Read Iban Nehemiah 13 Bible Online

Nehemiah 13 - Iban bible

Nehemiah 13

¹ Lebuh Adat Moses benung dibacha enggau nyawa ti inggar ngagai orang mayuh, sida lalu datai ba genteran ti madahka orang Amon enggau orang Moap enda tau sekali-kali ditejuka begulai enggau bala nembiak Allah Taala.

² Atur tu diberi laban orang Amon enggau orang Moap enggai meri pemakai enggau ai irup ngagai orang Israel lebuh sida di rantau jalai pansut ari menua Ejip. Lalu orang Moap udah mega ngaji Balaam nyumpah orang Israel. Tang Allah Taala kitai udah ngalihka sumpah nya nyadi berekat.

³Lebuh orang Israel ninga adat nya dibacha, sida lalu nyeraraka diri ari semua orang bansa bukai.

⁴Imam Eliasip, ti nyadi tuai ngemataka bilik setor Rumah Sembiang, endang lama udah bepangan enggau Tobiah.

⁵Iya ngemendarka Tobiah ngena siti bilik ti besai ti udah alai sida naruh pemeri gandum enggau menyan, pekekas ti dikena dalam Rumah Sembiang, pemeri ke bala imam, enggau pemeri sepuluh peratus ari gandum, wain, enggau minyak kana ti diberi ngagai orang Lewi, ngagai bala orang ke nebah musik, enggau ngagai bala jejaga Rumah Sembiang.

⁶Lebuh Imam Eliasip ngemendarka Tobiah ngena bilik nya, aku nadai di Jerusalem, laban dalam taun ti ketiga puluh dua Artaserses [14] nyadi raja besai menua Babilon, aku udah pulai ngagai menua Babilon madahka berita ngagai raja besai. Nyau kelama udah bekau nya, nya baru aku bulih pemendar

⁷pulai baru ngagai Jerusalem. Lebuh aku datai di Jerusalem, aku tekenyit ati lebuh aku nemu Eliasip udah ngemendarka Tobiah ngena siti bilik dalam Rumah Sembiang.

⁸Aku pedis ati lalu muai semua utai Tobiah ari bilik nya.

⁹Aku meri atur ngasuh bilik nya dituchi, lalu semua pekekas Rumah Sembiang, pemeri ari gandum, enggau menyan dipulaika baru ngagai bilik nya.

¹⁰ Aku mega ninga berita madahka ungkup ti patut diberi ngagai orang Lewi [15], enda diberi ngagai sida. Nya alai sida enggau bala orang ke nebah musik, ke bekereja dalam Rumah Sembiang, udah pulai ngagai umai diri.

¹¹Nya alai aku nganu bala pemesai laban sida nadai ibuhka Rumah Sembiang. Lalu aku mai bala orang Lewi enggau bala orang ke nebah musik pulai baru ngagai Rumah Sembiang, lalu ngasuh sida gawa baru.

¹² Udah nya semua orang Israel lalu belabuh baru mai pemeri sepuluh peratus ari gandum, wain, enggau minyak kana sida ngagai bilik setor Rumah Sembiang.

¹³Aku ngeletak orang nyadi tukang wang ngemataka bilik setor. Tu nama sida: Imam Selemiah; Sadok, ti landik pasal Adat; enggau siku orang Lewi ke benama Pedaiah. Hanan anak Sakur, uchu Mataniah, nyadika penulung sida. Aku nemu diri tau ngarapka sida deka nyadung pemakai enggau ati ti lurus ngagai orang bukai ke sama bekereja enggau sida.

¹⁴O Allah Taala aku, kingatka semua utai ti udah dikereja aku ke Rumah Sembiang Nuan, enggau pengawa ti besembah dalam Rumah Sembiang nya.

¹⁵ Lebuh maya nya aku bisi meda orang Judah mitan buah anggur lebuh Hari Sabat. Sida ke bukai mai gandum, wain, buah anggur, buah ara, enggau mayuh utai bukai ngena keledai sida ngagai Jerusalem. Aku meri sida jaku tangkan nagang sida bejualka utai lebuh Hari Sabat.

