengkaum bala imam ke nyepu terumpit. Sida nya: Eliakim, Maseiah, Miniamin, Mikaiah, Elioenai, Sekariah, enggau Hananiah.

⁴²Sida dititihka Maseiah, Semaiah, Eleasar, Usi, Jehohanan, Malkijah, Elam, enggau Eser. Bala orang ke belagu, ke diuluka Jesrahiah, belagu enggau naka penginggar nyawa sida.

⁴³Mayuh amat piring diberi sehari nya, lalu orang mayuh gaga ati magang, laban Allah Taala udah ngasuh ati sida lantang. Sida ke indu enggau bala anak mit sama enggau rami, lalu nyawa orang ke rami ulih didinga berapa batu ari endur nya.

⁴⁴Lebuh maya nya, orang bisi udah diletak ngemataka bilik setor alai naruh semua utai ti diberi ngagai Rumah Sembiang. Utai ti diberi nya nyengkaum pemeri sepuluh peratus, enggau gandum ti terubah diketau, buah ti mansau ti terubah diketau genap taun. Orang tu betanggungjawap ngumpul pemeri ari umai ti semak semua nengeri, enggau ari bala imam enggau ari orang Lewi nitihka atur Adat. Semua orang Judah gaga ati ke bala imam enggau ke orang Lewi,

⁴⁵ laban sida udah ngereja pengawa nuchi orang mayuh enggau pengawa bukai ti udah dipesanka Allah Taala. Bala orang ke nebah musik dalam Rumah Sembiang enggau bala orang ke nyaga Rumah Sembiang, mega ngereja pengawa sida nitihka atur ti digaga Raja David enggau anak iya Solomon.

⁴⁶Kenyau ari maya Raja David, enggau maya Asap nyadi tukang nebah musik dulu menya, bala orang ke nebah musik endang udah seruran nguluka orang mai lagu puji enggau lagu terima kasih ngagai Allah Taala.

⁴⁷Lebuh maya Serubabel, enggau lebuh maya Nehemiah, semua orang Israel tiap hari meri pemeri kena nulung bala orang ke nebah musik, enggau bala jejaga Rumah Sembiang. Orang Israel ngenjuk piring ti kudus ngagai orang Lewi, lalu orang Lewi, nitihka penyampau ti udah diletak, meri sebagi ari piring ti kudus nya ngagai bala imam.