¹⁶Sekeda orang ari nengeri Tire bisi diau di Jerusalem, lalu sida mai ikan enggau semua macham barang ngagai nengeri Jerusalem, deka nyual utai nya lebuh Hari Sabat.

¹⁷Aku nganu bala tuai orang Judah, lalu madahka ngagai sida, “Peda penyai utai ti dikereja kita! Kita udah ngamahka Hari Sabat.

¹⁸Tu meh kebuah Allah Taala udah ngukum aki ini kita, lebuh Iya ngerusak nengeri tu. Tang agi ga kita deka majak ngamahka Hari Sabat lalu nyungkak Allah Taala ringat ngagai orang Israel.”

¹⁹Nya alai aku lalu meri atur ngasuh pintu nengeri ditutup ba pun tiap-tiap Hari Sabat, lebuh padam mata panas,[16] lalu pintu nya enda tau dibuka datai ke lepas Hari Sabat. Aku ngasuh sekeda orang ari bala aku jaga ba pintu nengeri, kena nagang utai dibai tama ngagai nengeri lebuh Hari Sabat.

²⁰Nyadi sekali dua iku orang dagang ke bejualka semua macham utai, tinduk di luar dinding kuta nengeri malam hari Lima.

²¹Ku jaku tangkan aku enggau seduai iya, “Nadai guna seduai diau di luar nganti hari siang. Enti seduai agi ngereja tu, aku deka muru seduai.” Belabuh ari nya, seduai iya nadai agi datai lebuh Hari Sabat.

²²Aku ngasuh orang Lewi nuchi diri empu, lalu ngasuh sida mansang nyaga pintu nengeri, kena nentuka Hari Sabat meruan kudus. Kingatka aku, O Allah Taala, ketegal utai tu mega, lalu kasihka aku laban pengerindu Nuan endang besai.

²³ Lebuh maya nya mega aku bisi nemu mayuh lelaki orang Judah jadi enggau indu ari Asdot, Amon, enggau Moap.

²⁴Setengah ari bala anak sida nya bejaku ngena jaku orang Asdot, tauka jaku orang bansa bukai, lalu enda nemu jaku kami empu.

²⁵Aku nganu sida ke lelaki, minta sida ditinggang sumpah, malu sida, lalu ngeruntun buk sida. Udah nya aku ngasuh sida besumpah dalam nama Allah Taala, madahka diri enggau anak sida enda agi jadi enggau orang bansa bukai.

²⁶Ku aku bejaku enggau sida, “Raja Solomon bedosa ketegal indu orang bansa bukai. Solomon besai agi ari raja menua bukai. Allah Taala udah rinduka iya, lalu ngasuh iya nyadi raja ke semua menua Israel, tang taja pia, iya bedosa laban iya jadi enggau indu orang bansa bukai.

²⁷Kati kita mai kami nitihka teladan kita, enda ngasika Allah Taala kitai, lalu jadi enggau indu bansa bukai?”

²⁸ Joiada nya anak lelaki Imam Besai Eliasip, tang siku ari bala anak lelaki iya jadi enggau anak indu Sanbalat, ari nengeri Bet-horon. Nya alai aku ngasuh Joiada angkat ari Jerusalem.

²⁹Allah Taala, kingatka chara orang tu udah ngamahka pengawa imam enggau sempekat ti udah digaga Nuan enggau bala imam enggau bala orang Lewi.

³⁰Nya alai aku lalu nuchi orang mayuh ari semua utai ti ukai enggi orang Judah. Aku nyendiaka atur ke bala imam, enggau ke orang Lewi, ngambika semua sida nemu pengawa diri.

³¹Aku meri atur, minta kayu ti dikena nunu piring dibai ba maya ti patut, lalu orang mayuh mai piring sida ke digaga ari gandum enggau buah sida ke terubah mansau. Kingatka semua utai tu, O Allah Taala, lalu berekatka aku ketegal utai nya.